រាជធានីភ្នំពេញ ៖ សម្រាប់ឱកាសពិសេស និងថ្ងៃឈប់សម្រាប់ខាងមុខ តើលោកអ្នកមានគម្រោងការចង់ទៅដើរលេងនៅទីណា ? ឬអ្នកមានកន្លែងក្នុងចិត្តហើយ ឬនៅ ? ជាឱកាសដ៏ល្អបំផុតសម្រាប់ដំណើរកម្សាន្តនានាទៅកាន់តំបន់ទេសចរណ៍ដ៏អស្ចារ្យ…
រាជធានីភ្នំពេញ ៖ សម្រាប់ឱកាសពិសេស និងថ្ងៃឈប់សម្រាប់ខាងមុខ តើលោកអ្នកមានគម្រោងការចង់ទៅដើរលេងនៅទីណា ? ឬអ្នកមានកន្លែងក្នុងចិត្តហើយ ឬនៅ ? ជាឱកាសដ៏ល្អបំផុតសម្រាប់ដំណើរកម្សាន្តនានាទៅកាន់តំបន់ទេសចរណ៍ដ៏អស្ចារ្យ និងស្រស់ស្អាតបំផុត ជាពិសេសទេសចរណ៍នៅតាមតំបន់ឆ្នេរ ។ យើងសូមណែនាំជូនបងប្អូននូវបទពិសោធន៍ថ្មីៗទៅកាន់ឆ្នេរសមុទ្រដ៏ស្រស់ស្អាតនៅតាមបណ្តាខេត្តនានាក្នុងប្រទេសថៃ ដែលមានដូចជា ៖ ខេត្តភូកេត ខេត្តក្រៈប៊ី និងខេត្តផាំងង៉ា ។ សម្រាប់ដំណើរកម្សាន្តដ៏រីករាយនៅតំបន់ទេសចរណ៍នៃខេត្តទាំង ៣ នៅភាគខាងត្បូងប្រទេសថៃនេះ ធានាបានថានឹងផ្តល់ឱ្យលោកអ្នក និងមនុស្សជាទីស្រលាញ់មានពេលវេលាដ៏ល្អជាមួយគ្នា អាចសម្រាកលម្ហែកាយយ៉ាងពេញចិត្តតែម្តងជាមួយបទពិសោធន៍ទេសចរណ៍ចម្រុះ ស័ក្កិសមគ្រប់វ័យ និងទទួលបានសេវាកម្មដែលមានតម្លៃសមរម្យ គុណភាពតាមស្តង់ដារអន្តរជាតិ ។
១. សូមមកចាប់អារម្មណ៍តំបន់ទេសចរណ៍ខេត្តភូកេត ៖ យើងដឹងហើយថា ភូកេត មានសមុទ្រដ៏ស្រស់ស្អាត ខ្សាច់សម៉ត់ ជាច្រើនកន្លែងដែលមានដូចជា ឆ្នេរសុរិន្ទ ឆ្នេរហ្វ្រីដម ឆ្នេរកាតាណយ ឆ្នេររ៉ាវៃ ឆ្នេរយ៉ានុយ និងឆ្នេរការ៉ុន ដែលអ្នកទេសចរអាចអង្គុយសម្រាកលម្ហែតាមឆ្នេរទាំងនេះ ។ ក្រៅពីនេះអ្នកអាចជិះទូកកម្សាន្ត និងមុជទឹកនៅតាមកោះដែលនៅជិតៗ ដូចជា កោះហេ អាចជិះទូកកាយ៉ាក លេងទឹក លេងក្តាររអិល មុជទឹកមើលផ្កាថ្ម ឬមើលត្រីរាប់ពាន់ប្រភេទ ជិះជេតស្គី និងជិះបានានាបូត ។ ឆ្នេរម៉ៃខៅ (Mai Khao) ក៏ជាកន្លែងដ៏ល្អសម្រាប់ថតរូបយន្តហោះចុះចតយ៉ាងស្រស់ស្អាត ជាមួយទិដ្ឋភាពយ៉ាងច្បាស់នៅពេលយន្តហោះ ហោះនៅលើផ្ទៃសមុទ្រខៀវស្រង៉ាត់បានយ៉ាងស្រស់ស្អាតបំផុត ជាពិសេសគឺនៅពេលព្រឹករហូតដល់ថ្ងៃត្រង់ ។
