ADផ្ទាំងផ្សព្វផ្សាយពាណិជ្ជកម្ម

ឯកឧត្តម បណ្ឌិត ថោង ខុន រំលឹកទ្បើងវិញពីជោគជ័យជាប្រវត្តិសាស្ត្រ ការរៀបចំព្រឹត្តិការណ៍ស៊ីហ្គេម លើកទី ៣២ ដែលកម្ពុជាធ្វើជាម្ចាស់ផ្ទះ

1 ថ្ងៃ មុន

០១ ខែ វិច្ឆិកា ឆ្នាំ ២០២៤ ម៉ោង ០៩:៤៥

រាជធានីភ្នំពេញ ៖ នៅក្នុងសុន្ទរកថា ដ៏មានអត្ថន័យជ្រាលជ្រៅ របស់ឯកឧត្តមបណ្ឌិត ថោង ខុន ទេសរដ្ឋមន្ត្រីទទួលបន្ទុកជំរុញការអភិវឌ្ឍចលនាកីឡា និងជាប្រធានគណៈកម្មាធិការជាតិអូឡាំពិកកម្ពុជា ក្នុងពិធីបើកការប្រកួតកីឡាជាតិលើកទី ៤ និងកីឡាជាតិជនពិការលើកទី ២ ឆ្នាំ ២០២៤ នៅ
ពហុកីឡដ្ឋានជាតិ អូឡាំពិក នាថ្ងៃទី ៣០ ខែតុលា ឆ្នាំ ២០២៤ លោកបណ្ឌិត បានរំលឹកទ្បើងវិញនូវមហាជោគជ័យជាប្រវត្តិសាស្ត្រសំខាន់ៗក្នុងការរៀបចំធ្វើជាម្ចាស់ផ្ទះការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេមលើកទី ១២ ឆ្នាំ ២០២៣ នៅកម្ពុជា ក្រោមការដឹកនាំដ៏ត្រឹមត្រូវ ប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ។

ឯកឧត្តមបណ្ឌិត ថោង ខុន ថ្លែងថា ជោគជ័យខាងលើនេះ បានបង្កើតកំណត់ត្រាប្រវត្តិសាស្ត្រថ្មី ក្នុងប្រវត្តិនៃព្រឹត្តិការណ៍ កីឡាស៊ីហ្គេម-អាស៊ានប៉ារ៉ាហ្គេម មានដូចជា ក្នុងនាម ម្ចាស់ផ្ទះ កម្ពុជាបានផ្តល់ទស្សនាទានថ្មី សម្រាប់ចលនាអូឡាំពិក អន្តរជាតិដែលជាប្រវត្តិសាស្ត្រ ពុំធ្លាប់មានសម្រាប់ព្រឹត្តិការណ៍កម្រិតតំបន់ ក៏ដូចជាព្រឹត្តិការណ៍កម្រិតអូឡាំពិក ខណ ដែលកម្ពិជាបានផ្តល់ជូននូវ ការមិនយកថ្លៃ សម្រាប់ការស្នាក់នៅ ហូបចុក ដឹកជញ្ជូនពីប្រតិភូកីឡាគ្រប់ប្រទេស ដែលបានចូលរួម ។ មិនលក់សំបុត្រចូលទស្សនា ពិធីបើក-បិទ និងគ្រប់ការប្រកួតកីឡា ។ មិនយកថ្លៃ សិទ្ធផ្សាយទូរទស្សន៍” គ្រប់ប្រព័ន្ធផ្សព្វផ្សាយជាតិ និងអន្តរជាតិ ។ មិនយកថ្លៃទិដ្ឋាការសម្រាប់ប្រតិភូកីឡា និងមន្ត្រីបច្ចេកទេសអន្តរជាតិទាំងអស់ ។ មិនយកថ្លៃចូលទស្សនាប្រាសាទអង្គវត្តសម្រាប់ប្រតិភូកីឡាទាំងអស់ជាដើម ។

