រាជធានីភ្នំពេញ ៖ នាយកដ្ឋានពេទ្យការងារ នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយអង្គការអាហ្វីដាប្រចាំកម្ពុជា (APHEDA) បានរៀបចំសិក្ខាសាលាផ្សព្វផ្សាយស្តីពី «ការយល់ដឹងអំពីសារធាតុអាសបេស្តុស» ដល់សមាគមនិយោជក…
រាជធានីភ្នំពេញ ៖ នាយកដ្ឋានពេទ្យការងារ នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយអង្គការអាហ្វីដាប្រចាំកម្ពុជា (APHEDA) បានរៀបចំសិក្ខាសាលាផ្សព្វផ្សាយស្តីពី «ការយល់ដឹងអំពីសារធាតុអាសបេស្តុស» ដល់សមាគមនិយោជក រយៈពេលពីរថ្ងៃនៅសណ្ឋាគារ Fairfield by Marriott Phnom Penh និងសណ្ឋាគារកាំបូឌីយ៉ាណា ចាប់ពីថ្ងៃទី ៣០ ដល់ថ្ងៃទី ៣១ ខែកក្កដា ឆ្នាំ ២០២៥។
កម្មវិធីសិក្ខាសាលានេះ ត្រូវបានរៀបចំឡើងក្រោមអធិបតីភាពឯកឧត្ដម ហ៊ុយ ហានសុង រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ និងថ្នាក់ដឹកនាំនៃក្រសួងការងារ និងបណ្ដុះបណ្ដាលវិជ្ជាជីវៈ ដែលមានវាគ្មិនកិត្តិយសលោកស្រី Julia Collin នាយិកាទីភ្នាក់ងារសុវត្ថិភាព និងលុបបំបាត់សារធាតុអាសបេស្តុស និងស៊ីលីកា លោក Adam Kaminski ជាមន្ត្រីសម្របសម្រួលយុទ្ធនាការអាសបេស្តុសអន្តរជាតិ តំណាងអង្គការអាហ្វីដាប្រចាំកម្ពុជា តំណាងសមាគមនិយោជក ព្រមទាំងមន្ត្រីអធិការកិច្ចសុវត្ថិភាព និងសុខភាពការងារនៃនាយកដ្ឋានពេទ្យការងារសរុបចំនួន ៦០នាក់ ។
សិក្ខាសាលានេះ រៀបចំឡើងក្នុងគោលបំណងលើកកម្ពស់ការយល់ដឹងពីហានិភ័យនៃសារធាតុអាសបេស្តុស និងចូលរួមសកម្មភាពនានា ដើម្បីកាត់បន្ថយការប្រើប្រាស់សារធាតុអាសបេស្តុសនៅតាមសហគ្រាស គ្រឹះស្ថាន ដែលជាផ្នែកយ៉ាងសំខាន់ក្នុងការចែករំលែកចំណេះដឹងពាក់ព័ន្ធទៅនឹងសារធាតុអាសបេស្តុស និងផ្សព្វផ្សាយអំពីគុណសម្បត្តិ គុណវិបត្តិនៃផលប៉ះពាល់របស់សារធាតុអាសបេស្តុសលើសុខភាពរបស់មនុស្សដែលងាយរងគ្រោះដូចជា កម្មករនិយោជិតដែលធ្វើការនៅក្នុងវិស័យសំណង់ ។
ក្នុងកម្មវិធីនោះ នាយកដ្ឋានពេទ្យការងារនៃក្រសួងការងារ និងបណ្តុះបណ្តាលវិជ្ជាជីវៈ ក៏បានរៀបចំឱ្យមានកិច្ចពិភាក្សាជាក្រុម ដើម្បីសំយោគរិះរកចំណុចសំខាន់ៗ ដែលមានសមាជិកក្រុមមកពីតំណាងសមាគមនិយោជក និងក្រុមបច្ចេកទេសផ្នែកសុវត្ថិភាព និងសុខភាព ក្នុងការពិភាក្សាពីហានិភ័យសារធាតុអាសបេស្តុសតាមវិស័យនីមួយៗ និងរៀបចំផែនការសកម្មភាពការពារហានិភ័យ និងកាត់បន្ថយការប្រើប្រាស់សារធាតុអាសបេស្តុសនៅក្នុងតំបន់ និងអន្តរជាតិ ៕ អត្ថបទសហការ
ចែករំលែកព័តមាននេះ