រាជធានីភ្នំពេញ ៖ ជនសង្ស័យពីរនាក់ឆក់កាបូបពីនារីម្នាក់បានសម្រេចជិះម៉ូតូគេចខ្លួន តែត្រូវនារីរងគ្រោះជិះម៉ូតូដេញតាមពីក្រោយ ហើយស្រែកថាចោរៗ បង្កការភ្ញាក់ផ្អើលដល់អ្នករត់ម៉ុតូឌុប ជួយដេញចាប់បានជនសង្ស័យ
រាជធានីភ្នំពេញ ៖ ជនសង្ស័យពីរនាក់ឆក់កាបូបពីនារីម្នាក់បានសម្រេចជិះម៉ូតូគេចខ្លួន តែត្រូវនារីរងគ្រោះជិះម៉ូតូដេញតាមពីក្រោយ ហើយស្រែកថាចោរៗ បង្កការភ្ញាក់ផ្អើលដល់អ្នករត់ម៉ូតូឌុប ជួយដេញចាប់បានជនសង្ស័យ រួចនាំគ្នា ស្វាគមន៍ម្នាក់មួយដៃ ម្នាក់មួយជើង នៅសល់តែដង្ហើមចង្រិត ។ ហេតុការណ៍នេះកើតឡើងកាលពីវេលាម៉ោង៩ និង៣០នាទីយប់ ថ្ងៃទី១៤ ធ្នូ ២០១៤ នៅភូមិសាស្រ្តសង្កាត់បឹងត្របែក ខណ្ឌចំការមន ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុជនសង្ស័យទាំងពីរនាក់ ជិះម៉ូតូហុងដាឌ្រីមសេ១១០មួយគ្រឿង ជិះឌុបគ្នា ចេញធ្វើសកម្មភាពឆក់តាមផ្លូវ ខណៈនោះក៏មាននារីម្នាក់ជិះម៉ូតូម្នាក់ឯង ក្រុមជនសង្ស័យក៏បានជិះម៉ូតូទៅក្បែរហើយធ្វើសកម្មភាពឆក់កាបូបពីនារីរងគ្រោះ បានសម្រេច ហើយនាំគ្នាជិះម៉ូតូគេចខ្លួន ។ បន្ទាប់ពីជនសង្ស័យឆក់កាបួបបានហើយ នារីរងគ្រោះក៏បានបើកម៉ូតូដេញតាមពីក្រោយ និងបានស្រែកថា ចោរៗ បង្កការភ្ញាក់ផ្អើលដល់អ្នករត់ម៉ូតូឌុប និងប្រជាបលរដ្ឋ នាំគ្នាជិះម៉ូតូដេញតាម ធ្វើឱ្យជនសង្ស័យភ័យក៏បានបើកម៉ូតូយ៉ាងលឿន ខណៈមកដល់ច្រមុះជ្រូកក្បាលថ្នល់នៅក្នុងសង្កាត់ផ្សារដើមថ្កូវ ក្រុមជនសង្ស័យបានប្តួលម៉ូតូបម្រុងរត់គេចខ្លួន ប៉ុន្តែប្រជាពលរដ្ឋតាមមកទាន់ នាំគ្នាស្ទាក់ព្រួតវាយម្នាក់មួយដៃម្នាក់មួយជើង នៅសល់តែដង្ហើមចង្រិត ។ បន្ទាប់មកសមត្ថកិច្ចក៏បានប្រាប់ប្រជាពលរដ្ឋឈប់ឱ្យវាយ ដោយសមត្ថកិច្ចនាំយកជនសង្ស័យទាំងពីរនាក់នេះទៅកាន់ប៉ុស្តិ៍នគរបាលរដ្ឋបាលផ្សារដើមថ្កូវ ដើម្បីធ្វើការសាកសួរនិងកសាងសំណុំរឿងទៅតាមនិតិវិធីច្បាប់ ។
ក្រោយពេលកើតហេតុនារីរងគ្រោះមិនបានទៅដាក់បណ្តឹងនោះទេ ដោយសារតែយកបានកាបូបពីចោរវិញ ហើយរួចក៏បានជិះម៉ូតូត្រឡប់ទៅផ្ទះវិញតែម្តង ។
ចែករំលែកព័តមាននេះ