ក្រុមហ៊ុនពីរចាប់ដៃគ្នាបង្កើតកិច្ចសហការថ្មីក្នុងវិស័យហិរញ្ញវត្ថុនៅកម្ពុជា ដើម្បីទាក់ទាញវិនិយោគិនបរទេស
រាជធានីភ្នំពេញ ៖ នារសៀលថ្ងៃទី ០៤ ខែមេសា ឆ្នាំ ២០២៥ ក្រុមហ៊ុនមូលបត្រ ភីភី លីង…
រាជធានីភ្នំពេញ ៖ នារសៀលថ្ងៃទី ០៤ ខែមេសា ឆ្នាំ ២០២៥ ក្រុមហ៊ុនមូលបត្រ ភីភី លីង និង ធនាគារ អេស៊ីលីដា ភីអិលស៊ី បានចុះហត្ថលេខាលើ ៖ «កិច្ចព្រមព្រៀងសហប្រតិបត្តិការផ្ដល់ជូនវិនិយោគិនបរទេស នូវសេវាឥណទានវិនិយោគ» ដើម្បីអបអរសាទរ ដល់សមិទ្ធផលថ្មីក្នុងការទាក់ទាញការវិនិយោគពីបរទេស មកក្នុងទីផ្សារឧបករណ៍និស្សន្ទនៅកម្ពុជា ។
កម្មវិធីជាប្រវត្តិសាស្ត្រថ្មីក្នុងវិស័យហិរញ្ញវត្ថុនេះ ត្រូវបានចូលរួមជាអធិបតី និងជាសក្ខីភាពដ៏ខ្ពង់ខ្ពស់ដោយ ឯកឧត្ដម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក) និង លោកស្រី ប៊ុន សុវ៉ាត់ឌី ប្រធានគណៈកម្មាធិការប្រតិបត្តិ ទទួលបន្ទុកជាប្រធានសមាគមនៃសមាគមឈ្មួញជើងសាឧបករណ៍និស្សន្ទនៅកម្ពុជា រួមជាមួយ ថ្នាក់ដឹកនាំពីស្ថានប័នក្នុងវិស័យទីផ្សារឧបករណ៍និស្សន្ទ និងធនាគារ ក៏ដូចជាសាធារណជនជាច្រើនទៀតផងដែរ ។
កិច្ចព្រមព្រៀងនេះត្រូវបានចុះហត្ថលេខាដោយ លោកបណ្ឌិត Raymond Choi ទីប្រឹក្សាក្រុមប្រឹក្សាភិបាលនៃក្រុមហ៊ុនមូលបត្រ ភីភី លីង និង លោក នេត ពិសិដ្ឋ នាយកប្រតិបតិ្តសេវាហិរញ្ញវត្ថុ នៃធនាគារ អេស៊ីលីដា ។
លោកបណ្ឌិត Raymond Choi បានមានប្រសាសន៍ថា ៖ «កិច្ចសហប្រតិបត្តិការនេះបង្ហាញពីចក្ខុវិស័យវែងឆ្ងាយ រវាងភាគីទាំងពីរ ក្នុងការបង្កើតប្រព័ន្ធហិរញ្ញវត្ថុឱ្យមានភាពទំនើប និងកាន់តែងាយស្រួលក្នុងការប្រើប្រាស់ ។ ដូច្នេះ យើងត្រូវរួមកម្លាំងគ្នា ដើម្បីបង្កើតដំណោះស្រាយឆ្នើម និងអត្ថប្រយោជន៍កាន់តែច្រើន ដែលអាចចូលរួមលើកកម្ពស់ដល់កំណើនសេដ្ឋកិច្ចកម្ពុជាប្រកបដោយនិរន្តរភាព» ។
លោក នេត ពិសិដ្ឋ តំណាងពីភាគីធនាគារក៏បានចូលរួមបង្ហាញចំណាប់អារម្មណ៍ដែរថា ៖ «យើងមានមោទកភាពចំពោះកិច្ចសហប្រតិបត្តិការជាមួយ ក្រុមហ៊ុនមូលបត្រ ភីភី លីង ក្នុងការជំរុញសេវាកម្មហិរញ្ញវត្ថុជាលក្ខណៈអន្តរជាតិ ។ យើងត្រូវការអភិវឌ្ឍសេវាកម្មហិរញ្ញវត្ថុដែលមានគុណភាពខ្ពស់ ដើម្បីបង្កើតបរិយាកាសអាជីវកម្មនៅកម្ពុជាកាន់តែទូលំទូលាយ និងមានលក្ខណៈប្រកួតប្រជែង» ។
