រាជធានីភ្នំពេញ៖ សិក្ខាកាមកំពុងសិក្សាក្នុង «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស» បានបង្ហាញការសប្បាយចិត្ត ចំពោះវគ្គបណ្តុះបណ្តាលរបស់រាជរដ្ឋាភិបាល ព្រោះ គ្រូបង្រៀនមានការយកចិត្តទុកដាក់ខ្ពស់ ធ្វើឱ្យសិស្សមានទំនុកចិត្ត រៀនឆាប់ចេះ…
រាជធានីភ្នំពេញ៖ សិក្ខាកាមកំពុងសិក្សាក្នុង «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស» បានបង្ហាញការសប្បាយចិត្ត ចំពោះវគ្គបណ្តុះបណ្តាលរបស់រាជរដ្ឋាភិបាល ព្រោះ គ្រូបង្រៀនមានការយកចិត្តទុកដាក់ខ្ពស់ ធ្វើឱ្យសិស្សមានទំនុកចិត្ត រៀនឆាប់ចេះ ដោយសារសាលាមានឧបករណ៍បច្ចេកទេសទំនើបគ្រប់គ្រាន់ រៀនភ្លាមអនុវត្តផ្ទាល់ភ្លាមៗ ។
កញ្ញា សៅ យ៉ារ៉េត ជាសិក្ខាកាមផ្នែករចនាក្រាហ្វិច ដោយកុំព្យូទ័រនៅវិទ្យាស្ថានពហុបច្ចេកទេសព្រះកុសុមៈ (PPI) បានបង្ហាញពីក្តីសប្បាយរីករាយ ដែលមានចូលរៀននៅក្នុងសាលា ដែលមានគ្រូបង្រៀនយកចិត្តទុកដាក់ខ្ពស់ ក្នុងការបង្ហាត់បង្ហាញ ជាពិសេស សាលាមានបំពាក់ដោយឧបករណ៍បច្ចេកទេសទំនើប សម្បូរបែបសម្រាប់ ដាក់ឱ្យសិស្សរៀនទ្រឹស្តីផង និងអនុវត្តជាក់ស្តែងផង ។
កញ្ញាថា៖ «ការបង្រៀនជាក់ស្តែងសម្រាប់ខ្ញុំផ្ទាល់គឺដូចចាប់ផ្តើមពីសូន្យមក ប៉ុន្តែលោកគ្រូអ្នកគ្រូគាត់បង្រៀនណែនាំយកចិត្តទុកដាក់តាមដំណាក់កាលនីមួយៗ មិនឱ្យសិស្សភ័យខ្លាច ហើយមុននឹងអនុវត្ត លោកគ្រូបង្រៀនពីទ្រឹស្តី ហើយរៀនបណ្តើរអនុវត្តបណ្តើរធ្វើឱ្យសិស្សឆាប់ចេះ» ។
ស្រដៀងគ្នានេះ អ្នកស្រី គង់ ស៊ីផា ជាសិក្ខាកាមជំនាញធ្វើនំនៅ វិទ្យាស្ថានជាតិសហគ្រិនភាព និងនុវានុវត្តន៍ (NIEI) និយាយថា ដំបូងឡើយអ្នកស្រីគិតថា រៀនមិនអស់ប្រាក់បែបនេះ ប្រហែលជាគ្រូបង្រៀនមិនដឹកដល់នោះទេ ប៉ុន្តែផ្ទុយទៅវិញ តាមរយៈបទពិសោធន៍ជាក់ស្តែង មិននឹកស្មានថាអ្នកស្រីឆាប់ចាប់បាន ឆាប់យល់ ហើយបរិយាកាសសិក្សាប្រកបដោយផាសុកភាពទៀតផង ជាពិសេសគឺសាលាមានឧបករណ៍ទំនើបគ្រប់គ្រាន់ ដាក់ឱ្យអនុវត្តជាក់ស្តែង ។
អ្នកស្រីថា៖ «ការរៀនជាក់ស្តែងគឺលោកគ្រូ អ្នកគ្រូ បង្រៀនបានល្អ ហើយសិស្សក៏យកចិត្តទុកដាក់រៀន ហើយឧបករណ៍ក៏មានគ្រប់គ្រាន់ ជាពិសេសគឺអនាម័យល្អ ការអនុវត្តន៍ជាក់ស្តែង រៀនបណ្តើរអនុវត្តបណ្តើរឆាប់ចេះ» ។
បន្ថែមលើកសិក្ខាកាមទាំង២ បានអំពាវនាវដល់ប្រជាពលរដ្ឋដទៃទៀត ដែលមិនទាន់មានជំនាញច្បាស់លាស់ ជាពិសេសគ្រួសារក្រីក្រ និងងាយរងហានិភ័យ អាចមកចុះឈ្មោះចូលរៀនជំនាញបច្ចេកទេសឱ្យបានគ្រប់គ្នា ដែលការរៀនជំនាញនេះមិនគិតពីអាយុ មិនអស់លុយហើយថែមទាំងបានប្រាក់ឧបត្ថម្ភបន្ថែមទៀត ។
តាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញថា គិតត្រឹមថ្ងៃទី៣០ ខែមិថុនា ឆ្នាំ២០២៤ នេះ មានសិស្សកំពុងសិក្សាក្នុងវិស័យអប់រំបណ្តុះបណ្តាលវិជ្ជាជីវៈ និងបច្ចេកទេស ទាំងកម្មវិធី ១.៥ លាននាក់ និងកម្មវិធីទូទៅសរុបចំនួន ៧៤ ៨៧៣ នាក់ ៕ អត្ថបទសហការ
ចែករំលែកព័តមាននេះ