ខេត្តសៀមរាប ៖ ទីបំផុតទៅជនសង្ស័យដែលច្របាច់.កសម្លាប់ស្រ្តីជាគូកំណាន់របស់ខ្លួននៅបន្ទប់ផ្ទះសំណាក់អង្គរទិព្វ ក្នុងក្រុងសៀមរាបកាលពី០៨ កក្កដានោះ ត្រូវសមត្ថកិច្ចចាប់ខ្លួនបានហើយនៅម៉ោង០៩ព្រឹកថ្ងៃទី១៣ កក្កដា ២០១៤ នៅចំណុចភូមិចំការគោ ឃុំដា ស្រុកមេមត់ ខេត្តកំពង់ចាម ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សំដីសមត្ថកិច្ចឲ្យដឹងថា ជនសង្ស័យឈ្មោះ បា្រក់ សុផល អាយុ២៧ឆ្នាំ មុខរបរជាកសិករ រស់នៅភូមិក្រឡាមាឃ ឃុំត្នោត ស្រុកកញ្ចៀច ខេត្តព្រៃវែង ហើយមូលហេតុដែលនំាដល់ការធ្វើឃាតស្រីកំណាន់របស់ខ្លួននោះដោយសារការប្រចណ្ឌ ។
គួររំលឹកថា ស្ត្រីម្នាក់ត្រូវបានបុរសម្នាក់ដែលគេមិនដឹងថា មានការទាក់ទងក្នុងស្ថានភាពបែបណានោះទេ បានច្របាច់.កសម្លាប់នាងនៅក្នុងផ្ទះសំណាក់អង្គរទិព្វ ដែលស្ថិតនៅកណ្តាលក្រុងសៀមរាបនៅជាន់ទី២ ក្នុងបន្ទប់លេខ២០៥ ធ្វើឱ្យមានការភ្ញាក់ផ្អើលដល់សមត្ថកិច្ច កាលពីវេលាម៉ោង១០ព្រឹកថ្ងៃទី០៩ កក្កដា ។
ផ្ទះសំណាក់នេះមានទីតាំងស្ថិតនៅក្រុមទី២ ភូមិស្លក្រោម សង្កាត់ស្លក្រាម ក្រុងសៀមរាប ។ ការឆោឡោជុំវិញហេតុការណ៍នេះ បន្ទាប់ពីអ្នកមើលការខុសត្រូវក្នុងផ្ទះសំណាក់ឃើញទ្វារបន្ទប់ចំហ ក៏ពិនិត្យមើលឃើញស្ត្រីរងគ្រោះដេកស្លាប់លើគ្រែពូក ទើបមានការភ្ញាក់ផ្អើល ។ បើតាមសំដីរបស់បុរសអ្នករត់ម៉ូតូឌុបដែលផ្តល់ព័ត៌មានដល់សមត្ថកិច្ចឲ្យដឹងថា គាត់បានឌុបមនុស្សប្រុសម្នាក់ និងស្ត្រីដែលស្លាប់បានហៅជិះពីស្ពានថ្មខាងជើង មកចូលផ្ទះសំណាក់អង្គរទិព្វ រួចបានប្រាប់គាត់ជាអ្នករត់ម៉ូតូឌុបថា ឱ្យរង់ចាំឌុបបន្តទៅទៀត ។
តាមអ្នករត់ម៉ូតូឌុបថា ប្រហែល២ម៉ោងក្រោយមក គេឃើញបុរសដែលខ្លួនបានឌុបចុះមកពីផ្ទះសំណាក់ ប៉ុន្តែមិនបានឃើញស្ត្រីចុះមកជាមួយទេ ហើយមនុស្សប្រុសនោះបានឱ្យខ្លួនឌុបបន្តសំដៅមកទិសខាងកើតតាមផ្លូវជាតិលេខ៦ មកដល់កន្លែងបញ្ចូលហ្គាសម៉ាស៊ីនត្រជាក់ ដែលមានយីហោបាត់ដំបង មានទីតាំងស្ថិតនៅភូមិបន្ទាយចាស់ សង្កាត់ស្លក្រាម បុរសនោះក៏ចុះពីលើម៉ូតូឱ្យលុយគ្រប់ចំនួន រួចក៏បែកគ្នាទៅ ។ លុះក្រោយមកនៅម៉ោងប្រមាណជា១០ព្រឹក ក្នុងថ្ងៃដដែល ក៏មានការភ្ញាក់ផ្អើលពីម្ចាស់ផ្ទះសំណាក់អង្គរទិព្វ ដែលបានផ្តល់ព័ត៌មានដល់សមត្ថកិច្ចថា មានមនុស្សស្រីម្នាក់ស្លាប់នៅក្នុងបន្ទប់ បន្ទាប់ពីមានប្រុសយកនាងមកដេក ។
លោកវរសេនីយ៍ត្រី នុល រ៉ុង នាយរងការិយាល័យព្រហ្មទណ្ឌកម្រិតធ្ងន់ បានប្រាប់កោះសន្តិភាពតាមទូរស័ព្ទនៅល្ងាចថ្ងៃទី៩ កក្កដាថាស្ត្រីរងគ្រោះដែលស្លាប់នៅក្នុងផ្ទះសំណាក់អង្គរទិព្វ មានឈ្មោះ ភា ចាន់ទី អាយុ២៦ឆ្នាំ មានស្រុកកំណើតនៅខេត្តឧត្តរមានជ័យ បច្ចុប្បន្ន ស្នាក់នៅភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប ។ បើតាមការសន្និដ្ឋានរបស់សមត្ថកិច្ច គឺជាករណីឃាតកម្មគិតទុកជាមុនរបស់បុរសជាដៃគូនោះ ដោយច្របាច់.កសម្លាប់ ៕
ចែករំលែកព័តមាននេះ