សម្រាប់អ្នកទេសចរដែលចូលចិត្តការផ្សងព្រេង មានកន្លែងសកម្មភាពផ្សងព្រេង និងកន្លែងលេងដែលមិនគួរខកខាននោះគឺ Zipline ជាមួយនឹងការមុជទឹងអមដោយភាពស្រស់ស្អាតពីធម្មជាតិស្រស់បំព្រង់ ។ អ្នកអាចជ្រើសរើសមកសម្រាក ឬក៏អាចទៅកម្សាន្តនៅអំឡុងពេលរាត្រីនៅឆ្នេរបាតង់ ដែលផ្តល់នូវភាពងាយស្រួលដួចជាសណ្ឋាគារ ភោជនីដ្ឋាន Pup, បា, ផ្សារទំនើប និងកន្លែងកម្សាន្តជាច្រើនទៀត ។ ទីតាំងដែលអាចមើលឃើញទិដ្ឋភាពថ្ងៃលិចដ៏អស្ចារ្យបានមាននៅដូចជា ឡែមព្រណ្មមទេព និងឡែមក្រះថិង ។
ទីក្រុងចាស់ភូកេត គឺជាចំណុចមួយក្នុងចំណោមកន្លែងដែលមានប្រជាប្រិយបំផុតមួយនៅភូកេត ។ ជុំវិញទីក្រុងចាស់នេះ អ្នកនឹងឃើញអគារស្ថាបត្យកម្ម ចិន-ព័រទុយហ្គាល់ ដែលមានការរចនាយ៉ាងស្រស់ស្អាត និងល្អឥតខ្ចោះសម្រាប់ការថតរូបទុកជាអនុស្សាវរីយ៍ ។ បន្ថែមពីនេះនៅជុំវិញទីក្រុងចាស់នេះ អ្នកក៏នឹងឃើញមានហាងលក់ដូរ ភោជនីយដ្ឋានល្បីៗ និងហាងកាហ្វេជាច្រើនប្រភេទសម្រាប់បម្រើដល់ភ្ញៀវទេសចរដែលបានធ្វើដំណើរទៅដល់ទីនោះផងដែរ ។
សម្រាប់អ្នកដែលមានចំណាប់អារម្មណ៍អំពីវប្បធម៌ និងប្រវត្តិសាស្ត្រ គួរតែទៅទស្សនាវត្តឆឡុង (Chalong Temple) ដែលជាវត្តបុរាណមានអាយុកាលតាំងពីយូរយាមកហើយ ។ ទីនោះក៏មាន ផ្ទះឈិនប្រឆា ដែលអ្នកអាចរីករាយទស្សនានិងស្វែងយល់ជាមួយស្ថាបត្យកម្មបុរាណៗបែប ចិន-ព័រទុយហ្គាល់ និងសារមន្ទីរ ភូកេតថៃហួរ គឺជាកន្លែងប្រមូលផ្តុំប្រវត្តិសាស្ត្រនៃទីក្រុងភូកេត ។ បន្ថែមលើសពីនេះ ភូកេត ក៏នៅមានលក់ផលិតផលផ្សេងៗ ពិសេសសម្រាប់អ្នកដែលមានចំណាប់អារម្មណ៍លើផលិតផល Health & Wellness Tourism ជាមួយការផ្តល់សេវាកម្មជាច្រើនទៀតយ៉ាងសម្បូរបែប ។
ជាពិសេស ភូកេត គឺជាកន្លែងទេសចរណ៍ដ៏ល្បីល្បាញ ដែលទទួលបានចំណាត់ថ្នាក់ទី ២០ ថាជា វិថីដែលស្រស់ស្អាត់បំផុតលើពិភពលោក ពី Seasia.stats ក្នុងឆ្នាំ ២០២៣ កន្លងទៅថ្មីៗនេះ ។ ម្យ៉ាងវិញទៀត ភូកេត ក៏ជាទីក្រុងដំបូងគេនៅអាស៊ីអាគ្នេយ៍ ដែលត្រូវបានទទួលស្គាល់ដោយអង្គការយូណេស្កូ ថាជាទីក្រុងដែលមានភាពច្នៃប្រតិដ្ឋបំផុតទៅលើសិល្បៈធ្វើម្ហូប ក្នុងឆ្នាំ ២០១៥ ដែលមានហាងលក់ម្ហូបអាហារឆ្ងាញ់ៗជាច្រើនរង់ចាំទទួលភ្ញៀវទេសចរមកទទួលទាននៅក្នុងដំណើរកម្សាន្តរបស់ពួកគេ ។
