ADផ្ទាំងផ្សព្វផ្សាយពាណិជ្ជកម្ម

បើកូនធាត់ពេកឪពុកម្តាយគប្បីធ្វើបែបណា ?

2 ថ្ងៃ មុន

០៧ ខែ មករា ឆ្នាំ ២០២៥ ម៉ោង ១១:០១

រាជធានីភ្នំពេញ ៖ ការធាត់ក្នុងវ័យកុមារអាចបង្កជាក្តីកង្វល់សម្រាប់ឪពុកម្តាយជាច្រើន ។ ការធាត់លើសទម្ងន់ គឺជាបញ្ហាស្មុគស្មាញ ដែលបណ្តាលមកពីមូលហេតុជាច្រើនរួមមាន ៖ បញ្ហាអាហារូបត្ថម្ភ លំនាំនៃការញ៉ាំ កម្រិតសកម្មភាពរាងកាយ ការគេងមិនគ្រប់គ្រាន់ ហ្សែន និងភាពតានតឹងផ្លូវចិត្ត ។ ក្នុងករណីខ្លះ ការលើសទម្ងន់របស់កុមារអាចបណ្តាលមកពីជំងឺ ឬថ្នាំមួយចំនួន ។ កុមារដែលទទួលទានកាឡូរីច្រើនពេក ហើយមិនបានធ្វើលំហាត់ប្រាណ ឬគេងគ្រប់គ្រាន់អាចប្រឈមនឹងការធាត់លើសទម្ងន់ ។ កុមារខ្លះមិនបានញ៉ាំអាហារដែលមានសុខភាពល្អដូចជាផ្លែឈើ និងបន្លែច្រើននោះទេ ។ កុមារជាច្រើនមិនទទួលបានសកម្មភាពរាងកាយគ្រប់គ្រាន់ទេ ដោយសារតែកុមារកាន់តែច្រើនចូលចិត្តមើលទូរទស្សន៍ ឬលេងហ្គេមវីដេអូជាដើម ។

ដើម្បីជួយទប់ទល់នឹងកត្តាទាំងនេះ ឪពុកម្តាយអាចធ្វើការផ្លាស់ប្តូរនៅក្នុងជីវិតរបស់កូន ៖
១. ផ្លាស់ទីឱ្យបានកាន់តែច្រើនជាមួយគ្រួសារ ។ កុមារដែលមានអាយុពី ៣ ទៅ ៥ ឆ្នាំគួរតែធ្វើសកម្មភាពរាងកាយពេញមួយថ្ងៃ ។ នេះរួមបញ្ចូលទាំងការលេងយ៉ាងសកម្ម ការជិះកង់ និងការលោតលេង ។ ក្មេងដែលមានអាយុពី ៦ ទៅ ១៧ ឆ្នាំត្រូវការយ៉ាងហោចណាស់ ៦០ នាទីនៃសកម្មភាពរាងកាយពីមធ្យមទៅខ្លាំងជារៀងរាល់ថ្ងៃ ។ ដូច្នេះសូមធ្វើជាគំរូល្អសម្រាប់កូនរបស់អ្នក ដោយធ្វើខ្លួនឯងឱ្យសកម្ម ។ ចូរធ្វើឱ្យលំហាត់ប្រាណក្លាយជាផ្នែកមួយនៃទម្លាប់ប្រចាំថ្ងៃរបស់អ្នក ។ សាកល្បងដើរលេងជាលក្ខណៈគ្រួសារ រាំ ជិះកង់ ឬលេងហ្គេមក្រៅផ្ទះជាមួយគ្នាឱ្យបានញឹកញាប់តាមដែលអ្នកអាចធ្វើបាន ។

