រាជធានីភ្នំពេញ ៖ ឃាតករពាក់ផ្កាយ២យោធា និងជាអគ្គនាយកក្រុមហ៊ុន ជី អេស ធី ដឹកអ្នកដំណើរដែលជាប់ពាក់ពន្ធថា បានសម្លា.ប់ប្រពន្ធចុង និងកូនស្រីអាយុ៦ឆ្នាំម្នាក់ យកសពញាត់ក្នុងធុងទឹកកកដឹកយកទៅផ្លុងចោលនៅជ្រោះពេជ្រនិល ត្រូវបានប៉ូលិសអាំងទែរប៉ូលកម្ពុជា សហការជាមួយអាជ្ញាប្រទេសថៃចាប់ខ្លួនបានហើយ
រាជធានីភ្នំពេញ ៖ ឃាតករពាក់ផ្កាយ២យោធា និងជាអគ្គនាយកក្រុមហ៊ុន ជី អេស ធី ដឹកអ្នកដំណើរដែលជាប់ពាក់ពន្ធថា បានសម្លាប់ប្រពន្ធចុង និងកូនស្រីអាយុ៦ឆ្នាំម្នាក់ យកសពញាត់ក្នុងធុងទឹកកកដឹកយកទៅផ្លុងចោលនៅជ្រោះពេជ្រនិល ត្រូវបានប៉ូលិសអាំងទែរប៉ូលកម្ពុជា សហការជាមួយអាជ្ញាប្រទេសថៃចាប់ខ្លួនបានហើយ និងបានបញ្ជូនមកដល់ក្រសួងមហាផ្ទៃរាជធានីភ្នំពេញ កាលពីវេលាម៉ោង៩និង៣០នាទី យប់ថ្ងៃទី១៣ កញ្ញា នេះ ។
ជនសង្ស័យជាឃាតករដៃដល់លោក គឹម ម៉ាវិន្ថា ភេទប្រុស អាយុ៥៧ឆ្នាំ ត្រូវបានប៉ូលិសអាំងទែរប៉ូលកម្ពុជា សហការជាមួយអាជ្ញាធរប្រទេសថៃ អនុវត្តតាមដីកាឱ្យនាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ ចាប់ខ្លួនកាលពីថ្ងៃទី១២ កញ្ញា នៅព្រំប្រទល់ថៃ-ទ្បាវ ខណៈលោកផ្កាយ២រូបនោះ បម្រុងឆ្លងដែនចេញពីប្រទេសថៃបន្តទៀត ។ ប្រភពព័ត៌មានបានឱ្យដឹងថា ក្រោយពីចាប់ខ្លួនជនជាប់ចោទឈ្មោះ គឹម ម៉ាវិន្ថា ត្រូវអាជ្ញាធរថៃជូនដំណឹងមកក្រសួងមហាផ្ទៃ នៃព្រះរាជាណាចក្រកម្ពុជា ដើម្បីឱ្យសមត្ថកិច្ចទៅទទួលយកនៅច្រកព្រំដែនអន្តរជាតិប៉ោយប៉ែត ។
បន្ទាប់ពីអាជ្ញាធរថៃជូនដំណឹងពីការចាប់ខ្លួនឃាតករខាងលើនេះ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជាទៅលោកឧត្តមសេនីយ៍ឯក ម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ ឱ្យនាំកម្លាំងនាយកដ្ឋាននគរបាលព្រហ្មទណ្ឌ ទៅទទួលយកនៅច្រកព្រំដែនប៉ោយប៉ែត ខេត្តបន្ទាយមានជ័យ ។ នៅព្រឹកថ្ងៃទី១៣ កញ្ញា លោកឧត្តមសេនីយ៍ អិុន បូរ៉ា ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ បានចាត់តាំងលោកវរសេនីយ៍ទោ ស៊ីវ ផល្លា ជាក្រុមឈុតពិសេសរបស់នាយកដ្ឋាននគរបាលព្រហ្មទណ្ឌ ដឹកនាំកម្លាំង១ក្រុមចេញទៅទទួលយកឧក្រិដ្ឋជនសង្ស័យនៅច្រកប៉ោយប៉ែត តាមពេលវេលាបានកំណត់ ។វេលាម៉ោង១២ថ្ងៃត្រង់ថ្ងៃដដែល កម្លាំងរបស់លោក ស៊ីវ ផល្លា បានទៅដល់ព្រំដែនច្រកទ្វារប៉ោយប៉ែត ដោយរង់ចាំរហូតដល់ម៉ោង២និង១៥នាទី ទើបបានសមភាគីថៃប្រគល់ជនជាប់ចោទឱ្យដល់ដៃ ដែលឧក្រិដ្ឋជនត្រូវបានសមត្ថកិច្ចទាំង២ភាគីដោះដូរខ្នោះដៃនាពេលនោះដែរ ។
ស្តាប់ការរៀបរាប់ត្រួសៗរបស់ឃាតករប្រភពព័ត៌មានបន្តថា នៅពេលកម្លាំងភាគីថៃប្រគល់ឧក្រិដ្ឋជនដល់ដៃភាគីកម្ពុជាភ្លាម កម្លាំងនគរបាលព្រហ្មទណ្ឌ បាននាំចូលរថយន្តនិងបាននាំមកកាន់ក្រសួងមហាផ្ទៃ តាមកងរថយន្តស៊ីរ៉ែនបើកផ្លូវមកដល់រាជធានីភ្នំពេញ នៅម៉ោងប្រមាណ៩និង៣០នាទីយប់ ។ នៅក្នុងរថយន្តដែលកំពុងធ្វើដំណើរតាមផ្លូវរាប់រយគីទ្បូម៉ែត្រ នគរបាលជំនាញព្រហ្មទណ្ឌបានសាកសួរឃាតករពីរឿងហេតុផលដែលឈានទៅដល់ការដាច់ចិត្តសម្លាប់ប្រពន្ធនិងកូនអាយុ៦ឆ្នាំ ហើយរហូតដល់យកសពទៅផ្លុងចោលនៅជ្រោះជើងភ្នំពេជ្រនិលនោះ ត្រូវបានលោកផ្កាយ២ គឹម ម៉ាវិន្ថា ឆ្លើយរៀបរាប់មិនទាន់ជាផ្លូវការថា «គាត់ខឹងភរិយាលោកនិយាយមិនស្តាប់ ដែលមានប្តីមានកូនហើយ ទៅស្រទ្បាញ់ប្រុសថ្មីដូចជាឈ្មោះ ហាក់ ម៉ៅ នោះម្នាក់ទៀត» ។ គាត់ថា «នេះមិនមែនជាស្នេហ៍លួចលាក់ទេ គឺគេដុតភ្លើងនៅនឹងមុខបែបនេះ សួរថាអ្នកណាមិនខឹង ហើយនិយាយមិនស្តាប់ទៅទៀត» ។