២. ក្រឡេកមកមើលខេត្តក្រៈប៊ី ៖ ក្រៈប៊ីមានសមុទ្រស្អាតៗជាច្រើនកន្លែង សម្រាប់ទេសចរណ៍ដូចជា អាងណាង, ឆ្នេរណារ៉ាត់ថារ៉ា (Nopparat Thara Beach), បណ្តុំកោះភីភី គឺជាឋានសួគ៌សម្រាប់អ្នកមុជទឹកដែលមានឈ្មោះបោះសំឡេងពេញពិភពលោក ហាយឡាយ គឺជាកន្លែងមើលទេសភាពនៅកោះភីភី ដែលអាចមើលទេសភាពបាន ៣៦០ ដឺក្រេ, ឆ្នេររ៉ៃឡេន សម្រាប់សកម្មភាពដែលលេចធ្លោរនៅឆ្នេររ៉ៃឡេន គឺការឡើងភ្នំ មើលថ្ងៃលិច ដ៏ស្រស់ស្អាតបំផុតមួយរបស់ក្រៈប៊ី ។
វត្តថាំសឺរ មានលក្ខណៈជាឧទ្យានព្រៃ ស្ថិតនៅលើភ្នំដែលអ្នកត្រូវដើរឡើងកាំជណ្តើរ ចំនួន ១២៦០ កាំ ។ អ្នកក៏អាចទស្សនាសមុទ្រពពក ពេលថ្ងៃរះនៅពេលព្រឹក និងទីក្រុងក្រៈប៊ីទាំងមូលក្នុងទិដ្ឋភាពប៉ាណូរ៉ាមាផងដែរ ។ ក្រៈប៊ីក៏ល្បីល្បាញផងដែរថា មានព្រៃជាប់សមុទ្រដែលមានធម្មជាតិសម្បូរបែបដែលអ្នកទេសចរអាចស្រូបយកខ្យល់បរិសុទ្ធបានយ៉ាងស្រស់ស្រាយ និងដោយជិតស្និទ្ធទៅនឹងធម្មជាតិសម្បូរបែប ។
ទឹកធ្លាក់រ៉ន់ក្លង់តម (Khlong Thom Hot Spring Waterfall) គឺជាទឹកធ្លាក់ដែលកើតឡើងដោយសារប្រភពទឹកក្តៅពីក្រោមដីមាន សីតុណ្ហភាពប្រមាណ ៤២ អង្សាសេ ហើយមានសារធាតុរ៉ែជាច្រើនប្រភេទដែលមានប្រយោជន៍ចំពោះសុខភាព ។ ចាត់ទុកថា ជាទឹកក្តៅស្ប៉ាធម្មជាតិមួយក្នុងចំណោមពីរលើពិភព លោកនេះ មួយគឺនៅប្រទេសថៃ និងមួយផ្សេងទៀតគឺនៅសាធារណរដ្ឋឆេក ។
៣. ទីតាំងដែលអ្នកទេសចរមិនអាចបំភ្លេចបាន គឺខេត្តផាំងង៉ា ៖ ផាំងង៉ា មានសមុទ្រស្អាតដែលអ្នកមិនអាចខកខានបាននោះគឺ កោះភា, ឧទ្យានជាតិបណ្តុំកោះមូត្យស៊ីមេឡាន់ន៍, ឆ្នេរ សុរិន្ទ វាជាឋានសួគ៌សម្រាប់អ្នកមុជទឹក, កោះយ៉ាវ, កោះខៃ ជាកន្លែងសម្រាប់មើលទេសភាពធម្មជាតិ ។ នៅ Samet Nangshe Viewpoint នៅផាំងង៉ា អ្នកអាចទស្សនាទេសភាពថ្ងៃរះ និង ថ្ងៃលិចនាពេលល្ងាចបានយ៉ាងជក់ចិត្តដិតអារម្មណ៍ដែលកម្របានឃើញនិងមិនងាយអាចបំភ្លេចបាន ។ ទីនេះក៏មានទាំងហាងអាហារ ទាំងកន្លែងស្នាក់នៅ និងហាងកាហ្វេសម្រាប់ផ្តល់សេវាកម្មដល់ទេសចរដែលបានធ្វើដំណើរទៅដល់ទីនោះគ្រប់ពេលវេលា ។
