រាជធានីភ្នំពេញ ៖ អ្នកស្ម័គ្រចិត្តបរិច្ចាគឈាមមកពីគ្រប់ទិសទីនៃទូទាំងខណ្ឌទាំង ១៤ នៃរាជធានីភ្នំពេញ រួមមានសិស្ស, និស្សិត, យុវជនកាកបាទក្រហម, សប្បុរសជន, បុគ្គលិកវីតាល់…
រាជធានីភ្នំពេញ ៖ អ្នកស្ម័គ្រចិត្តបរិច្ចាគឈាមមកពីគ្រប់ទិសទីនៃទូទាំងខណ្ឌទាំង ១៤ នៃរាជធានីភ្នំពេញ រួមមានសិស្ស, និស្សិត, យុវជនកាកបាទក្រហម, សប្បុរសជន, បុគ្គលិកវីតាល់ មីជាតិ មន្ត្រីរាជការ ក្រសួងស្ថាប័ន សរុប ១១៦៧ នាក់ ក្នុងនោះស្រីចំនួន ៤១២ នាក់ បានចូលរួមក្នុងយុទ្ធនាការបរិច្ចាគឈាមនាទិវានៃក្តីស្រឡាញ់ ក្រោមប្រធានបទ «ផ្តល់ឈាម ផ្តល់ក្តីស្រឡាញ់» ដែលបានប្រព្រឹត្តនៅក្នុងបរិវេណនៃមជ្ឈមណ្ឌលជាតិផ្តល់ឈាម នាថ្ងៃទី ១៤ ខែកុម្ភៈ ឆ្នាំ ២០២៥ ដែលជាការសហការរៀបចំ និងឧបត្ថម្ភពីក្រុមហ៊ុន វ័ន ហ្វ្រេតធើនីធី (វីតាល់ និង មីជាតិ) ។
យុទ្ធនាការបរិច្ចាគឈាមនាថ្ងៃនេះបានរៀបចំឡើងក្នុងគោលបំណងជួបជុំអ្នកស្ម័គ្រចិត្តពីគ្រប់ទិសទី និងគ្រប់ស្រទាប់វណ្ណៈ រួមគ្នាផ្តល់អំណោយឈាម ដោយផ្សាភ្ជាប់អត្ថន័យនៃការចែករំលែកសេចក្តីស្រឡាញ់និងអំពើល្អ ជូនចំពោះខ្លួនឯង និងមនុស្សជុំវិញខ្លួន តាមរយៈការបរិច្ចាគឈាមដោយស្ម័គ្រចិត្ត ដែលចេញពីបេះដូងពោរពេញដោយមនោសញ្ចេតនា និងសាមគ្គីភាព ។
ឯកឧត្តមវេជ្ជបណ្ឌិត ហុក គឹមចេង អគ្គនាយកក្រសួងសុខាភិបាល បានកោតសរសើរចំពោះ មជ្ឈមណ្ឌលជាតិផ្ដល់ឈាម ក្នុងការរៀបចំកម្មវិធីបរិច្ចាគឈាមនាថ្ងៃនេះឡើងក្នុងគោលបំណងជួយជំរុញចលនាបរិច្ចាគឈាមស្ម័គ្រចិត្តឱ្យកាន់តែមានចំនួនច្រើនឡើងពីមួយឆ្នាំទៅមួយឆ្នាំ និងបានថ្លែងអំណរគុណដល់ សប្បុរសជនបរិច្ចាគឈាមស្ម័គ្រចិត្តគ្រប់រូប ដែលបានចូលរួមចំណែកធ្វើឱ្យប្រសើរឡើងនូវសុខភាព និងសុខមាលភាព របស់ប្រជាជនកម្ពុជា ដែលជាការចែករំលែកជីវិតដល់ជនរងគ្រោះ និងអ្នកជំងឺគ្រប់ប្រភេទ ជាច្រើននាក់នៅកម្ពុជា ។ ឆ្លៀតក្នុងឱកាសនេះ ឯកឧត្តមវេជ្ជបណ្ឌិត ក៏បានកោតសរសើរ និងវាយតម្លៃខ្ពស់ទៅដល់ក្រុមហ៊ុន វ័ន ហ្វ្រេតធើនីធី (វីតាល់ និង មីជាតិ) តែងតែងចូលរួមគាំទ្រ និងផ្សព្វផ្សាយនូវរាល់សកម្មភាពបរិច្ចាគឈាមនាពេលកន្លងមក ។
លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានឱ្យដឹងថា ក្នុងឆ្នាំ ២០២៥ នេះជាលើកទី៩ ដែលមជ្ឈមណ្ឌលជាតិផ្ដល់ឈាមនៃក្រសួងសុខាភិបាលបានរៀបចំឡើងយ៉ាងស្រស់ស្អាត ក្រោមប្រធានបទ «ផ្ដល់ឈាម ផ្ដល់ក្ដីស្រឡាញ់» គឺជាប្រធានបទដ៏មានអត្ថន័យសម្រាប់យើងទាំងអស់គ្នា និងមានគោលបំណងសំខាន់ ២ គឺ ៖ ដើម្បីបង្កលក្ខណៈឱ្យយុវជន យុវនារី ប្រជាជនទូទៅចែករំលែកក្តីស្រឡាញ់របស់គាត់ដោយចូលរួមបរិច្ចាគឈាមជួយដល់ជនរងគ្រោះដែលត្រូវការឈាម ។
