រាជធានីភ្នំពេញ ៖ ថ្ងៃទី ៤ ខែវិច្ឆិកា ឆ្នាំ ២០២៦ ម៉ូតូមួយគ្រឿងដែលរចនា និងផលិតនៅប្រទេសកម្ពុជា ត្រូវបានដាក់តាំងបង្ហាញ ក្នុងសប្តាហ៍នេះ នៅការតាំងពិព័រណ៍ EICMA ក្នុងទីក្រុងមីឡាន ប្រទេសអ៉ីតាលី ដែលជាពិព័រណ៍ម៉ូតូដ៏ធំបំផុតមួយលំដាប់អន្ដរជាតិ ។ ម៉ូតូ Calypso Xplorer មិនត្រូវបានដឹកជញ្ជូន តាមនាវានោះឡើយ ពោលម៉ូតូស៊េរីថ្មីនេះ ត្រូវបានជិះផ្ទាល់ពីរាជធានីភ្នំពេញ ទៅកាន់ទីក្រុងមីឡាន ។ ក្រុមហ៊ុន Calypso Motors បានឱ្យដឹងថា នេះគឺជាលើកទី ១ សម្រាប់ម៉ូតូដែលផលិតនៅកម្ពុជា ដែលធ្វើដំណើររាប់ម៉ឺនគីឡូម៉ែត្រ និងបង្ហាញខ្លួននៅក្នុងព្រឹត្ដិការណ៍អន្ដរជាតិ ។
ទូតសុឆន្ទៈតំណាងឱ្យក្រុមហ៊ុន Calypso គឺលោក Frost ZK បានចេញដំណើរពីរាជធានីភ្នំពេញ នៅថ្ងៃទី ១៨ ខែកក្កដា ឆ្នាំ ២០២៦ ។ ក្នុងរយៈពេលជាង ៣ខែកន្លងមកនេះ លោកបានជិះម៉ូតូ Calypso Xplorer ក្នុងចម្ងាយជាង ១៦០០០ គីឡូម៉ែត្រ និងឆ្លងកាត់ប្រទេសចំនួន ១៥ ដោយធ្វើដំណើរឆ្លងកាត់តំបន់អាស៊ី អាស៊ីកណ្តាល និងអឺរ៉ុប មុនពេលទៅដល់ទីក្រុងមីឡាន ប្រទេសអ៉ីតាលី ។ ម៉ូតូដែលបានប្រើប្រាស់ក្នុងការធ្វើដំណើរនេះ កំពុងត្រូវបានដាក់តាំងបង្ហាញនៅស្តង់របស់ក្រុមហ៊ុន Calypso Motors ក្នុងពិព័រណ៍ EICMA ដែលនឹងប្រព្រឹត្តទៅដល់ ថ្ងៃទី ៨ ខែវិច្ឆិកា ឆ្នាំ ២០២៦ ។ សម្រាប់ក្រុមហ៊ុនផលិតទោចក្រយានយន្ដខ្មែរមួយនេះ ការធ្វើដំណើរនេះ មានអត្ថន័យដ៏ធំធេង លើសពីការធ្វើដំណើររបស់ម៉ូតូមួយគ្រឿងទៅទៀត ។
លោក Ivan Ting នាយកប្រតិបត្តិក្រុមហ៊ុន Calypso Motors បានមានប្រសាសន៍ថា ៖ “ជាមួយនឹងវិស្វករកម្ពុជាជំនាន់ថ្មី យើងកំពុងបង្ហាញឱ្យពិភពលោក ឱ្យបានឃើញពីសមត្ថភាពរបស់ពួកគេ ។ កម្ពុជាលែងជាប្រទេស ដែលគ្រាន់តែទិញម៉ូតូពីបរទេសទៀតហើយ ។ យើងក៏មានសមត្ថភាពផលិតម៉ូតូ ដែលមានគុណភាពល្អបានដែរ ហើយយើងចង់បង្ហាញឱ្យពិភពលោកបានឃើញថា យុវជនជំនាន់ថ្មីរបស់កម្ពុជា មានសមត្ថភាពធ្វើអ្វីបានខ្លះ ។
បើកទទួលការកក់ទុកមុន នៅក្នុងប្រទេសកម្ពុជា
នៅប្រទេសកម្ពុជា ក្រុមហ៊ុន Calypso Motors បានចាប់ផ្តើមទទួលការចុះឈ្មោះកក់ទុកមុនរួចហើយ ដោយសារតែម៉ូតូផលិតលើកដំបូងនេះ មានចំនួនកំណត់ ។ ពិធីសម្ពោធជាផ្លូវការនឹងប្រព្រឹត្តទៅនៅថ្ងៃសុក្រ ទី ១៣ ខែវិច្ឆិកា ឆ្នាំ ២០២៦ នៅមជ្ឈមណ្ឌលតាំងបង្ហាញម៉ូតូថ្មី ដែលក្រុមហ៊ុន Calypso Motors សហការបើកជាមួយ VM Motorshop ដែលមានទីតាំងស្ថិតនៅជិតផ្សារដេប៉ូ ក្នុងខណ្ឌទួលគោក រាជធានីភ្នំពេញ ។ កម្មវិធីនេះ នឹងរៀបចំឡើងនៅពេលល្ងាច ក្រោមប្រធានបទ «Fresh from Milan» (មកថ្មីៗពីទីក្រុងមីឡាន) ដោយមានការចូលរួមពីតំណាងចែកចាយទាំង ៨ របស់ក្រុមហ៊ុន Calypso Motors បណ្ដាដៃគូសហការ និងអ្នកសារព័ត៌មាន ។