ឯកឧត្តមបណ្ឌិត ក៏បានបញ្ជាក់ដែរថា ការរៀបចំព្រះរាជពិធីប្រោសព្រះរាជទាន ព្រះអគ្គិជ័យកីឡា នៅមុខប្រាសាទ អង្គរវត្ត និងពិធីដង្ហែរភ្លើងគប់ព្រះអគ្គិជ័យកីឡា ជាប្រវត្តិសាស្ត្រ បានផ្តល់ នូវមហាកិត្តិយសជាតិដ៏ធំធេង និងសម្រែកគាំទ្រ ជាចលនាជាតិនិយមមោទនភាពជាតិខ្មែរ ដ៏ត្រចះត្រចង់ ។ ទន្ទឹមនោះពិធីបើក-បិទព្រឹត្តិការណ៍ស៊ីហ្គេម-អាស៊ានប៉ារ៉ាហ្គេមជាផ្លូវការកម្រិតស្តង់ដា អូឡាំពិកបានបង្កើតនូវភាពភ្ញាក់ផ្អើល និងភាពអស្ចារ្យបំផុត ប្រកបដោយ ប្រណិតភាព និងភាពឥតខ្ចោះក្នុងការបង្ហាញវប្បធម៌-អរិយធម៌អង្គរដ៏រុងរឿង និងបានបង្ហាញសក្តានុពលជាតិគ្រប់វិស័យ ធ្វើឱ្យមានការភ្ញាក់ផ្អើល ដល់ចលនាអូឡាំពិកអន្តរជាតិ-ប៉ារ៉ាឡាំពិកអន្តរជាតិ ។

ឯកឧត្តមបណ្ឌិត ថោង ខុន បានបន្ថែមថា ព្រឹត្តិការណ៍ស៊ីហ្គេមនៅកម្ពុជា ជាប់ឯកត្តកម្មដែលទាក់ទាញអ្នកទស្សនាច្រើនជាងគេ ធៀបនឹងព្រឹត្តិការណ៍ស៊ីហ្គេមមុនៗ ដោយគិតមក ដល់ពេលនេះចំនួនអ្នកចូលទស្សនា តាមគ្រប់បណ្តាញផ្សព្វផ្សាយបានកើនឡើងរាប់ពាន់លាន Views ជុំវិញពិភពលោក ដែលភាគច្រើនគឺ ពិធីបើក និង កីឡាការិនី ប៊ូ សំណាង ដែលបានឈ្នះ បេះដូងអ្នកគាំទ្រ ។

បណ្ឌិតថែមទាំងបានលើកទ្បើងផងដែរ អំពីមេដាយដែលកីទ្បាករ កីទ្បាការិនីកម្ពុជា ទទួលបានក្នុងព្រឹត្តិការណ៍ស៊ីហ្គេមលើកទី៣២ នៅកម្ពុជាដែលក្នុងនោះ អត្តពលិកកម្ពុជាដណ្តើមបានមេដាយមាស ៨១គ្រឿង មេដាយប្រាក់ ៧៤ គ្រឿង និងមេដាយសំរឹទ្ធ ១២៧ គ្រឿង សរុបចំនួន ២៨២ គ្រឿង ឈរលើចំណត់ថ្នាក់ទី៤ ក្នុងចំណោម ១១ប្រទេស ដែលជាឯកត្តកម្មមេដាយច្រើនបំផុតដែលកម្ពុជាដណ្តើមបាន ។