២. បង្កើតទម្លាប់នៃការគេងឱ្យបានទៀងទាត់ ។ ការគេងល្អ ជួយការពារជំងឺផ្សេងៗ រួមមានជំងឺទឹកនោមផ្អែមប្រភេទទី ២ ការធាត់លើសទម្ងន់ ការរងរបួស បញ្ហាជាមួយការយកចិត្តទុកដាក់ និងបញ្ហាអាកប្បកិរិយា ។ កុមារដែលគេងមិនបានគ្រប់គ្រាន់ប្រឈមនឹងការឡើងទម្ងន់មិនល្អ។ ចូរដកអេក្រង់ទូរទស្សន៍ ឬកុំព្យូរទ័រចេញពីបន្ទប់របស់កូនអ្នក ។ អនុវត្តតាមកាលវិភាគគេងជាប់លាប់ សូម្បីតែនៅចុងសប្តាហ៍ក៏ដោយ វាអាចជួយឱ្យកុមារគេងលក់ស្រួល ។

៣. ធ្វើគំរូផែនការអាហារដែលមានសុខភាពល្អ ។ ការធ្វើតាមរបបអាហារដែលមានសុខភាពល្អអាចជួយឱ្យកុមារ និងក្រុមគ្រួសាររបស់អ្នករក្សាទម្ងន់ដែលមានសុខភាពល្អ ។ អាហារដែលមានសុខភាពល្អ និងជីវជាតិរួមមានបន្លែ ផ្លែឈើជាច្រើនប្រភេទ គ្រាប់ធញ្ញជាតិ អាហារប្រូតេអ៊ីនគ្មានខ្លាញ់ ផលិតផលទឹកដោះគោគ្មានជាតិខ្លាញ់ ។ កុំឱ្យកូនរបស់អ្នកញ៉ាំទឹកក្រូច នំមានរសជាតិផ្អែមខ្លាំងញឹកញាប់ពេក ។

៤. ពិនិត្យមើលបរិមាណអាហារ និងសារធាតុផ្សំដែលកូនរបស់អ្នកញ៉ាំឱ្យបានដិតដល់ ។ ត្រូវប្រាកដថា បរិមាណអាហារដែលកូនរបស់អ្នកញ៉ាំស្ថិតនៅក្នុងការណែនាំរបស់គ្រូពេទ្យ ។

៥. កំណត់ពេលវេលាអេក្រង់ទូរទស្សន៍ ទូរសព្ទ និងកុំព្យូទ័រ ។ ពេលវេលាអេក្រង់ច្រើនពេកអាចធ្វើឱ្យក្មេងគេងមិនលក់ ឡើងទម្ងន់ ធ្លាក់ចំណាត់ថ្នាក់សិក្សា និងសុខភាពផ្លូវចិត្តមិនល្អ ៕ ប្រភព ៖ urmc

អត្ថបទនេះផលិតឡើងក្រោមកិច្ចសហប្រតិបត្តិការជាមួយសាលារៀនវ៉េស្ទឡាញន៍ និងសាលារៀនណត្សឡាញន៍ ។ សាលារៀនមានកម្មវិធីអប់រំ និងថែទាំកុមារតូច មតេ្តយ្យ ភាសាអង់គ្លេសសម្រាប់កុមារ ភាសាអង់គ្លេសសម្រាប់សិស្សធំ ភាសាចិន និងចំណេះទូទៅខ្មែរពីថ្នាក់ទី ១ ដល់ទី ១២ ។ សាលារៀនផ្តល់ជូនការធានារ៉ាប់រងគ្រោះថ្នាក់បុត្រធីតា ការការពារការសិក្សាបុត្រធីតារហូតដល់ ៥ ឆ្នាំ សេវាកម្មគាំទ្រ និងកម្មវិធីសិក្សាបន្ថែមសម្បូរបែបសម្របតាមបំណិនសតវត្សរ៍ទី ២១ ។ សាលារៀនចាប់ទទួលចុះឈ្មោះសិស្សចូលរៀនរាល់ថ្ងៃ ។ សម្រាប់ព័ត៌មានបន្ថែម សូមទំនាក់ទំនងទូរស័ព្ទលេខ ៖ ០៩២ ៨៨៨ ៤៩៩ / ០១៥ ៨០៥ ១២៣ ៕