លោក ម៉ាវិន្ថា រៀបរាប់ថា «នៅយប់ថ្ងៃកើតហេតុ លោកនឹងភរិយាបានឈ្លោះទាស់ទែងវាយតប់គ្នាពីរឿងហ្នឹង ដែលពេលនោះប្រពន្ធក៏ជាមន្ត្រីយោធាពាក់ស័ក្តិ៣ដែរ ហើយគេចេះតែស្រវេស្រវារកកាំភ្លើង ធ្វើឱ្យលោកទ្រាំមិនបានក៏ស្ទុះទៅច្របាច់ក រហូតដល់ស្លាប់ ។ ចំណែកកូនស្រីអាយុ៦ឆ្នាំ ពេលគាត់២នាក់ប្តីប្រពន្ធឈ្លោះគ្នាវាស្រែកយំខ្លាំងៗ គាត់ក៏យកស្បោងប្លាស្ទីចច្រកដើម្បីកុំឱ្យយំ ភ្លេចខ្លួនមួួយសន្ទុះកូនស្រីនោះ ក៏ត្រូវស្លាប់ដែរ» ។ ឧក្រិដ្ឋជនរូបនេះ បាននិយាយរៀបរាប់ទាំងអួលដើមក ម្តងថាខ្លួនជាអ្នកសម្លាប់ប្រពន្ធនិងកូន ម្តងថាកូនប្រុសបង្កើតជាជនដៃដល់ ដោយទម្លាក់កំហុសទៅលើកូនប្រុសបង្កើតរបស់ប្រពន្ធមុនជាអ្នកប្រព្រឹត្ត ។ គាត់រៀបរាប់ថា «ពេលឃើញឪពុកនិងម្តាយចុងឈ្លោះគ្នា កូនប្រុសឈ្មោះ ស ធី ហៅ សែម គឹមរិទ្ធី អាយុ៣៣ឆ្នាំ បានស្ទុះទៅវាយនិងច្របាច់កប្រពន្ធគាត់ឱ្យស្លាប់ ព្រមទាំងច្រកកូនស្រីអាយុ៦ឆ្នាំ ក្នុងស្បោងប្លាស្ទីចឱ្យស្លាប់ដែរ នៅពេលវាយំខ្លាំង» ។ និយាយដល់ត្រង់នេះ លោក ម៉ាវិន្ថា ស្រក់ទឹកភ្នែកនិងប្រាប់ថា «បានជាកូនប្រុសដាច់ចិត្តច្របាច់កសម្លាប់ម្តាយចុងនោះ ព្រោះវាបានឃើញនឹងភ្នែកនូវទង្វើ ដែលលោកបានធ្វើ គឺត្រង់ចំណុចលុតជង្គង់ថ្វាយបង្គំប្រពន្ធ អង្វរឈប់ឱ្យទៅស្រទ្បាញ់ឈ្មោះ ហាក់ ម៉ៅ គឺចំណុចនេះហើយ ដែលកូនបានឈឺចាប់ជំនួសឪពុក ទើបឈានទៅដល់ការលើកដៃប្រហារជីវិតម្តាយនិងកូន» ។
លោក គឹម ម៉ាវិន្ថា បានលើកដៃជាប់ខ្នោះអង្វរទៅសមត្ថកិច្ច ក៏ដូចជាស្ថាប័នច្បាប់ មេត្តាដោះលែងកូនប្រសាឈ្មោះ ជា សំណាង ដែលកំពុងត្រូវបានតុលាការឃុំខ្លួននោះវិញទៅ ព្រោះកូនប្រសាគាត់គ្មានកំហុសទេ គេមិនបានដឹងអ្វីទេ គ្រាន់តែបានបញ្ជាពីឪពុកក្មេកឱ្យដឹកធុងដាក់សពយកទៅចោលប៉ុណ្ណោះ ។ នៅព្រឹកថ្ងៃទី១៤ កញ្ញា លោកឧត្តមសេនីយ៍ត្រី ទ្បឹក វណ្ណៈ បាននាំខ្លួនជនសង្ស័យជាឃាតករសម្លាប់ប្រពន្ធនិងកូន ព្រមទាំងជនជាប់ចោទក្លែងត្រា និងហត្ថលេខាលើឯកសារក្លែង៣នាក់ផងដែរ ទៅកាន់សាលាដំបូងរាជធានីភ្នំពេញ ដើម្បីជូនតំណាងអយ្យការធ្វើការចោទប្រកាន់តាមផ្លូវច្បាប់ ។ គួរបញ្ជាក់ថា