ខេត្តព្រៃវែង ៖ បើគ្មានអ្វីប្រែប្រួលនោះទេ បុរសពីរនាក់បងប្អូនបង្កើតដែលធ្វើទារុណកម្មវាយដំ និងចាប់ក្បាលក្មេងប្រុសម្នាក់ជ្រមុជចូលទឹកពាង ព្រោះតែលួចបេះដូង នឹងត្រូវសមត្ថកិច្ចបញ្ជូនទៅសាលាដំបូងខេត្តចាត់ការតាមផ្លូវច្បាប់នៅព្រឹកថ្ងៃទី៣០ សីហា ២០១៤ ។
ជនដៃដល់ពីរនាក់ ដែលធ្វើទារុណកម្ម ដ៏ឃោរឃៅចាប់ចងដៃ និងចាប់ក្បាលជ្រមុជទឹកពាង ទៅលើក្មេងប្រុសម្នាក់ដោយគ្រាន់តែក្មេងនោះលួចបេះដូង បានត្រូវសមត្ថកិច្ចចាប់ខ្លួនបាននៅយប់ ថ្ងៃទី២៨ សីហា ២០១៤ នៅក្នុងភូមិ-ឃុំកំពង់ពពិល ស្រុកពារំាង ។
ជនដៃដល់ទំាងពីរនាក់នោះ ម្នាក់ឈ្មោះ ហេង ដាណេ អាយុ៣៥ឆ្នាំ និង ម្នាក់ទៀតឈ្មោះ ហេង វណ្ណី អាយុ ២៨ឆ្នាំ ទំាងពីរនាក់រស់ នៅក្នុងភូមិ-ឃុំកើតហេតុខាងលើ ។ ចំណែកក្មេងប្រុសរងគ្រោះឈ្មោះ ម៉ុន វាសនា ហៅទិត្យ អាយុ១៤ឆ្នាំ ។
គួរបញ្ជាក់ថា ការចាប់ខ្លួនជនដៃដល់ទំាងពីរនាក់នេះ បានធ្វើឡើងប៉ុន្មានម៉ោងប៉ុណ្ណោះ បន្ទាប់ពីជនសង្ស័យបានធ្វើសកម្មភាពចាប់ធ្វើទារុណកម្មក្មេងប្រុសរងគ្រោះនៅម៉ោង៣រសៀលថ្ងៃទី២៨ សីហាម្សិលមិញ និង បានបង្ហោះក្នុងបណ្តាញទំនាក់ទំនងសង្គម ( Facebook )របស់ខ្លួន ហើយត្រូវបានគេផ្សព្វផ្សាយបន្តគ្នា និងស្នើឲ្យសមត្ថកិច្ចតាមចាប់ជនដៃដល់ដែលបានប្រើអំពើឃោរឃៅដូចក្នុងរបបខ្មែរក្រហមរូបនោះ ៕
ចែករំលែកព័តមាននេះ