ក្រុមហ៊ុន ជីប ម៉ុង ចុះអនុស្សរណៈជាមួយសាលាអន្ដរជាតិគ្រីនហ្វៀល ដើម្បីផ្ដល់ឱកាសឱ្យបុគ្គលិកខ្លួនបញ្ជូនកូនចូលរៀន សាលាមានគុណភាព
រាជធានីភ្នំពេញ ៖ កាលពីថ្ងៃទី ៦ ខែកក្កដា ឆ្នាំ ២០២៥ ក្រុមហ៊ុន ជីប ម៉ុង…
រាជធានីភ្នំពេញ ៖ កាលពីថ្ងៃទី ៦ ខែកក្កដា ឆ្នាំ ២០២៥ ក្រុមហ៊ុន ជីប ម៉ុង គ្រុប និងសាលាអន្ដរជាតិគ្រីនហ្វៀល បានចុះអនុស្សរណៈនៃការយោគយល់គ្នា ដើម្បីផ្តល់ការបណ្តុះបណ្តាលដ៏មានគុណភាពដល់កូនៗនៃបុគ្គលិករបស់ខ្លួន ។ ខណៈកម្មវិធីនេះត្រូវបានរៀបចំឡើង នៅក្នុងផ្សារទំនើប ជីប ម៉ុង ២៧១ មេហ្គាម៉ល ដែលមានការអញ្ជើញចូលរួមក្រោមអធិបតីភាពលោកជំទាវ តែ សុវណ្ណី អគ្គនាយិកាពហុពាណិជ្ជកម្ម និងជាសមាជិកក្រុមប្រឹក្សាភិបាលក្រុមហ៊ុន ជីប ម៉ុង, លោកជំទាវ លី សុខឆេង អគ្គនាយិកាក្រុមហ៊ុន ជីប ម៉ុង រីថែល, លោក តែ សុភារៈ ប្រធានក្រុមប្រឹក្សាភិបាលសាលាគ្រីនហ្វៀល, លោក លី ចាន់ណារិទ្ធ ប្រធាននាយកប្រតិបត្ដិសាលាគ្រីនហ្វៀល ព្រមទាំងភ្ញៀវកិត្ដិយសជាច្រើនរូបទៀត ។
ក្នុងឱកាសនោះលោកជំទាវ តែ សុវណ្ណី បានលើកឡើងថា ក្រុម ហ៊ុន ជីបម៉ុង ជាក្រុមហ៊ុនខ្មែរ ដែលមានកេរ្តិ៍ឈ្មោះ និងគ្រឹះដ៏រឹងមាំជាង ៤០ឆ្នាំ ។ យើងមានក្រុមហ៊ុនបុត្រសម្ព័ន្ធ ១៤ ក្រុមហ៊ុន ដែលបានបង្កើតការងារដល់ប្រជាជនខ្មែរសរុបជាង ១ម៉ឺននាក់ ។ កន្លងមកក្រុមហ៊ុន ជីប ម៉ុង តែងតែចូលរួមយ៉ាងសកម្មជាមួយប្រមុខរាជរដ្ឋាភិបាល និងក្នុងការផ្តល់ត្រឡប់ទៅសង្គមវិញលើវិស័យជាច្រើនរួមមាន វិស័យសុខាភិបាល អប់រំ, បរិស្ថាន, ទេសចរណ៍ ព្រមទាំងសកម្មភាពសង្គម និងមនុស្សធម៌ជាច្រើនទៀត ដើម្បីចូលរួមអភិវឌ្ឍសេដ្ឋកិច្ចកម្ពុជា និងកិច្ចការសង្គម។ វិស័យចម្បងមួយដែល ជីប ម៉ុង ផ្តោតសំខាន់ គឺវិស័យអប់រំ ។ ព្រោះសាលារៀនជាថ្នាលបណ្តុះគ្រាប់ពូជ ជាកន្លែងបណ្តុះបណ្តាលចំណេះដឹងជំនាញ ចំណែក ឯក្រុមហ៊ុន ជីបម៉ុង ប្រៀបបីដូចជាសាលាដ៏ធំមួយផងដែរ ដែលយើងជាកន្លែងអនុវត្តផ្ទាល់ ។
