រាជធានី​ភ្នំពេញ ​៖ សាកលវិទ្យាល័យ ប៊ែ​ល​ធី អន្តរជាតិ មាន​កិត្តិយស​ដ៏​ឧត្តុង្គឧត្តម​បាន​ទទួល​ស្វាគមន៍​វត្តមាន​ដ៏​ខ្ពង់ខ្ពស់​របស់ លោក​ជំទាវ Ar. Siti Rozaimeriyanty Dato Haji Abdul Rahman អគ្គលេខាធិការ​អន្តរ​សភា​អាស៊ាន (AIPA) ដែល​បាន​អញ្ជើញ​មក​ទស្សនកិច្ច​សិក្សា​ស្វែង​យល់​អំពី​វឌ្ឍនៈភាព​វិស័យ​អប់រំ​នៅ​សាកលវិទ្យាល័យ ប៊ែ​ល​ធី អន្តរជាតិ ព្រមទាំង​បាន​អញ្ជើញ​ទស្សនា បណ្ណាល័យ​ឌី​ជី​ថ​ល បន្ទប់ Lab ផ្នែក​ស្ថាបត្យកម្ម អាកាស​ចរ​ស៊ី​វិល និង​បន្ទប់ Studio ផ្នែក IT ថ្នាក់រៀន បន្ទប់​មហាវិទ្យាល័យ រួម​ទាំង​អគារ​ស្នាក់​នៅ​និស្សិត ផង​ដែរ​ ។

ជាមួយ​គ្នា​នោះ លោក​ជំទាវ​អគ្គលេខាធិការ ក៏​បាន​អញ្ជើញ​ជួប​សំណេះសំណាល​ជាមួយ​និស្សិត សាកលវិទ្យាល័យ ប៊ែ​ល​ធី អន្តរជាតិ សរុប​ប្រមាណ ២,៣០០​នាក់ ដោយ​ក្នុង​នោះ​ចូលរួម​ដោយ​ផ្ទាល់​នៅ ទីតាំង​ទី​២ (​ស្ពាន​អាកាស​ចោម​ចៅ​) ជាង ១,១០០​នាក់ និង​ចូលរួម​តាម​ប្រព័ន្ធ​Zoom នៅ​ទីតាំង​ទី​ ១ (​ទួល​ស្លែង​) ជាង ១,២០០​នាក់ ​។

នៅ​ក្នុង​ជំនួប​ជាមួយ​និស្សិត លោក​ជំទាវ​អគ្គលេខាធិការ និង​ក្រុមការងារ​លេខាធិការដ្ឋាន​អាយ​ប៉ា ក៏​បាន​ធ្វើ​បទ​បង្ហាញ​អំពី​កម្មវិធី “AIPA Roadshow លើក​ទី​១៨ – The 18th AIPA Roadshow” ដើម្បី​ផ្សព្វផ្សាយ​ដល់​ស្រទាប់​យុវជន ឱ្យ​បាន​ស្គាល់ និង​យល់​ដឹង​អំពី​តួនាទី​របស់​សភា​ជា​សមាជិក AIPA និង​តួនាទី​របស់​សភា​កម្ពុជា​ក្នុង AIPA ក៏​ដូច​ជា ផ្សព្វផ្សាយ​អំពី​សមិទ្ធផល និង​ស្នាដៃ​នានា​របស់ AIPA ដែល​សម្រេច​បាន​នា​ពេល​កន្លង​មក ​។

ទន្ទឹម​គ្នា​នោះ លោក​ជំទាវ​អគ្គលេខាធិការ កោតសរសើរ និង​ថ្លែងអំណរគុណ​នូវ​គំនិត​ផ្តួចផ្តើម​របស់​សភា​កម្ពុជា​ស្តី​ពី ការ​បង្កើត​បណ្ណាល័យ​ច្បាប់​ឌី​ជី​ថ​ល (AIPA Lync – Digital Law Library) ដែល​បាន​និង​កំពុង​ផ្តល់​អត្ថប្រយោជន៍​ដល់​ប្រជាជន​កម្ពុជា​ផង និង​អាស៊ាន​ផង ​។ លោក​ជំទាវ​បាន​បន្ត​ថា AIPA LYNC ត្រូវ​បាន​សម្ពោធ​ដាក់​ឱ្យ​ប្រើប្រាស់​ជា​ផ្លូវការ កាលពី​ខែមិថុនា ឆ្នាំ​ ២០២៤ កន្លង​ទៅ ដោយ​មាន​ឯកសារ​ច្បាប់​ពី​បណ្តា​ប្រទេស​ជា​សមាជិក​អាស៊ាន និង​ដែល​មាន​អ្នក​ចូល​ប្រើប្រាស់​រហូត​ដល់​ជិត ៣​សែន​នាក់ រួច​ហើយ​នា​ពេល​បច្ចុប្បន្ ន​។

ក្នុង​ឱកាស​ដ៏​ឧត្តុង្គឧត្តម​នោះ ឯកឧត្តម​បណ្ឌិត លី ឆេ​ង តំណាងរាស្ត្រ​មណ្ឌល​រាជធានី​ភ្នំពេញ ស្ថាបនិក និង​ជា​អគ្គនាយក ប៊ែ​ល​ធី គ្រុប បាន​ថ្លែងអំណរគុណ លោក​ជំទាវ​អគ្គលេខាធិការ និង​ក្រុមការងារ​លេខាធិការដ្ឋាន​អាយ​ប៉ា​ទាំងអស់ ដែល​បាន​ចំណាយ​ពេលវេលា​ដ៏​មាន​តម្លៃ និង​មមាញឹក​អញ្ជើញ​មក​ទស្សនកិច្ច និង​ផ្តល់​ឱកាស​ជូន​និស្សិត​ប៊ែ​ល​ធី បាន​ស្គាល់ និង​យល់​ដឹង​កាន់តែ​ច្បាស់​អំពី អន្តរ​សភា​អាស៊ាន (AIPA) តាម​រយៈ​បទ​បង្ហាញ និង​វេទិកា​ជជែក​ពិភាក្សា​ដ៏​មាន​សារៈសំខាន់​នា​ព្រឹក​នេះ​ ។

បន្ទាប់​ពី ទស្សនកិច្ច និង​សំណេះសំណាល​ជាមួយ​និស្សិត​ប៊ែ​ល​ធី រួច​មក លោក​ជំទាវ​អគ្គលេខាធិការ ក៏​បាន​បន្ត​អញ្ជើញ​ទៅ​ទស្សនា​កម្សាន្ត​នៅ​ខេត្ត​ព្រះ​សីហ​នុ ដើម្បី​សិក្សា​ស្វែង​យល់​អំពី​វិស័យ​ទេសចរណ៍ ការ​រីក​ចម្រើន​របស់​ខេត្ត និង​ទស្សនា​សមុទ្រ​ដ៏​ស្រស់​ស្អាត​របស់​កម្ពុជា​ផង​ដែរ​ ៕ អត្ថបទសហការ