ដើម្បីការពារនូវពូជពង្សមច្ឆាជាតិកុំឲ្យវិនាសហិនហោច ដែលបង្កដោយក្រុមជនល្មើស ហើយម្យ៉ាងនារដូវនេះ ជារដូវត្រីពងផង កម្លាំងនគរបាលស្រុកមង្គលបូរី នៅថ្ងៃទី២០ ខែកញ្ញា ឆ្នាំ២០១៤ បានចេញល្បាតបង្រ្កាបក្រុមជនល្មើសនេសាទខុសច្បាប់ ចំនួន២កន្លែង ១កន្លែងប្រើឧបករណ៍ឆក់ និង១កន្លែងទៀតដាក់អួនស្បែមុង ។
លោកវរសេនីយ៍ត្រី ហោ សំណាត់ អធិការស្តីទី នគរបាលស្រុកមង្គលបូរី បានឲ្យដឹងថា ៖ នៅវេលាម៉ោង៤ល្ងាច ថ្ងៃទី២០ ខែកញ្ញា ឆ្នាំ២០១៤ កម្លាំងនគរបាលជំនាញបានសហការជាមួយកម្លាំងនគរបាលប៉ុស្តិ៍រដ្ឋបាលប្ញស្សីក្រោក ចុះរើអួនស្បៃមុងបានចំនួន១វង់ ប្រវែង១០ម៉ែត្រ ដែលជនល្មើសបានដាក់នៅតាមដងស្ទឹង ស្ថិតក្នុងភូមិអញ្ចាញ ឃុំប្ញស្សីក្រោក ។ អួនស្បៃមុងនោះ ត្រូវបានរក្សាទុកនៅប៉ុស្តិ៍រដ្ឋបាលប្ញស្សីក្រោករងចាំសុំគោលការណ៍ពីលោកឧត្តមសេនីយ៍ស្នងការដុតកំទេចចោល ។
លោកអធិការស្តីទី ក៏បានបន្តថា ៖ នៅវេលាម៉ោង៨ និង៤០នាទី យប់ថ្ងៃទី២០ ខែកញ្ញា ឆ្នាំ២០១៤ កម្លាំងនគរបាលប៉ុស្តិ៍រដ្ឋបាលតាឡំ បានដើរល្បាតពេលយប់ ប្រទះឃើញជនល្មើសដែលប្រើឧបករណ៍ឆក់ត្រី នៅចំណុចអូរស្ថិតក្នុងភូមិបឹងឃ្លាំងលិច ឃុំតាឡំ ស្រុកមង្គលបូរី ។ ពេលដែលជនល្មើសកំពុងតែធ្វើសកម្មភាព ឃើញកម្លាំងនគរបាលចុះទៅជនល្មើសបានរត់គេចខ្លួន ដោយបន្សល់ទុកតែវត្ថុតាងមាន ម៉ូទ័រឆក់ត្រី១ និងអាគុយ៤០អាំពែរ១ វត្ថុតាងរក្សាទុកនៅប៉ុស្តិ៍រដ្ឋបាលតាឡំ ៕
ចែករំលែកព័តមាននេះ