សំណុំរឿងឃាតកម្មប្តីសម្លាប់ប្រពន្ធនិងកូនស្រីអាយុ៦ឆ្នាំខាងលើនេះ បានការជួយឧបត្ថម្ភគាំទ្រគ្រប់មធ្យោបាយ ពីសំណាក់អង្គភាពការពារកុមារ (CPU) នៃអង្គការមូលនិធិកុមារកម្ពុជា (CCF) ផងដែរ ។ គួរកត់សម្គាល់ថា ការចេញដីកាចាប់ខ្លួនបានកើតឡើងបន្ទាប់ពីលោកឧត្តមសេនីយ៍ត្រី ឡឹក វណ្ណៈ អនុប្រធាននាយកដ្ឋានព្រហ្មទណ្ឌក្រសួងមហាផ្ទៃ បាននាំជនសង្ស័យដែលចាប់ខ្លួនឈ្មោះ ជា សំណាង ជាកូនប្រសារបស់ឧត្តមសេនីយ៍ទោ គឹម ម៉ាវិន្ថា នាំទៅឆែកឆេរបន្ទប់ឪពុកក្មេក ដើម្បីពិនិត្យទីកន្លែងដែលសង្ស័យថាឃាតករធ្វើសកម្មភាពក្នុងបន្ទប់
នោះ ។
ការនាំខ្លួនជនសង្ស័យជាកូនប្រសាទៅពិនិត្យបន្ទប់ឪពុកក្មេកដែលជាប់ពាក់ព័ន្ធករណីឃាតកម្មនោះ បានប្រព្រឹត្តទៅកាលពីវេលាម៉ោង២រសៀល ថ្ងៃទី១២ សីហា ក្រោមការចូលរួមពីលោក កែវ សុជាតិ ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងសមត្ថកិច្ចមូលដ្ឋានផងដែរ ។ ការពិនិត្យកន្លែងធ្វើឃាតលើអ្នកស្រី វ៉ា ដារី និងកូនស្រី អាយុ៦ឆ្នាំ ឈ្មោះ គឹម ថាវិច្ចដា ត្រូវបានជនសង្ស័យឈ្មោះ ជា សំណាង នៅតែបដិសេធថា ខ្លួនមិនបានប្រព្រឹត្តផ្ទាល់ដៃទេ ដូច្នេះខ្លួនមិនបានដឹងអ្វីទាំងអស់ ខ្លួនគ្រាន់តែដឹកសពយកទៅបោះចោលនៅជ្រោះពេជ្រនិលតែប៉ុណ្ណោះ ដែលពេលនោះមិនបានដឹងថា ក្នុងធុងទឹកកកមានសាកសពមនុស្សផង ។ សមត្ថកិច្ចបានពិនិត្យបន្ទប់លោកឧត្តមសេនីយ៍ទោ គឹម ម៉ាវិន្ថា បានរកឃើញថង់បា្លស្ទិកដែលនៅសល់ពីការវេចខ្ចប់សាកសពប្រពន្ធនិងកូន ដែលនោះជាវត្ថុតាងរឹងមាំមួយទៀត ហើយត្រូវសមត្ថកិច្ចកំណត់ពិតប្រាកដថា បន្ទប់នោះជាកន្លែងធ្វើឃាតប្រពន្ធ និងកូន ។ គួរបញ្ជាក់ថា ប្តីប្រពន្ធ២នាក់នេះ មិនបានរៀបការនឹងគ្នាត្រឹមត្រូវទេ បានស្រឡាញ់គ្នាច្រើនឆ្នាំហើយ តែបានចុះអេតាស៊ីវិល និងមានកូនស្រីមួយជាមួយគ្នា ។ ស្ត្រីរងគ្រោះជាទាសីស្នេហាម្នាក់ ក្នុងចំណោមទាសីស្នេហាជាច្រើននាក់ទៀតរបស់ឧត្តមសេនីយ៍រូបនោះ ។
