រាជធានីភ្នំពេញ ៖ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យគណៈប្រតិភូធនាគាររដ្ឋប៉ាគីស្ថាន (The State…
រាជធានីភ្នំពេញ ៖ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យគណៈប្រតិភូធនាគាររដ្ឋប៉ាគីស្ថាន (The State Bank of Pakistan) និងក្រុមហ៊ុន SORAMITSU Holdings AG. ចូលជួបពិភាក្សាការងារ នារសៀលថ្ងៃទី ៦ ខែមករា ឆ្នាំ ២០២៥ នៅធនាគារជាតិនៃកម្ពុជា អគារវត្តភ្នំ ។
ជំនួបនេះមានគោលបំណងស្វែងរកលទ្ធភាពបង្កើតកិច្ចសហប្រតិបត្តិការរវាង ធនាគារជាតិនៃកម្ពុជា និងធនាគាររដ្ឋប៉ាគីស្ថាន ក៏ដូចជាផ្តល់ឱកាសដល់គណៈប្រតិភូធនាគាររដ្ឋប៉ាគីស្ថាន បានស្វែងយល់អំពីប្រតិបត្តិការប្រព័ន្ធទូទាត់បាគង ស្របពេលដែលធនាគាររដ្ឋប៉ាគីស្ថានកំពុងរៀបចំផែនការដាក់ឱ្យប្រើប្រាស់រូបិយប័ណ្ណឌីជីថលធនាគារកណ្តាល (Central Bank Digital Currency – CBDC) របស់ខ្លួន ។
ក្នុងជំនួបនេះ លោកជំទាវទេសាភិបាល បានលើកឡើងអំពីប្រវត្តិប្រព័ន្ធរូបិយវត្ថុកម្ពុជា និងដំណើរឆ្លងកាត់ដំណាក់កាលសំខាន់ៗមួយចំនួន ព្រមទាំងវឌ្ឍនភាពគួរឱ្យកត់សម្គាល់នៃប្រព័ន្ធរូបិយវត្ថុកម្ពុជានាពេលបច្ចុប្បន្ន ។ លោកជំទាវក៏បានបញ្ជាក់ពីការរីកចម្រើនយ៉ាងឆាប់រហ័សនៃប្រព័ន្ធទូទាត់តាមឃ្យូអរកូតនៅកម្ពុជា ដែលកំពុងត្រូវបានប្រើប្រាស់យ៉ាងទូលំទូលាយនៅទូទាំងប្រទេស ព្រមទាំងសារៈសំខាន់នៃការរក្សាបានស្ថិរភាពហិរញ្ញវត្ថុ ស្របពេលមានការអភិវឌ្ឍនវានុវត្តន៍ហិរញ្ញវត្ថុឌីជីថល ។
ក្នុងឱកាសនេះដែរ គណៈប្រតិភូធនាគាររដ្ឋប៉ាគីស្ថាន ក៏បានជម្រាបជូនលោកជំទាវទេសាភិបាល អំពីដំណើរការអភិវឌ្ឍប្រព័ន្ធទូទាត់ប៉ាគីស្ថាន បញ្ហាប្រឈមនានា និងគម្រោងធ្វើទំនើបកម្មប្រព័ន្ធទូទាត់ឌីជីថល សំដៅផ្តល់ភាពងាយស្រួល តម្លៃទាប និងសុវត្ថិភាពដល់អ្នកប្រើប្រាស់។ ជារួម កិច្ចពិភាក្សាបានប្រព្រឹត្តិទៅយ៉ាងរលូន ហើយភាគីទាំងពីរបានឯកភាពក្នុងការស្វែងរកលទ្ធភាពបង្កើតកិច្ចសហប្រតិបត្តិការនាពេលខាងមុខ ៕ អត្ថបទសហការ
ចែករំលែកព័តមាននេះ