ស្រុកសន្ទុក ៖ ថ្នាក់ដឹកនាំ កងកម្លាំងប្រដាប់អាវុធ និងអង្គការមហាជននៅក្នុងស្រុកសន្ទុកខេត្តកំពង់ធំ នៅព្រឹកថ្ងៃទី៧មករាឆ្នាំ២០២៥បានមកជួបជុំគ្នានៅបរិវេណទីស្នាក់ការគបក្សប្រជាជនកម្ពុជាស្រុកសន្ទុកប្រារព្វមិទ្ទិញអបអរសាទរខួប លើកទី៤៦ទិវាជ័យជម្នះ៧មករា (៧មករា១៩៧៩-​៧មករា ២០២៥)ក្រោមអធិតីភាពឯកឧត្ដម ស៊ុសន្និសិទ្ធ សមាជិកកណ្តាលគណបក្សប្រជាជនកម្ពុជា និងជាអនុប្រធានទី១ក្រុមការងារថ្នាក់កណ្តាលចុះមូលដ្ឋានស្រុកសន្ទុក។

នៅក្នុងមិទ្ទិញអបអរសាទរខួប លើកទី៤៦ទិវាជ័យជម្នះ៧មករានេះឯកឧត្ដម ស៊ុសន្និសិទ្ធបានអានសុន្ទរកថារបស់សម្ដេចតេជោ ហ៊ុន សែនប្រធានគណបក្សប្រជាជនកម្ពុជាជូនអង្គមិទ្ទិញដែលក្នុងនោះបានបញ្ជាក់យ៉ាងច្បាស់ថា÷ ៤៦ឆ្នាំក្រោយការរំដោះចេញពីរបបវាលពិឃាត ប៉ុលពត, កម្ពុជាបានប្រែក្លាយទៅជាប្រទេសមានមុខមាត់ថ្មីតាមរយៈការអភិវឌ្ឍជាជំហ៊ាន និងបានសាងកិត្យានុភាពលើឆាកអន្តរជាតិជាថ្មីផងដែរ។

មិនតែប៉ុណ្ណោះកម្ពុជាបានប្រែក្លាយពីប្រទេសមានប្រជាជនត្រឹម ៥លាននាក់ មកជាប្រទេសមានប្រជាពលរដ្ឋប្រមាណជា ១៧លាននាក់, ពីប្រទេសគ្មានចំណូលសេដ្ឋកិច្ចជាតិក្លាយជាប្រទេសមានចំណូលសេដ្ឋកិច្ចជាង ២៤ពាន់លានដុល្លារ, ប្រជាពលរដ្ឋដែលធ្លាប់តែគ្មានស្គាល់ក្រដាស់ប្រាក់ គ្មានស្គាល់អ្វីទៅជាចំណូលប្រចាំឆ្នាំ បានក្លាយជាអ្នកអាចរកចំណូលប្រចាំឆ្នាំជាង ១៥០០ដុល្លារ, កម្ពុជា ដែលធ្លាប់តែគ្មានការដោះដូរពាណិជ្ជកម្ម ក្លាយជាប្រទេសមានទំហំពាណិជ្ជកម្មប្រមាណ ២៥ពាន់លានដុល្លារ ជាមួយការនាំចេញជាង ១២ពាន់លានដុល្លារ, ប្រទេសគ្មានការវិនិយោគពីខាងក្រៅ មកជាប្រទេសមានទំហំវិនិយោគពីខាងក្រៅប្រមាណរាប់ពាន់លានដុល្លារ, កម្ពុជា ដែលធ្លាប់តែគ្មានធនធានមនុស្ស បានបណ្តុះបណ្តាលធនធានមនុស្សយ៉ាងច្រើន ហើយកំពុងបន្តធ្វើការងារលើការបណ្តុះបណ្តាលយ៉ាងសកម្ម, កម្ពុជា ដែលធ្លាប់គ្មានកន្លែងព្យាបាល ក្លាយជាប្រទេសកំពុងមានភាពប្រសើរឡើងលើវិស័យសុខាភិបាល, កម្ពុជា ដែលធ្លាប់គ្មានអ្នកទេសចរ ក្លាយជាប្រទេសស្វាគមន៍អ្នកទេសចរបរទេសរាប់លាននាក់។

និយាយជារួមមកក្រោយថ្ងៃរំដោះ៧មករា រយៈពេល៤៦ឆ្នាំ កន្លងមកនេះប្រជាជាតិកម្ពុជា បានរស់ជាមួយមុខមាត់ថ្មីដែលពោរពេញដោយសុខសិរី វិបុលភាព និងក្តីសង្ឃឹមកាន់តែខ្លាំងក្លាក្នុងការបោះជំហានទៅរកភាពរុងរឿង និងសុខសុភមង្គលវិបុលភាពកាន់តែខ្លាំងសម្រាប់មនុស្សជំនាន់ក្រោយ និងយូរអង្វែង ។ ដូចនេះថ្ងៃ៧មករាគឺជាថ្ងៃកំណើតទី២របស់យើងទាំងអស់គ្នា។ មាន៧ មករា ទើបមានអ្វីៗដូចសព្វថ្ងៃនេះ។ ហើយ៧ មករា បាននាំមកនូវការអភិវឌ្ឍលើគ្រប់វិស័យរួមមានផ្លូវថ្នល់ សាលារៀន មន្ទីរពេទ្យ ប្រព័ន្ធទឹក ភ្លើង វត្តអារាម និងសមិទ្ធផលដ៏សំខាន់ជាច្រើនទៀត។

នៅក្នុងឱកាសនោះតំណាងអង្គមិទ្ទិញបានសម្ដែងការដឹងគុណយ៉ាងជ្រាលជ្រៅចំពោះថ្ងៃ៧មករា និងប្ដេជ្ញាចិត្តចូលរួមជាមួយសម្ដេចតេជោ ហ៊ុន សែន ដើម្បីថែរក្សាការពារសុខសន្តិភាព ស្ថិរភាពនយោ​បាយ និងការអភិវឌ្ឍដែលកម្ពុជាកំពុងមានសព្វថ្ងៃដើម្បីឲ្យកម្ពុជាមានឱកាសបន្តការអភិវឌ្ឍរីកចម្រើនទៅមុខបន្ថែមទៀតនិងបានប្ដេជ្ញាថានឹងឆ្លាក់ទុកស្មារតី៧មករា ស្ថិតនៅក្នុងក្រអៅបេះ​ដូងប្រជាពលរដ្ឋគ្រប់ៗរូប និងជានិមិត្តរូបនៃសាមគ្គីជាតិ និងមហាគ្រួសារខ្មែរជាអមតៈ ក្រោមម្លប់សុខសន្តិភាពជានិច្ចនិរន្ត៍ថែមទៀតផង ៕ សហការ