ឯកឧត្តមបណ្ឌិត ថោង ខុន បន្តថា ក្រោមការដឹកនាំដ៏ឈ្លាសវៃ ប្រកបដោយថាមពល និងទស្សនវិស័យទំនើបជឿនលឿនរបស់ សម្តេចមហាបវរធិបតីនាយករដ្ឋមន្ត្រី ដែលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ក្នុងការកសាងមូលដ្ឋានគ្រឹះឆ្ពោះទៅ សម្រេចបានចក្ខុវិស័យកម្ពុជា ក្លាយជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់ នៅឆ្នាំ២០៥០ ។ ក្នុងនោះ វិស័យកីឡានៅតែជាវិស័យអាទិភាព ដ៏សំខាន់ក្នុងការរួមចំណែកអភិវឌ្ឍមូលធនមនុស្សលើកកម្ពស់កិត្យានុភាពជាតិ ជាមួយនឹងការបន្តជំរុញយុទ្ធនាការជាតិ “យុវជនម្នាក់ លេងកីឡាមួយប្រភេទយ៉ាងតិចប្រចាំជីវិត” ។

ផ្តើមពីនោះ ឯកឧត្តមបណ្ឌិត ថោង ខុន បានបង្ហាញនូវការបន្តគាំទ្រ និងសហការជាមួយក្រសួងអប់រំ យុវជន និងកីឡា ក្នុងការរៀបចំពិធីបើក-បិទក្នុងព្រឹត្តិការណ៍កីឡាជាតិ ដូចដែលធ្លាប់បានរួមសហការតាំងពីលើកទី១ ឆ្នាំ២០១៦ រហូតមក ក្រោមស្មារតីសុខដុមនីយកម្មក្នុងមហាគ្រួសារកីឡាជាតិ។ ទន្ទឹមនឹងនេះ ក៏នឹងបន្តសហការក្នុងភាពជាដៃគូ ជាមួយ ក្រសួងអប់រំ យុវជន និងកីឡា និងសហព័ន្ធកីឡាជាតិ ក្នុងការអភិវឌ្ឍកីឡាជំនាញកម្រិតខ្ពស់ ស្របតាមគោលការណ៍ស្វ័យភាព និងធម្មនុញ អូឡាំពិក ។

ឯកឧត្តមបណ្ឌិត តាងនាមចលនាអូឡាំពិកអន្តរជាតិ ជាថ្មីម្តង សូមគោរពថ្លែងអំណរគុណយ៉ាងជ្រាលជ្រៅបំផុត ចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ ព្រះមហាក្សត្រសម្តេចកិតិ្តព្រឹទ្ធបណ្ឌិត ថ្នាក់ដឹកនាំជាន់ខ្ពស់ និងរាជរដ្ឋាភិបាល នីតិកាលទី៧ ក្រោមការដឹកនាំរបស់ សម្តេចមហាបវរធិបតីនាយករដ្ឋមន្ត្រី ដែល សម្តេច បានគាំទ្រយ៉ាងពេញទំហឹង និងលើកស្ទួយដល់ការអភិវឌ្ឍន៍វិស័យកីទ្បាជាតិ និងជួយគាំទ្រដល់ចលនាអូទ្បាំពិកនៅកម្ពុជា ដើម្បីចូលរួមជាមួយគណៈកម្មាធិការអូឡាំពិកអន្តរជាតិ ក្នុងការកសាងពិភពលោកមួយប្រកបដោយសុខសន្តិភាព និងកាន់តែស្រស់បំព្រងតាមរយៈកីឡា និងឧត្តមគតិអូឡាំពិក។ ទន្ទឹមនោះសូមអរគុណដល់ អ្នកស្ម័គ្រចិត្ត, កីឡាករ កីឡាការិនី, យុវជន យុវនារី និងប្រជាពលរដ្ឋទាំងអស់ ដែលបានគាំទ្រជួយលើកកម្ពស់គុណតម្លៃ និងទស្សនវិជ្ជាអូឡាំពិក ។

សូមជម្រាបថា ពិធីបើកការប្រកួតកីទ្បាជាតិលើកទី៤ និងកីទ្បាជាតិជនពិការលើកទី២ ត្រូវបានប្រារព្ធធ្វើទ្បើងនៅពហុកីទ្បដ្ឋានជាតិអូរទ្បាំពិក នាថ្ងៃទី៣០ ខែតុលា ឆ្នាំ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕ អត្ថបទសហការ