លោកជំទាវអគ្គនាយិកាបានបញ្ជាក់ថា ចំពោះមូលហេតុដែលក្រុមហ៊ុន ជីប ម៉ុង ចាប់ដៃគូសហការជាមួយសាលាអន្តរជាតិគ្រីនហ្វៀល ដោយសាសាលាមួយនេះមានស្ថាបនិកជាកូនខ្មែរ ដែលគាត់ដឹងច្បាស់ពីតម្រូវការ ក្នុងការរៀបចំកម្មវិធីសិក្សាដែលឆ្លើយតបនឹងតម្រូវការរបស់កូនខ្មែរ ដើម្បីត្រៀមខ្លួនបន្តការសិក្សានៅមហាវិទ្យាល័យ។ ទោះបីសាលាអន្តរជាតិគ្រីនហ្វៀលទើបតែបង្កើតថ្មីក៏ពិតមែន ប៉ុន្តែគាត់មានការទទួលស្គាល់ពីក្រសួងអប់រំ យុវជន និងកីឡានៃព្រះរាជាណាចក្រកម្ពុជា ថែមទាំងមានលក្ខណៈស្តង់ដារអន្តរជាតិតាមរយៈការទទួលស្គាល់ពីស្ថាប័ន Cambridge International Education នៃសាកលវិទ្យាល័យ Cambridge នៅចក្រភពអង់គ្លេសផងដែរ ។
ត្រង់ចំណុចនេះដែរ ដើម្បីទទួលស្គាល់ស្តង់ជាពីសាលា Cambridge នៃចក្រភពអង់គ្លេស លុះត្រាតែសាលានោះ គោរពតាមលក្ខខណ្ឌជាច្រើនរបស់ សាលា Cambridge ដូចជា កម្មវិធីសិក្សា (Curriculum) ទំនើបដែលស្របតាមកម្មវិធីសិក្សារបស់ Cambridge ដែលផ្តោតលើការបណ្តុះបណ្តាលបុគ្គលិកលក្ខណៈឲ្យកុមារមានសមត្ថភាពខ្ពស់ក្នុងការរិះគិត ភាពច្នៃប្រឌិត ការរស់នៅក្នុងសង្គម និងការអប់រំផ្លូវចិត្ត។ ហើយសាលាអន្តរជាតិគ្រីនហ្វៀល មានគ្រឿងបរិក្ខាសិក្សាសម្បូរបែប ដែលផ្តល់នូវបរិយាកាសសិក្សាប្រកបដោយការគាំទ្រ និងលើកទឹកចិត្តដល់កុមារឲ្យស្វែងយល់ពីសក្តានុពលអភិវឌ្ឍទេពកោសល្យ និងក្លាយជាពលរដ្ឋសកលដែលមានទំនួលខុសត្រូវ។ ដូច្នេះយើងខ្ញុំជឿជាក់ថា សាលាអន្តរជាតិគ្រីនហ្វៀលនឹងផ្តល់ការបណ្តុះបណ្តាល ពេញលេញដល់កូនៗរបស់បុគ្គលិកយើងឲ្យក្លាយជាទំពាំងដែលរីកលូតលាស់ល្អ ដើម្បីបន្តអភិវឌ្ឍន៍ប្រទេសជាតិយើងឲ្យកាន់តែរីកចម្រើន ។
លោកជំទាវ តែ សុវណ្ណីបានបន្ថែមថា តាមរយៈអនុស្សរណៈយោគយល់គ្នានេះ យើងមានបំណងសម្រេចបានូវគោលបំណងដូច ខាងក្រោម ៖