មុនការសម្លាប់ផងដែរ គឺនៅថ្ងៃទី១៤ កុម្ភៈ ប្តីប្រពន្ធនិងកូនស្រី បានធ្វើដំណើរទៅលេងផ្ទះឪពុកម្តាយនៅខេត្តកំពង់ចាម ដោយមានឈ្មោះ វ៉ា ភារ៉ា ភេទប្រុស អាយុ២៤ឆ្នាំ ជាប្អូនប្រុសជនរងគ្រោះទៅជាមួយដែរ ។ ពេលទៅដល់កំពង់ចាម លោកឧត្តមសេនីយ៍ទោ គឹម ម៉ាវិន្ថា បានយកទូរស័ព្ទដៃបើកសំឡេង ចាក់រូបភាពឱ្យឪពុកម្តាយមើលពីរឿងប្រពន្ធមានស្នេហាជាមួយបុរសឈ្មោះ ហាក់ ម៉ៅ ដើម្បីជាភស្តុតាងឱ្យម្តាយឪពុកដឹងថា ប្រពន្ធមានប្រុសថ្មី ។ លុះដល់ម៉ោងប្រមាណ១១ព្រឹកថ្ងៃ ទី១៥ កុម្ភៈ ពួកគេបានវិលមកភ្នំពេញ ។ ដោយឡែកឈ្មោះ វ៉ា ភារា៉ មិនបានមកជាមួយទេ ។ ពេលមកដល់ភ្នំពេញប្រពន្ធប្រាប់ប្តីថា នាំកូនទៅផ្សារសុវណ្ណា រកទិញវ៉ែនតា បន្ទាប់មកទៀត ប្រពន្ធនិងកូនបានទៅផ្សារសូរិយារហូតយប់ទើបបានវិលចូលផ្ទះវិញ ។
ស្រាប់តែនៅវេលារសៀលម៉ោង៣និង៣០នាទីថ្ងៃទី២១ មីនា ស្ត្រីជាប្រពន្ធនិងកូនស្រីត្រូវគេប្រទះឃើញសពត្រូវឃាតករសម្លាប់ច្រកថង់ប្លាស្ទិកយកទៅទម្លាក់ចោលនៅជ្រោះពេជ្រនិលចម្ងាយ៦០ម៉ែត្រពីអាស្រមលោកយាយម៉ៅ ។ សមត្ថកិច្ចបានពិនិត្យសព ពេលនោះរកឃើញកាបូបដៃមួយមានអត្តសញ្ញាជនរងគ្រោះក៏បានផ្តល់ដំណឹងដល់សាច់ញាតិ ហើយអ្វីកាន់តែធ្វើឱ្យសមត្ថកិច្ចចាប់អារម្មណ៍នោះត្រង់ថា នៅក្នុងខោទ្រនាប់ជនរងគ្រោះមានផ្ការំយោលស្រស់២.៣សន្លឹក ដែលផ្កានោះ ឃើញមាននៅក្នុងបន្ទប់លោកឧត្តមសេនីយ៍ គឹម មា៉វិន្ថា ដែលអាចឱ្យសន្និដ្ឋានបានថា ជនរងគ្រោះមុនដាច់ខ្យល់ស្លាប់ស្រវេស្រវាទាញបោចផ្កានោះញ៉ុកចូលក្នុងខោទ្រនាប់ទុកជាភស្តុតាងដល់ការសើុបអង្កេត ។
តាំងពីថ្ងៃកើតហេតុ លោកឧត្តមសេនីយ៍ គឹម មា៉វិន្ថា នាំស្រីក្មេងម្នាក់ចេញទៅក្រេបទឹកឃ្មុំនៅក្រៅប្រទេសបាត់រហូត ដែលតាមដំណឹងពេលនោះថា គឹម ម៉ាវិន្ថា ទៅស្នាក់នៅលួចលាក់ក្នុងប្រទេសថៃ ៕
ចែករំលែកព័តមាននេះ