រាជធានីភ្នំពេញ ៖ ស្របពេលមានការទទួលស្គាល់លើគុណភាព និងរសជាតិឆ្ងាញ់នៃផលិតផលមីជាតិ ក្រុមហ៊ុន វ័នម៉រ មេនូហ្វេកឆឺរីង ផលិតមីកញ្ចប់ឆ្អិនស្រាប់ នៅកម្ពុជាមួយនេះ បាននាំចេញផលិតផល…
រាជធានីភ្នំពេញ ៖ ស្របពេលមានការទទួលស្គាល់លើគុណភាព និងរសជាតិឆ្ងាញ់នៃផលិតផលមីជាតិ ក្រុមហ៊ុន វ័នម៉រ មេនូហ្វេកឆឺរីង ផលិតមីកញ្ចប់ឆ្អិនស្រាប់ នៅកម្ពុជាមួយនេះ បាននាំចេញផលិតផល មីជាតិ ទៅកាន់ទីផ្សារអន្តរជាតិ ប្រទេសកូរ៉េខាងត្បូង ដែលជាវឌ្ឍនភាពថ្មីដ៏អស្ចារ្យមួយទៀតហើយ នាដើមឆ្នាំ ២០២៥ នេះ បន្ទាប់ពីការនាំចេញទៅទីផ្សារក្រៅប្រទេសដំបូងកាលពីឆ្នាំ២០២១ ។
នេះជាមោទនភាពថ្មី នៃផលិតផលជាតិខ្មែរ លើវិសាលភាពចែកចាយ និងនាំចេញទៅកាន់ទីផ្សារតំបន់អាស៊ីបូព៌ា ។ ការបើកទំព័រនៃដំណើរការនាំចេញឆ្ពោះទៅកាន់ប្រទេសកូរ៉េខាងត្បូង ឆ្លុះបញ្ចាំងពីការជឿជាក់លើគុណភាពផលិតផលមីជាតិ ត្រូវបានប្រព្រឹត្តឡើងដោយមានការរៀបចំសន្និសីទសារព័ត៌មាន នាព្រឹកថ្ងៃសុក្រ ទី ៧ ខែមីនា ឆ្នាំ ២០២៥ នៅក្រុមហ៊ុនវ័នម៉រ មេនូហ្វេកឆឺរីង (រោងចក្រផលិតមីជាតិ) ដែលមានការចូលរួមជាអធិបតីភាពពីតំណាងក្រសួងពាណិជ្ជកម្ម គណគ្រប់គ្រងនៃក្រុមហ៊ុន តំណាងក្រុមហ៊ុនចែកចាយពីប្រទេសកូរ៉េ ព្រមទាំងភ្ញៀវកិត្តិយសជាច្រើននាក់ទៀត ។
លោកជំទាវ ជឹង សុគន្ធាវី នាយិកាប្រតិបត្តិ ក្រុមហ៊ុនវ័នម៉រ មេនូហ្វេកឆឺរីង (មីជាតិ) បានឱ្យដឹងថា ការនាំចេញទៅកាន់ទីផ្សារអន្តរជាតិនេះ ពិតជាបានផ្តល់ភាពវិជ្ជមានជាច្រើនដល់ផលិតផលមីជាតិ លើសពីនេះក៏បានឆ្លុះបញ្ចាំង ពីការទទួលស្គាល់ ជឿជាក់លើគុណភាព និងរសជាតិ ផលិតផលមីជាតិ ស្របជាមួយតម្រូវការទីផ្សាររបស់ប្រជាជននៅក្នុងប្រទេសកូរ៉េខាងត្បូងផងដែរ ។ ការនាំចេញនេះបានផ្តល់ជាកាលានុវត្តភាពថ្មីមួយទៀត សម្រាប់ផលិតផល មីជាតិ ក្នុងការបង្ហាញវត្តមានខ្លួនលើទីផ្សារអន្តរជាតិ ខណៈគុណភាព និងរសជាតិនេះបានទទួលស្គាល់រួចជាស្រេចពីសំណាក់ប្រជាជននៅក្នុងស្រុក ។ លោកជំទាវ បានបន្តទៀតថា មីជាតិ បានផលិតឡើងក្នុងស្តង់ដារមួយដ៏ត្រឹមត្រូវ តាំងពីថ្ងៃបង្កើតដំបូង ដើម្បីសម្រេចនូវទស្សនៈវិស័យ ជាផលិតផលចំណីអាហារ ដែលគេគ្រប់គ្នាទទួលស្គាល់ ហើយការនាំចេញ ថ្ងៃនេះជាដំណើរឆ្ពោះទៅមុខមួយដំណាក់កាលទៀត ដែលក្រុមហ៊ុនបានខិតខំប្រឹងប្រែងជាង ៦ឆ្នាំកន្លងមកនេះ ដើម្បីលើកកម្ពស់ផលិតផលស្រុក និងវិស័យចំណីអាហារ វេចខ្ចប់នៅកម្ពុជា ។
លោក ឈែ ជុងម៉ូន នាយកប្រតិបត្តិ ក្រុមហ៊ុន Ringpang Co., Ltd តំណាងដៃគូចែកចាយមីជាតិ ទៅប្រទេសកូរ៉េខាងត្បូង បានមានប្រសាសន៍ថា “ខ្ញុំបាទពិតជាមានក្តីសោមនស្សរីករាយ និងមានកិត្តិយសយ៉ាងក្រៃ លែងសម្រាប់កិច្ចសហការជាមួយក្រុមហ៊ុនមីជាតិ លើកដំបូងនាំចេញទៅកាន់ប្រទេសកូរ៉េ ។ ដើម្បីបំពេញនូវលក្ខខណ្ឌក្នុងការនាំចេញ កម្រិតគុណភាព និងសុវត្ថិភាពចំណីអាហាររបស់មីជាតិ ត្រូវបានឆ្លងកាត់ការសិក្សា និងវាយតម្លៃយ៉ាងយកចិត្តទុកដាក់បំផុត ដោយក្រសួងនិងស្ថាប័នពាក់ព័ន្ធ លើបទដ្ឋានស្តង់ដារ ដើម្បីធានាដល់ការនាំចេញប្រកបដោយសុវត្ថិភាពនិងគុណភាព” ។