អតិថិជន អាចធ្វើការកក់ទុកមុនសម្រាប់ម៉ូតូ Calypso Xplorer ដោយគ្រាន់តែបង់ប្រាក់កក់ចំនួន ១០០ ដុល្លារអាមេរិក ប៉ុណ្ណោះ ។ ក្នុងអំឡុងពេលនៃការកក់ទុកមុន ដែលនឹងបញ្ចប់នៅថ្ងៃទី ៣១ ខែធ្នូ ឆ្នាំ ២០២៦ ម៉ូតូនេះមានតម្លៃពិសេសត្រឹមតែ ២,៩៨០ ដុល្លារអាមេរិក ប៉ុណ្ណោះ ។ បន្ទាប់ពីផុតរយៈពេលកក់ទុកមុននេះ តម្លៃលក់ផ្លូវការរបស់ម៉ូតូ Calypso Xplorer នឹងលក់ក្នុងតម្លៃដើម ៣,២៨០ ដុល្លារអាមេរិក ។ សម្រាប់ការប្រគល់ម៉ូតូ នឹងប្រព្រឹត្ដទៅ នៅក្នុងខែធ្នូ ដែលមានចំនួនកំណត់ត្រឹមតែ ៦០ គ្រឿងប៉ុណ្ណោះ ដោយផ្តល់អាទិភាពជូនអតិថិជន ដែលបានកក់មុន តាមលំដាប់មុនក្រោយ ។
ម៉ូតូ Calypso Xplorer ស៊េរីថ្មីទាំងស្រុង
ម៉ូតូ Calypso Xplorer គឺជាម៉ូតូប្រភេទ Adventure Scooter លេខអូតូ ដែលមានកម្លាំងម៉ាស៊ីន 180cc ជាមួយនឹងការរចនារូបរាងថ្មីទាំងស្រុង ដើម្បីជំនួសម៉ូដែល Xplorer 150 ជំនាន់មុនរបស់ក្រុមហ៊ុន ។ ម៉ូតូនេះ បំពាក់ដោយម៉ាស៊ីន ភ្ជាប់ជាមួយប្រព័ន្ធទឹកស្អុំបញ្ចុះកម្ដៅ និងប្រព័ន្ធបាញ់ប្រេងឥន្ធនៈ Bosch មកពីប្រទេសអាល្លឺម៉ង់ ព្រមទាំងប្រព័ន្ធហ្វ្រាំង ABS ប្រព័ន្ធគ្រប់គ្រងការរអិលកង់ (Traction Control) និងអេក្រង់ឆ្លាតវៃ Touchscreen ។ លើសពីនេះ ម៉ូតូ Calypso Xplorer ក៏ត្រូវបានបំពាក់ដោយប្រព័ន្ធសុវត្ថិភាពឆ្លាតវៃ Startec Intelligent Safety (SI) ដែលអាចផ្ញើសារជូនដំណឹង នៅពេលមានគ្រោះថ្នាក់ និងអនុញ្ញាតឱ្យម្ចាស់ម៉ូតូ អាចបញ្ជាពន្លត់ម៉ាស៊ីន ពីចម្ងាយតាមរយៈទូរស័ព្ទដៃ ក្នុងករណីម៉ូតូត្រូវបានលួច នៅពេលម៉ូតូចតដោយសុវត្ថិភាព ផងដែរ។ ម៉ូតូនេះម៉ូដែលនេះ មានជម្រើសពណ៌ចំនួន ២ គឺ ពណ៌ខ្មៅ និងពណ៌ស ។
អំពីក្រុមហ៊ុន Calypso Motors
ក្រុមហ៊ុន Calypso Motors ត្រូវបានបង្កើតឡើងក្នុងឆ្នាំ ២០២២ និងជាក្រុមហ៊ុនផលិតម៉ូតូដំបូងគេ នៅប្រទេសកម្ពុជា ។ ក្រុមហ៊ុនផលិតទោចក្រយានយន្ដខ្មែរមួយនេះ មានជំនាញក្នុងការរចនា និងដំឡើងម៉ូតូ នៅរាជធានីភ្នំពេញ ដោយផ្តោតសំខាន់លើសុវត្ថិភាពរបស់បើកបរ និងការបំពាក់បច្ចេកវិទ្យាឆ្លាតវៃ ដែលត្រូវបានរចនាឡើងឱ្យសមស្របនឹងស្ថានភាពផ្លូវថ្នល់នៅប្រទេសកម្ពុជា ៕ អត្ថបទសហការ
ចែករំលែកព័តមាននេះ