រាជធានីភ្នំពេញ៖ នៅថ្ងៃ​ទី10 ខែធ្នូ ឆ្នាំ2024 ធនាគារ ABA បាន​ចុះ​អនុស្សរណៈ​នៃ​ការ​យោគយល់ (MoU) ជាមួយ​សមាគម​ពាណិជ្ជករ​គ្រឿងអលង្ការ និង​ត្បូង​មាន​តម្លៃ​កម្ពុជា (CGJTA)​។ សមាគម​នេះ​តំណាង​ឲ្យ​អាជីវកម្ម​ក្នុង​វិស័យ​ត្បូង និង​គ្រឿងអលង្ការ ក្នុង​ការ​ពង្រឹង​ពាណិជ្ជកម្ម​ដល់ទី​ផ្សារ​អន្តរជាតិ និង​ចាប់​ដៃគូ ដើម្បី​ទាក់ទាញ​ការ​វិនិយោគ ព្រមទាំង​លើកកម្ពស់​ស្នាដៃ​សិប្បករ ​ក្នុងស្រុក​ទៅ​កាន់​ពិភពលោក ​។

ក្រោម​កិច្ចព្រមព្រៀង​ភាព​ជា​ដៃគូ​នេះ ធនាគារ ABA នឹង​ផ្តល់​ជូន​នូវ​សេវាកម្ម​ធនាគារ​ដ៏​ទំនើប​សម្បូរ​បែប​នេះ ដើម្បី​បំពេញតម្រូវការ​របស់​សមាជិក សមាជិការ​សមាគម​។ សេវា​ធនាគារ​ទាំងនេះ​រួម​មាន សេវា​ទូទាត់​ប្រាក់​សម្រាប់​សមាគម និង​សមាជិក​, សេវា​ហិរញ្ញប្បទាន​ពាណិជ្ជកម្ម ដើម្បី​គាំទ្រ​ប្រតិបត្តិការ​នាំ​ចូល និង​នាំ​ចេញ​, សេវា​ផ្តល់​ប្រាក់​កម្ចី​ដែល​មានការ​ប្រាក់​ទាប ដើម្បី​ជួយ​ពង្រីក​អាជីវកម្ម​, សេវា​ផ្ទេរ​ប្រាក់​អន្តរជាតិ សម្រាប់​ប្រតិបត្តិការ​ក្រៅប្រទេស​, និង​សេវា​ហិរញ្ញវត្ថុ​សំខាន់​ៗ​ផ្សេង​ទៀត ដែល​ជា​តម្រូវការ​របស់​ពាណិជ្ជករ​ត្បូង និង​គ្រឿងអលង្ការ​ ។ សេវា​ធនាគារ​របស់ ABA ជួយ​បង្កើន​ប្រសិទ្ធភាព និង​ពង្រីក​អាជីវកម្ម​របស់​សមាជិកសមាគម ដែល​សុទ្ធតែ​ជា​ពាណិជ្ជករ អាជីវករ និង​អតិថិជន បាន​គ្រប់ពេល​ ។

ពិធី​ចុះហត្ថលេខា​លើ​អនុស្សរណៈ​យោគយល់​នេះ ធ្វើ​ឡើង​នៅ​ការិយាល័យ​កណ្តាល​របស់​ធនាគារ ABA ដោយ​មានការ​ចូលរួម​ពី​នាយក​ប្រតិបត្តិ​ធនាគារ ABA លោក Askhat Azhikhanov និង​ប្រធាន​សមាគម​ពាណិជ្ជករ​គ្រឿងអលង្ការ និង​ត្បូ​វ​មាន​តម្លៃ​កម្ពុជា លោក​ជំទាវ ញ៉ែ​ត ស្រី​អូន រួម​ទាំង​ថ្នាក់ដឹកនាំ​ទាំង​ពីរ​ស្ថាប័ន​ ។

លោក Askhat Azhikhanov មាន​ប្រសាសន៍​ថា «ធនាគារ​យើង​យល់​យ៉ាង​ច្បាស់ អំពី​ការ​រួមចំណែក​របស់​វិស័យ​ត្បូង និង​គ្រឿងអលង្ការ​ដល់​សេដ្ឋកិច្ច​កម្ពុជា តាម​រយៈ​ការ​បង្កើត​ការងារ និង​ជួយ​លើក​ស្ទួយ​ជីវភាព​របស់​ប្រជាពលរដ្ឋ​រាប់​ពាន់​គ្រួសារ ​។ ធនាគារ ABA ត្រៀមខ្លួន​រួច​ជា​ស្រេច ក្នុង​ការ​គាំទ្រ​សមាជិក​របស់​សមាគម តាម​រយៈ​ការ​ផ្តល់​សេវា​ហរិ​ញ្ញ​វត្ថុ ដែល​ស្រប​តាម​តម្រូវការ​របស់​សមាជិក និង​សម្រាប់​ជា​ប្រយោជន៍​ ដល់​ការ​ពង្រីក​អាជីវកម្ម ឬ​ការ​គ្រប់គ្រង​ហិរញ្ញវត្ថុ​រូបវន្តបុគ្គល​» ​។