លោកបន្តទៀតថា នៅប្រទេសកូរ៉េ មានផលិតផលមីក្នុងស្រុក និងមីនាំចូលរាប់សិបស្លាកសញ្ញា ដែលនាំចូលពីបណ្តាប្រទេសជាច្រើនរួមមាន ជប៉ុន ចិន វៀតណាម ជាដើម ប៉ុន្តែខ្ញុំបាទមិនទាន់បានឃើញមាននូវវត្តមានមីកញ្ចប់របស់ប្រទេសកម្ពុជានោះទេ ។ លោកជឿជាក់ថា “ការនាំចេញនេះមានបំណងចង់ពាំនាំនូវអនុស្សាវរីយ៍ និងការចងចាំនៃរសជាតិស្រុកកំណើតជូនដល់ប្រជាជនកម្ពុជា ចំនួន ១០ម៉ឺននាក់ដែលកំពុងរស់នៅក្នុងប្រទេសកូរ៉េ និងចង់ណែនាំនូវផលិតផលមីកញ្ចប់ថ្មី រសជាតិឈ្ងុយឆ្ងាញ់មួយនេះជូនប្រជាជនកូរ៉េផងដែរ” ។
លោក ស៊ិន ស៊ីដេត អគ្គនាយករង នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្ម បានបង្ហាញនូវការថ្លែងអំណរគុណយ៉ាងជ្រាលជ្រៅ ចំពោះក្រុមហ៊ុន ដែលបានចូលរួមចំណែកក្នុងការ ការពារអ្នកប្រើប្រាស់ ជំរុញកំណើនសេដ្ឋកិច្ច និងបង្កើតការងារសម្រាប់ប្រជាជនកម្ពុជា ដោយបានអនុវត្តនូវអភិក្រម រួមមានការប្រើប្រាស់វត្ថុធាតុដើមក្នុងស្រុក ការប្រើប្រាស់កម្លាំងពលកម្មក្នុងស្រុក ការផលិតដោយប្រើប្រាស់បច្ចេកវិទ្យាចុងក្រោយរបស់ជប៉ុន និងការបំពេញបាននូវលក្ខខណ្ឌតម្រូវផ្នែកគុណភាព និងសុវត្ថិភាពដោយដាក់ ឱ្យអនុវត្តនូវប្រព័ន្ធ ISO22000:2018, ប្រព័ន្ធ ISO9001:2015, ប្រព័ន្ធ GHPs និងប្រព័ន្ធ HACCP ជាដើម។ ក្នុងឱកាសនេះដែរ លោកបន្តថា “ខ្ញុំបាទសូមចូលរួមអបអរសាទរ ប្រកបដោយមោទនភាពជាមួយមីជាតិ ចំពោះសមិទ្ធិផលជាប្រវត្តិសាស្ត្ររបស់ក្រុមហ៊ុន ដែលអាចនាំចេញមីជាតិ ទៅកាន់ទីផ្សារប្រទេសកូរ៉េខាងត្បូងបាន បន្ទាប់ពីបានឆ្លងកាត់ការត្រួតពិនិត្យ គុណភាព សុវត្ថិភាពម្ហូបអាហារ ស្របតាមបទដ្ឋានអនុញ្ញាត និងបទប្បញ្ញត្តិពាក់ព័ន្ធ របស់សាធារណៈរដ្ឋកូរ៉េ។ លោកសង្ឃឹមថា ក្រុមហ៊ុននឹងបន្តពង្រីកទីផ្សារទៅកាន់បណ្តាប្រទេសផ្សេងទៀតនៅពេលខាងមុខ” ។
គួរបញ្ជាក់ថា ក្រុមហ៊ុន វ័នម៉រ មេនូហ្វេកឆឺរីង ដែលជាក្រុមហ៊ុនផលិតមីជាតិ បង្កើតឡើងក្នុងឆ្នាំ២០១៩ ដោយមានរោងចក្រផលិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ។ បច្ចុប្បន្ននេះ មីជាតិមានរសជាតិប្រាំជម្រើសរួមមាន មីជាតិខគោគ្រឿងខាប់រសជាតិដើម មីជាតិសាច់ជ្រូកចិញ្ច្រាំ មីជាតិឆាស៊ុតមាន់ មីជាតិម្ជូរបង្គា និងមីជាតិគ្រឿងសមុទ្រគោក ដែលរសជាតិទាំងប្រាំនេះ ត្រូវបានឆ្លងកាត់ការស្រាវជ្រាវយ៉ាងយកចិត្តទុកដាក់ ផ្ចិតផ្ចង់ សម្រិតសម្រាំង ព្រមជាមួយការផលិត ដោយប្រើប្រាស់ម៉ាស៊ីនជប៉ុន និងបច្ចេកវិទ្យាជប៉ុន ដើម្បីផ្តល់នូវផលិតផលគុណភាពខ្ពស់ មានអនាម័យ ជាមួយនឹងរសជាតិខ្មែរពិតៗ ដូចទៅនឹងពាក្យស្លោករបស់មីជាតិ “ស្នាដៃខ្មែរ រសជាតិខ្មែរ” ៕ អត្ថបទសហការ
ចែករំលែកព័តមាននេះ