រាជធានីភ្នំពេញ ៖ សហជីពធំៗនៅកម្ពុជា ដែលតំណាងឱ្យកម្មករនិយោជិតរាប់ម៉ឺននាក់ បានលើកឡើងថា ការជំរុញឱ្យមានការដំឡើងប្រាក់ឈ្នួលអប្បបរមា សម្រាប់កម្មករនិយោជិតក្នុងផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ…
រាជធានីភ្នំពេញ ៖ សហជីពធំៗនៅកម្ពុជា ដែលតំណាងឱ្យកម្មករនិយោជិតរាប់ម៉ឺននាក់ បានលើកឡើងថា ការជំរុញឱ្យមានការដំឡើងប្រាក់ឈ្នួលអប្បបរមា សម្រាប់កម្មករនិយោជិតក្នុងផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ក្នុងកម្រិតខ្ពស់ហួសប្រមាណនឹងក្លាយជាការបំផ្លាញឆ្នាំងបាយកម្មករ ។
លោក សំ សឿន ប្រធានសហភាពពលកម្មជាតិកម្ពុជា លើកឡើងថា ការដំឡើងប្រាក់ឈ្នួលគោលក្នុងកម្រិតមួយខ្ពស់ហួសប្រមាណនឹងធ្វើឱ្យមានការប៉ះពាល់ដល់ការវិនិយោគជាមិនខាន ពោលគឺអ្នកវិនិយោគចាស់នឹងធ្វើការផ្លាស់ប្តូរចេញទៅកាន់ប្រទេសផ្សេង ហើយអ្នកវិនិយោគថ្មីក៏មិនអាចធ្វើការវិនិយោគមកកាន់ប្រទេសដែលមានប្រាក់ឈ្នួលខ្ពស់ហួសប្រមាណនោះដែរ ។ លោកថ្លែងថា ៖ «ការដំឡើងប្រាក់ឈ្នួលខ្ពស់អាចប្រឈមការបាត់បង់ឱកាសការងារ របស់បងប្អូនកម្មករនិយោជិត ហើយវាហាក់បីដូចជា វាយបំបែកឆ្នាំងបាយកម្មករនិយោជិតទៀតផង ។ ចំពោះមុខ អ្វីដែលល្អបំផុតគឺការដំឡើងប្រាក់ឈ្នួលដែលអាចឱ្យកម្មករនិយោជិតអាចមានប្រាក់ចំណូលរស់នៅសមរម្យ អាចរក្សាបាននូវឱកាសការងារ និងរក្សាបាននូវបរិយាកាសកល្អសម្រាប់អ្នកវិនិយោគទាំងចាស់ ទាំងថ្មីបន្ថែមទៀតមកកម្ពុជា» ។
ជាមួយគ្នានេះ លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា គាំទ្រការដំឡើងប្រាក់ឈ្នួលសម្រាប់កម្មករនិយោជិត ក្នុងកម្រិតមួយប្រកបទៅដោយ ការថ្លឹងថ្លែងស្រាលធ្ងន់ច្បាស់លាស់ ធ្វើយ៉ាងណារក្សាបានលំនឹងនៃការវិនិយោគ ហើយថែមទាំងអាចទាក់ទាញបានអ្នកវិនិយោគថ្មីមកបន្ថែមទៀតកាន់តែច្រើន សំដៅធ្វើឱ្យការដំឡើងប្រាក់ឈ្នួលបានកាន់តែខ្ពស់ សេដ្ឋកិច្ចជាតិកាន់តែប្រសើរ ជីវភាពពលរដ្ឋធូរធារ ។ លោកថ្លែងថា ៖ «យើងមើលឃើញថា ការដំឡើងប្រាក់ឈ្នួលរាល់ៗឆ្នាំ ក៏ដូចជាការធ្វើសកម្មភាពផ្សេងៗនេះ ជាការត្រៀមទាក់ទាញវិនិយោគបន្ថែមកាន់តែច្រើនមកកាន់កម្ពុជា កាន់តែធំជាងមុន ហើយនៅពែលនោះហើយដែលយើងនឹងទទួលបានអត្ថប្រយោជន៍ ក៏ដូចជាប្រាក់ឈ្នួលបងប្អូនកម្មករនិយោជិតកាន់តែខ្ពស់បន្ថែមទៀត» ។
ទន្ទឹមនេះ លោក ទុយ កុសល ប្រធានសហព័ន្ធសហជីពរួបរួមអភិវឌ្ឍន៍កម្មករ លើកឡើងថា ការដំឡើងប្រាក់ឈ្នួលតិចឬច្រើនមិនសំខាន់ទេ តែអ្វីដែលសំខាន់គឺការរក្សាបាននូវលំនឹងការងារ រក្សាបានអ្នកវិនិយោគចាស់ បន្ថែមអ្នកវិនិយោគថ្មី ជាពិសេស គឺផ្តល់ឱកាសការងារជូនដល់បងប្អូនអតីតពលករទើបមកពីប្រទេសថៃ ។ លោកបញ្ជាក់ថា៖ «បើយើងទាមទារដំឡើងប្រាក់ឈ្នួលគោលខ្ពស់ហួសប្រមាណពេក សហគ្រាស ក្រុមហ៊ុន រោងចក្រ គេអាចនឹងរើចេញពីកម្ពុជា យើង អ៊ីចឹងមានខុសអីពីការបោកបំផ្លាញឆ្នាំងបាយកម្មករ។ តែបើការដំឡើងសមស្របទៅតាមស្ថានភាពសេដ្ឋកិច្ចដែលទទួលយកបានទាំងអស់គ្នា គឺជារឿងល្អ ហើយក៏អាចទាក់ទាញបានអ្នកវិនិយោគថ្មីៗបន្ថែមដែរ» ៕ អត្ថបទសហការ
ចែករំលែកព័តមាននេះ