ខេត្តកណ្តាល ៖ កុមារាម្នាក់បានលង់ទឹកអូរ (ដៃទន្លេមេគង្គ) ស្លាប់ ខណៈចុះងូតទឹកជាមួយក្មេងៗក្នុងភូមិជាមួយគ្នា ។
ហេតុការណ៍នេះ បានបង្កឲ្យមានការភ្ញាក់ផ្អើលនៅម៉ោង១២និង៣០នាទីថ្ងៃត្រង់ថ្ងៃទី០៩ ធ្នូ ២០១៤ នៅចំណុចអូរ ក្រោមស្ពានអ្នកលឿងត្រើយខាងលិច ស្ថិតក្នុងភូមិអម្ពិលទឹក ឃុំកំពង់ភ្នំ ស្រុកលើកដែក ។
បើតាមឪពុកឈ្មោះ វ៉ា ម៉ៅ អាយុ៣៣ឆ្នាំ និង ម្តាយឈ្មោះ ទូច ភក្ត្រា អាយុ៣៤ឆ្នាំ រស់នៅក្នុងភូមិ-ឃុំកើតហេតុ បានរៀបរាប់ទំាងទឹកភ្នែកឲ្យដឹងថា រាល់ថ្ងៃគាត់ (ឪពុកម្តាយ) មិនបាននៅមើលថែរកូនទំាង៤នាក់ រាប់ទំាងកូនរងគ្រោះឲ្យបានដិតដល់ទេ ដោយសារជាប់រវល់ដើរស៊ីឈ្នួលបាញ់ថ្នំាស្វាយឲ្យគេ ដោយទុកកូនទំាង៤នាក់ឲ្យនៅជាមួយជីតាមើលថែរក្សា ។
ឳពុកម្តាយកុមារារងគ្រោះបានបន្តថា មុនពេលកើតហេតុ កុមារាឈ្មោះ ម៉ៅ កក្កដា អាយុ១០ឆ្នាំ ( ជាកូនទី២ ក្នុងចំណោមកូន៤នាក់)បានចេញពីសាលារៀនវិញ ហើយបានញុំាបាយជាមួយបងប្អូននិងជីតា រួចក៍បានទៅដើរលេងជាមួយក្មេងៗក្បែរខាង ។ ដោយបាត់ចៅយូរពេកជីតាក៍បានដើររក តែមិនឃើញ ស្រាប់តែមានការភ្ញាក់ផ្អើលថា មានកុមារាម្នាក់លង់ទឹកស្លាប់ បន្ទាប់ពីបុរសចំណាស់ម្នាក់ចុះជួយរាវស្រង់ឡើងគោក ក៍ទៅមើលទើបដឹងថាជាចៅរបស់ខ្លួន ។
បច្ចុប្បន្នក្រុមគ្រួសារកំពុងចាត់ចែងរៀបចំធ្វើបុណ្យតាមប្រពៃណី ៕
ចែករំលែកព័តមាននេះ