ទី១៖ ការផ្តល់ជូនពិសេសសម្រាប់បុគ្គលិកក្រុមហ៊ុន ជីប ម៉ុង ជាមួយការបញ្ចុះតម្លៃលើថ្លៃសិក្សាររហូតដល់ ៣០% រយៈពេល ១២ឆ្នាំ ពេញ សម្រាប់កូនៗទាំងអស់របស់ពួកគេ។ អ្វីដែលកាន់តែពិសេសនោះ សម្រាប់ការចុះឈ្មោះចាប់ពីថ្ងៃនេះ រហូតដល់ថ្ងៃទី ៨ ខែកក្កដា នឹងទទួលបានការបញ្ចុះតម្លៃបន្ថែម ៥% ពីលើនេះការបញ្ចុះតម្លៃដែលបានផ្តល់ជូន ។ កម្មវិធីនេះ នឹងជួយសម្រួលបន្ទុកហិរញ្ញវត្ថុដល់បុគ្គលិកដែលមានកូនតូច តាមរយៈការបញ្ជូន បុត្រធីតាចូលរៀនក្នុងសាលាអន្តរជាតិដែលមានគុណភាព ដែលនេះជាការយកចិត្តទុកដាក់ ចំពោះសុខមាលភាពគ្រួសាររបស់បុគ្គលិកក្រុមហ៊ុន ជីប ម៉ុង ។
ទី ២ ៖ កម្មវិធីនេះ បានគិតគូពីទុក្ខលំបាករបស់ឪពុកម្តាយដែលមានកូនតូច ហើយត្រូវបំពេញការងារពេញម៉ោង ដោយយើងដឹងថា បុគ្គលិកភាគច្រើន គាត់ចូលធ្វើការម៉ោង ៨ ចេញម៉ោង ៦ ប៉ុន្តែសាលាកូនៗពួកគេចេញពីរៀនម៉ោង ៣ ឬសាលាខ្លះចេញម៉ោង ៤ ដែលជាការពិបាកក្នុងការចេញមុនម៉ោងដើម្បីទៅទទួលកូនចេញពីរៀន។ ក្នុងនាមខ្ញុំជាម្តាយមួយរូប ដែលធ្លាប់ឆ្លងកាត់រួចហើយ យើងបានសហការជាមួយសាលាអន្តរជាតិគ្រីនហ្វៀល ដែលខាងសាលានឹងជួយមើលថែកូនៗរបស់បុគ្គលិក រហូតដល់ម៉ោងពួកគេចេញពីធ្វើការដោយសាលាទទួលមើលដល់ម៉ោង ៦ កន្លះ ។
ដូច្នេះបុគ្គលិកអាចផ្តោតអារម្មណ៍លើការបំពេញការងារដោយដឹងថាកូនៗរបស់ពួកគេកំពុងទទួលបានមើលថែ និងការអប់រំដ៏ល្អបំផុត ។ ហើយបន្ថែមពីនេះវាមានភាពងាយស្រួយដោយបច្ចុប្បន្នសាលាមាន ៣ សាខា ៖ សាខាទី ១ នៅឫស្សីកែវ ស្ថិតនៅក្បែរស្ថានីយ៍ទស្សន៍ថោន សាខាទី ២ សាខាមានជ័យ និងសាខាទី ៣ នៅបុរី ជីប ម៉ុង លេនម៉ាក់ ២៧១ មានចម្ងាយ ១៥០០ ម៉ែត្រ ពីផ្សារទំនើប ជីប ម៉ុង ២៧១ មេហ្គាម៉ល តាមបណ្តោយផ្លូវ ២៧១ ដែលនឹងបើកសម្ពោធឆាប់នេះ ។ លោក លោកស្រី អាចបញ្ជូនកូនៗចូលរៀននៅសាខាណាមួយក៏បាន ដែលនៅក្បែរលោកអ្នក ។ និងទី ៣ ៖ ការរួមចំណែកដល់ការអភិវឌ្ឍធនធានមនុស្សដែលមានគុណភាព តាមរយៈការផ្តល់ឱកាសឲ្យកូនៗបុគ្គលិកទទួលបានការអប់រំតាមបែបអន្តរជាតិ ដែលនឹងនាំមកនូវចេះដឹង និងវប្ប ធម៌ធំទូលាយ ៕ អត្ថបទសហការ
ចែករំលែកព័តមាននេះ