ឆ្លៀតក្នុងឱកាសថ្លែងសុន្ទរកថាបើកកម្មវិធីនេះ ឯកឧត្ដម ស៊ូ សុជាតិ បានអបអរសាទរក្រុមហ៊ុនទាំងពីរ និងផ្ញើសារទៅកាន់ភាគីពាក់ព័ន្ធទាំងអស់ថា ៖ «ការបង្កើតទីផ្សារឧបករណ៍និស្សន្ទមួយប្រកបដោយប្រសិទ្ធភាព គឺពិតជាមានសារៈសំខាន់ណាស់សម្រាប់ការពង្រឹងស្ថិរភាពហិរញ្ញវត្ថុ ការគ្រប់គ្រងហានិភ័យ និងការជំរុញកំណើនសេដ្ឋកិច្ច។ ក្នុងគោលដៅជំរុញទីផ្សារនេះឆ្ពោះទៅមុខ គឺទាមទារនូវកិច្ចខិតខំប្រឹងប្រឹង កិច្ចសហការ និងការប្តេជ្ញាចិត្តខ្ពស់…..» ។
«តួយ៉ាងនៅថ្ងៃនេះ ការចុះកិច្ចព្រមព្រៀងសហប្រតិបត្តិការផ្ដល់ជូនវិនិយោគិនបរទេសនូវសេវាឥណនាវិនិយោគ រវាងក្រុមហ៊ុនមូលបត្រ ភីភី លីង និងធនាគារ អេស៊ីលីដា នៅថ្ងៃនេះ បានឆ្លុះបញ្ចាំងពីការចាប់ដៃគូរសហការដែលផ្តល់នូវយន្តការថ្មីមួយទៀត ក្នុងការជំរុញកំណើនសេដ្ឋកិច្ច និងលើកកម្ពស់សេវាហិរញ្ញវត្ថុសម្រាប់វិនិយោគិនបរទេស» ។
គួរបញ្ជាក់ផងដែរថា កម្មវិធីនេះក៏មានរៀបចំសន្និសីទសារព័ត៌មាន ដោយមានស្ថាប័នសារព័ត៌មានជាច្រើនចូលរួមផងដែរ ។ ឆ្លើយតបទៅនឹងសំណួរមួយដ៏សំខាន់ ថាតើអ្វីទៅជា «សេវាឥណនាវិនិយោគ ហើយសេវាកម្មមួយនេះនឹងផ្ដល់ជូនអត្ថប្រយោជន៍អ្វីខ្លះដល់វិនិយោគិនបរទេស ?» លោកបណ្ឌិត Raymond Choi បានឆ្លើយបញ្ជាក់ថា ៖ «សេវាឥណទានវិនិយោគនេះ គឺជាវិធីសាស្ត្រក្នុងការប្រើប្រាស់ដើមទុនឱ្យកាន់តែទូលំទូលាយ មានន័យថា អតិថិជនបរទេសដែលបើក គណនីប្រាក់បញ្ញើមានកាលកំណត់ (Term Deposit) នៅធនាគារ អេស៊ីលីដា អាចប្រើប្រាស់រហូតដល់ ៨០% នៃប្រាក់បញ្ញើរបស់ពួកគេ ជាទុនវិនិយោគក្នុងទីផ្សារឧបករណ៍និស្សន្ទ ជាមួយ ក្រុមហ៊ុនមូលបត្រ ភីភី លីង ក្នុងនាមជាឈ្មួញជើងសាឧបករណ៍និស្សន្ទ ។ ដូច្នេះ ក្នុងពេលតែមួយ អតិថិជនអាចទទួលបានអត្រាការប្រាក់ពីធនាគារ និង បង្កើតបានប្រភពរកប្រាក់ចំណូលពីទីផ្សារហិរញ្ញវត្ថុបានផងដែរ» ។
ជារួម កិច្ចសហប្រតិបត្តិការនេះបានបង្កើតស្តង់ដារថ្មី សម្រាប់វិស័យហិរញ្ញវត្ថុ និងបានត្រួសត្រាយផ្លូវសម្រាប់ដំណើររួមគ្នាក្នុងការអភិវឌ្ឍវិស័យហិរញ្ញវត្ថុ សម្រាប់វិនិយោគិន និងការចូលរួមចំណែកយ៉ាងសំខាន់ក្នុងកំណើនសេដ្ឋកិច្ចកម្ពុជា ៕ អត្ថបទសហការ
ចែករំលែកព័តមាននេះ