លោក​ជំទាវ ញ៉ែ​ត ស្រី​អូន ប្រធាន​សមាគម​ពាណិជ្ជករ​គ្រឿងអលង្ការ និង​ត្បូ​វ​មាន​តម្លៃ​កម្ពុជា មាន​ប្រសាសន៍​ថា៖ «​យើងខ្ញុំ​មាន​កិត្តិយស​ក្រៃ​លែង ដែល​បាន​សហការ​ជា​ដៃគូ​ជាមួយ​ធនាគារ ABA ដើម្បី​ផ្តល់​ជូន​សមាជិក​របស់​យើង នូវ​សេវា​ហិរញ្ញវត្ថុ​នវានុវត្តន៍​។ កិច្ចសហការ​នេះ ផ្តោត​លើ​ការ​អនុវត្ត​ច្បាប់​ស្តី​ពី​ប្រតិបត្តិការ​ដែល​មាន​កិច្ចធានា ដើម្បី​ការ​ការពារ​ទូទាត់​ប្រាក់​របស់ ពាណិជ្ជករ អាជីវករ និង​អតិថិជន​អ្នក​និយម​ប្រើប្រាស់ ទិញ លក់ គ្រឿងអលង្ការ និង​ត្បូង​កម្ពុជា ដោយ​ទំនុកចិត្ត​» ។​

លោក​ជំទាវ​បាន​បន្ត​ទៀត​ថា៖ «​កិច្ចសហការ​នេះ នឹង​ផ្តល់​លទ្ធភាព​ដល់​សមាជិក​របស់​សមាគម ក្នុង​ការ ធ្វើ​ឲ្យ​ពាណិជ្ជកម្ម​ជោគជ័យ និង​រួមចំណែក​ដល់​វឌ្ឍនភាព​នៃ​ឧស្សាហកម្ម​ត្បូង និង​គ្រឿងអលង្ការ​នៅ​កម្ពុជា» ​។​

ភាព​ជា​ដៃគូ​របស់​ធនាគារ ABA ជាមួយ សមាគម​ពាណិជ្ជករ​គ្រឿងអលង្ការ និង​ត្បូង​មាន​តម្លៃ​កម្ពុជា បង្ហាញ​ពី​ការ​ប្តេជ្ញា​ចិត្ត​យ៉ាង​មុតមាំ ក្នុង​ការ​ជួយ​ដល់​ការ​រីក​ចម្រើន និង​ការ​អភិវឌ្ឍ​ឧស្សាហកម្ម​ត្បូង និង​គ្រឿងអលង្ការ​នៅ​កម្ពុជា​ ។ តាម​រយៈ​ការ​ប្រើប្រាស់​ផលិតផល និង​សេវា​ធនាគារ​ដ៏​ល្អ​ឯក​របស់ ABA សមាជិក​ទាំងអស់​នៃ​សមាគម​អាច​ផ្តោត​លើ​ការ​ពង្រីក​ប្រតិបត្តិការ​របស់​ពួក​គាត់ និង​អាច​បង្ហាញ​សិល្បៈ​ហត្ថកម្ម ប្រកបដោយ​ភាព​ច្នៃ​ប្រណិត​ខ្ពស់​របស់​កម្ពុជា នៅ​ទូ​ទាំង​ពិភពលោក ​។

អំពី​ធនាគារ ABA
ABA គឺជា​ធនាគារពាណិជ្ជ​ធំ​ជាងគេ​នៅ​កម្ពុជា គិត​លើ​ទ្រព្យសកម្ម​សរុប ប្រាក់​បញ្ញើ និង​ប្រាក់​កម្ចី យោង​តាម​របាយការណ៍​ត្រួតពិនិត្យ​ប្រចាំឆ្នាំ​របស់​ធនាគារជាតិ​នៃ​កម្ពុជា​ឆ្នាំ 2021-2023​។ គិត​ត្រឹម​ថ្ងៃ​ទី 30 ខែកញ្ញា ឆ្នាំ​2024 ទ្រព្យសកម្ម​របស់​ធនាគារ កើនឡើង​ដល់ 13 ប៊ី​លាន​ដុល្លារ ប្រាក់​បញ្ញើ​សរុប​ចំនួន 10.4 ប៊ី​លាន​ដុល្លារ និង​ឥណទាន​ចំនួន 8.5 ប៊ី​លាន​ដុល្លារ ​។

ធនាគារ ABA មាន 99 សាខា​, ទីតាំង​ស្វ័​យ​សេវា ABA 24/7 ចំនួន 46​កន្លែង​, ម៉ាស៊ីន​ស្វ័​យ​សេវា​ជាង 1,700 នៅ​ទូ​ទាំង​ប្រទេស​, សេវា​ធនាគារ​អន​ឡាញ និង​កម្មវិធី​ធនាគារ​តាម​ទូរស័ព្ទ​ដ៏​ទំនើប បាន​ធ្វើ​ឲ្យ​ធនាគារ ABA មាន​អតិថិជន​ជាង 4 លាន​នាក់ ដែល​កំពុង​ប្រើប្រាស់​សេវា​ហិរញ្ញវត្ថុ​ដ៏​ទំនើប​សម្បូរ​បែប​នេះ ​៕ អត្ថបទសហការ