ទីក្រុងចាស់តាក់កួរប៉ា (Takuapa old Town) អ្នកអាចដើរលេងនិងស្វែងយល់ពី អគារ ផ្ទះ និងសំណង់ស្ថាបត្យកម្មព័រទុកាល់បុរាណនានាដែលមាននៅទីនោះ ។ ផ្ទុយទៅវិញ ប្រសិនបើអ្នកធុញនឹងការទៅលេងឆ្នេរសមុទ្រ អ្នកអាចមកផ្លាស់ប្ដូរបរិយាកាសដោយការជិះទូកដោលដោយឬស្សីនៅ Komol’s Corner ទស្សនាធម្មជាតិ និងជីវភាពរស់នៅរបស់ប្រជាជននៅតាមបណ្តោយទន្លេថាមរកត ឬទន្លេនាងយ៉ន ដែលមានទឹកថ្លាឆ្វង់ពណ៌បៃតងដូចមរកត ។
ជាមួយគ្នានេះដែរ សម្រាប់ភ្ញៀវទេសចរកម្ពុជា ដែលរស់នៅក្នុងខេត្តសៀមរាប បាត់ដំបង និងរាជធានីភ្នំពេញ ដែលមានបំណងក្នុងការធ្វើដំណើរកម្សាន្តទៅទីកន្លែងទេសចរណ៍ដ៏សម្បូរបែប ក្នុងខេត្តភូកេត ខេត្តក្រៈប៊ី និងខេត្តផាងង៉ា កាន់តែមានភាពងាយស្រួលថែមទៀត មួយកម្រិតទៀត ជាមួយនឹងការធ្វើដំណើរដោយជើងហោះហើរត្រង់ពី សៀមរាប ទៅភូកេត ចំនួនបីលើកក្នុង ១ សប្តាហ៍ ចាប់ពីថ្ងៃទី ២៩ ខែតុលា ឆ្នាំ ២០២៤ ខាងមុខនេះរបស់ ក្រុមហ៊ុនអាកាសចរណ៍ AirAsia ។ ពីភូកេត អ្នកទេសចរអាចធ្វើដំណើរទៅកាន់ខេត្តក្រៈប៊ី ដែលចំណាយពេលប្រហែល 2 ម៉ោង និងប្រមាណជា 3 ម៉ោងប៉ុណ្ណោះ ក្នុងការធ្វើដំណើរទៅខេត្តផាំងង៉ា តាមរយៈការធ្វើដំណើរដោយរថយន្តឈ្នួល ។
ខេត្តនីមួយៗសុទ្ធតែមានមានភាពទាក់ទាញ និងអត្តសញ្ញាណខុសប្លែកដាច់ពីគ្នា ។ សម្រាប់អ្នកដែលចាប់អារម្មណ៍ និងចង់ស្វែងយល់បន្ថែមអំពីការទេសចរនៅប្រទេសថៃជាទូទៅ និងទេសចរនៅក្នុងខេត្តទាំង ៣ ដែលបានរៀបរាប់ជាពិសេសខាងលើនេះ អ្នកអាចទំនាក់ទំនងសាកសួរព័ត៌មានបន្ថែមតាមរយៈតំណភ្ជាប់ខាងក្រោមនេះ ។ សម្រាកដើម្បីបំពេញថាមពលយ៉ាងជិតស្និទ្ធជាមួយនឹងធម្មជាតិយ៉ាងសម្បូរបែប ! https://www.tourismthailand.org/home
Fanpage: Amazing Thailand in Cambodia (https://www.facebook.com/Amazingthailandincambodia) ៕ អត្ថបទសហការ
ចែករំលែកព័តមាននេះ