ដើម្បីអំពាវនាវឱ្យគ្រប់អង្គភាព ស្ថាប័ន វិស័យឯកជន អង្គការជាតិ និងអន្តរជាតិចូលរួមចំណែកក្នុងភាពជាដៃគូជាមួយមជ្ឈមណ្ឌលជាតិផ្តល់ឈាមដើម្បីជំរុញលើកកម្ពស់ការបរិច្ចាគឈាមដោយស្មគ្រ័ចិត្ត ។ លោកវេជ្ជបណ្ឌិត បន្តថា យើងត្រូវការឈាមមួយប្លោក ដើម្បីជួយសង្គ្រោះជីវិតអ្នកជំងឺរៀងរាល់ ៥ នាទីម្តង ។ តម្រូវការឈាមប្រចាំថ្ងៃ សរុបមានពី ៣០០ ទៅ ៣៥០ ប្លោកនៅរាជធានីភ្នំពេញ ។ តាមតួលេខបានបង្ហាញថា តម្រូវការឈាមក្នុងឆ្នាំ ២០២៤ កន្លងមកនេះ មានចំនួនអ្នកបរិច្ចាគឈាមដោយស្ម័គ្រចិត្ដ និងមិនទទួលកម្រៃ ចំនួន ៣៥,៦៧៥ប្លោក ស្មើនឹង ២២.៤០% នៃអំណោយឈាមទាំងអស់ ១៦៦,៥២៤ប្លោក ។ តម្រូវការទូទាំងប្រទេសមានប្រមាណជាង ១៧៩,៣៣២ប្លោក ហើយមជ្ឈមណ្ឌលជាតិផ្តល់ឈាមបានគ្របដណ្តប់ជាង ៧៥%នៃការផ្គត់ផ្គង់ឈាមទូទាំងប្រទេស ។
លោកជំទាវ ជឹង សុគន្ធាវី នាយិកាប្រតិបត្តិក្រុមហ៊ុន វ័ន ហ្វ្រេតធើនីធី (វីតាល់ និងមីជាតិ) បានបង្ហាញការចាប់អារម្មណ៍ និងកោតសសើរថ្នាក់ដឹកនាំនៃមជ្ឈមណ្ឌលជាតិផ្ដល់ឈាម ដែលផ្តួចផ្តើមឱ្យមានការរៀបចំកម្មវិធីនេះយ៉ាងទៀតទាត់ និងរៀងរាល់ឆ្នាំ ដើម្បីជាលទ្ធភាព និងឱកាសនៃការជួបជុំអ្នកស្ម័គ្រចិត្ត ក្នុងការផ្តល់អំណោយឈាម និងអត្ថន័យនៃការចែករំលែកសេចក្តីស្រឡាញ់ ជូនខ្លួនឯង ជូនមនុស្សជាទីស្រឡាញ់ និងមនុស្សជុំវិញខ្លួន ។
លោកជំទាវ បន្តមានប្រសាសន៍ថា វីតាល់ ក្រៅពីផ្តល់ជូននូវ ទឹកពិសាដែលមានគុណភាព, សុវត្ថិភាព, និងអនាម័យខ្ពស់ វីតាល់ តាមរយៈ មូលនិធិ ២៥រៀល បានចូលរួមចំណែកក្នុងទំនួលខុសត្រូវចំពោះការងារអភិវឌ្ឍសង្គម ជាមួយសកម្មភាពសប្បុរសធម៌នានា ដោយឈរលើសសរស្តុម្ភ ៤ ចំបង រួមមាន ៖ វិស័យអប់រំ, បរិស្ថាន, សុខាភិបាល-កីឡា និងសង្គម វប្បធម៌ សម្រាប់ជាគុណប្រយោជន៏ជូនសង្គមជាតិ និងដល់អតិថិជនរបស់យើង ។ វីតាល់ប្តេជ្ញានឹងបន្តចូលរួមឧបត្ថម្ភគាំទ្រដល់សកម្មភាពការងារ របស់មជ្ឈមណ្ឌលជាតិផ្ដល់ឈាម និងដំណើរការប្រមូលឈាម រួមទាំងយុទ្ធនាការ នៃការចុះប្រមូលផ្តល់អំណោយឈាម ដែលឈានទៅដល់ការពង្រីកវិសាលភាពប្រមូលឈាមបន្ថែមនៅតាមបណ្ដាខេត្ត នាថ្ងៃអនាគតផងដែរ ។
នេះជាកិច្ចសហការរៀបចំ និងឧបត្ថម្ភគាំទ្រពីសំណាក់ វីតាល់ និងមីជាតិ ដែលសបញ្ជាក់យ៉ាងច្បាស់អំពីការចូលរួមយ៉ាងសកម្មក្នុងសកម្មភាពទំនួលខុសត្រូវសង្គមជាមួយនឹងការយកចិត្តទុកដាក់ ការស្រឡាញ់ និងចូលរួម ដើម្បីជាប្រយោជន៍ដល់សហគមន៍ និងសង្គមជាតិ ពីស្លាកសញ្ញា នៃផលិតផលរបស់ក្រុមហ៊ុន វ័ន ហ្វ្រេតធើនីធី។ «វីតាល់មោទនភាព ផលិតផលជាតិ» ៕ អត្ថបទសហការ
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