ខេត្តកំពង់ធំ ៖ លោកជំទាវអគ្គមហាឧបាសិកា ពុទ្ធសាសនូបត្ថម្ភក៍ ខៀវ ស៊ីណា បានវេរបុណ្យកុសល ដែលកើតចេញពីពិធីបុណ្យកាន់បិណ្ឌថ្ងៃទី១ ឆ្នាំនេះ ឧទ្ទិស ជូនចំពោះដួងវិញ្ញាណក្ខន្ធវិរយុទ្ធជនកម្ពុជា ដែលពលីជីវិតក្នុងបុព្វហេតុការពារជាតិមាតុភូមិ និងប្រជាជនកម្ពុជា ដែលប៉ះទង្គិចក្នុងជម្លោះ ព្រំដែនកម្ពុជា-ថៃ ។
លោកជំទាវអគ្គមហាឧបាសិកា ខៀវ ស៊ីណា ជា ចាន់តូ បានលើកឡើងក្នុងពិធីចូលរួម កាន់បិណ្ឌទី១ ជាមួយប្រជាពុទ្ធបរិស័ទចំណុះជើងវត្ត ដែលបានប្រារព្ធធ្វើនៅវត្តមួយចំនួនស្ថិត នៅស្រុកសន្ទុក ខេត្តកំពង់ធំ នៅថ្ងៃទី២៧ ខែកញ្ញា ឆ្នាំ២០២៦ នេះថា ជុំវិញបុណ្យកាន់បិណ្ឌនិងភ្ជុំបិណ្ឌនេះ គឺជាពិធីបុណ្យបែបព្រះពុទ្ធសាសនាធំជាងគេនៅកម្ពុជា មាន ប្រវត្តិជាយូរលង់ណាស់មកហើយ, ពិធីបុណ្យនេះគឺបានចាប់ផ្តើនពីថ្ងៃ ១ រោច ដល់ថ្ងៃ ១៥ រោច ខែភទ្របទ ។ ពិធីបុណ្យនេះមាន សារៈសំខាន់ណាស់ សម្រាប់ប្រជារាស្ត្រខ្មែរបានមកធ្វើបុណ្យទាន សម្តែងនូវកតញ្ញូ ចំពោះអ្នកមានគុណ ឧទ្ទិសកុសលជូនបុព្វការីជន និងញាតិការគ្រប់សន្តាន ដែលទទួលមរណកាលទៅហើយ និងជាឱកាសបានជួបជុំ ក្រុមគ្រួសារសាច់ញាតិ ដែលកំពុងរស់នៅ ទីជិតឆ្ងាយ និងជួយទំនុកបម្រុងដល់ព្រះសង្ឃ ដែលគង់ចាំព្រះវស្សាអស់រយៈកាលត្រីមាស ។
លោកជំទាវអគ្គមហាឧបាសិកាលើកឡើងបន្តថា ក្រៅពីការឧទ្ទិសកុសលជូនបុព្វការីជនសាច់សារលោហិត ក្នុងនោះអ្វីដែលយើងមិនអាចបំភ្លេច បាន គឺគុណបំណាច់ និងការលះបង់ដ៏ធំធេងរបស់វិរយុទ្ធជនកម្ពុជាយើង ។ ដូចនេះសូមបុណ្យកុសល ដែលបានធ្វើឡើងនៅក្នុង ថ្ងៃបិណ្ឌទី១នេះ ជូនដល់ដួងវិញ្ញាណក្ខន្ធយុទ្ធជន យុទ្ធនារីស្នេហាជាតិ ដែលពលីជីវិតក្នុងបុព្វហេតុជាតិមាតុភូមិគ្រប់សម័យកាល និងជាពិសេសចំពោះវិរយុទ្ធជនដែលបានពលីជីវិតលើកិច្ចការការពាទឹកដី លើការប៉ះទង្គិចពីជម្លោះព្រំដែនកម្ពុជា-ថៃនា ពេលថ្មីៗនេះ, សូមឲ្យមនុញ្ញផលជូនដល់វិញ្ញាណក្ខន្ធ អស់លោកទាំងនោះ បានសោយសុខនាឋានបរមសុខកុំបីឃ្លៀងឃ្លាតឡើយ ។
ហើយមួយចំណែកទៀត សូមបុណ្យកុលនេះជួយតាមថែរក្សាឃុំគ្រោង ដល់វិរយុទ្ធជនកំពុងឈរជើងការពារមាតុភូមិ ទាំងអស់ទទួលបានសុខភាពល្អបរិបូរណ៍ ប្រកបដោយកំលាំងរឹងមាំ ខ្លាំងក្លា ដើម្បីបន្តបំពេញភារកិច្ចដ៏ឧត្ដង្គឧត្ដមជូនជាតិ មាតុភូមិនិងប្រជាជនកម្ពុជា ព្រមទាំងបានបួងសួង សូមឱ្យមនុញ្ញផលកើតចេញពីបុណ្យ ផ្ដល់នូវ សេចក្ដីសុខចម្រុងចម្រើន ដល់ថ្នាក់ជាតិគ្រប់លំដាប់ថ្នាក់ផងដែរ ។
នៅក្នុងឱកាសថ្ងៃកាន់បិណ្ឌទី១នេះដែរ, លោកជំទាវអគ្គមហាឧបាសិកាខៀវ ស៊ីណា ជាចាន់តូ ក៏បានវេរបច្ច័យដែលកើតចេញពីទឹកចិត្តប្រកប ដោយសុទ្ធា ប្រគេនចំពោះព្រះសង្ឃសម្រាប់ទ្រទ្រង់ក្នុងពិធីបុណ្យកាន់បិណ្ឌ និងបានប្រគេនទយ្យវត្ថុគ្រឿង បរិក្ខាមួយចំនួនដល់វត្ត ចំនួន៥ ក្នុងនោះមានវត្តសង់ឃ្លាំង វត្តកំពង់ថ្ម, វត្តតាំងក្រសាំង, វត្តធម្មនាថនិងវត្តសន្ទុកក្រៅមួយៗ វត្តចំនួន ១ លាន ៕ អត្ថបទសហការ
ចែករំលែកព័តមាននេះ