ADផ្ទាំងផ្សព្វផ្សាយពាណិជ្ជកម្ម

កម្មករ​នៅ​រោងចក្រ​ ដា​លី​ បាន​ចូល​ធ្វើការ​ធម្មតាវិញ​នៅ​ថ្ងៃនេះ​ ក្រោម​ការ​សម្របសម្រួល​ពី​ក្រសួងការងារ

4 អាទិត្យ មុន

រាជធានីភ្នំពេញ ៖ កម្មក​រោងចក្រ​ដា​លី ​DALI GARMENT INTERNATIONAL (CAMBODIA) LIMITED ទាំង​ ១១៩២…

រាជធានីភ្នំពេញ ៖ កម្មក​រោងចក្រ​ដា​លី ​DALI GARMENT INTERNATIONAL (CAMBODIA) LIMITED ទាំង​ ១១៩២ ​នាក់ បាន​ចូល​ធ្វើការ​ធម្មតា​វិញ​ហើយ​នៅ​ថ្ងៃ​ទី​ ២៣ ខែឧសភា ឆ្នាំ​ ២០២៤​ នេះ បន្ទាប់​ពី​មាន​កិច្ច​សម្របសម្រួល​របស់​ក្រសួង​ការងារ និង​បណ្តុះបណ្តាល​វិជ្ជាជីវៈ និង​ភាគី​រោងចក្រ​កាលពី​ថ្ងៃ​ពុធ ទី​ ២២ ខែឧសភា ឆ្នាំ​ ២០២៤​ ម្សិលមិញ​ក្រោយ​ការ​ឆេះ​អគារ​មួយ​របស់​រោងចក្រ​ ។

គួ​រំលឹក​ថា នៅ​ម៉ោង ១២៖០០ រំលង​អធ្រាត្រ​ចូល​ថ្ងៃ​ទី​ ២២ ខែឧសភា ឆ្នាំ​ ២០២៤ ​មាន​ករណី​អគ្គិភ័យ​ឆេះ​អាគារ​មួយ​របស់​រោងចក្រ​ដែល​ជា​អគារ​ឃ្លាំង​ផលិតកម្ម ឃ្លាំង​ស្តុក​វត្ថុធាតុដើម និង​ផលិតផល​សម្រេច​នៃ​រោងចក្រ​ DALI GARMENT INTERNATIONAL (CAMBODIA) LIMITED (​សាខា​ទី ១) ស្ថិត​នៅ​តាម​ផ្លូវជាតិ​លេខ ​៤ ភូមិ​កែវ​ឧត្តម ឃុំ​ត្រពាំង​គង ស្រុក​សំរោង​ទង ខេត្តកំពង់ស្ពឺ ​។

អគ្គិភ័យ​នេះ​មិន​បង្ក​ឱ្យ​មាន​របួស ឬ​ស្លា.ប់​មនុស្ស​ទេ ដោយសារ​បាន​កើតឡើង​នៅ​ពេល​យប់ និង​មិន​មាន​កម្មករ​នៅ​ធ្វើការ ប៉ុន្តែ​អគ្គិភ័យ​នេះ​ធ្វើ​ឱ្យ​ប៉ះពាល់​ដោយ​ផ្ទាល់​ដល់​បងប្អូន​កម្មករនិយោជិត​ ១០៧ ​នាក់ ក្នុង​ចំណោម​កម្មករ​ទាំងអស់ ​។

បើ​ទោះបីជា​រង​ការ​ខូចខាត​ដោយ​អគ្គិភ័យ​មែន ប៉ុន្តែ​រោងចក្រ​ទាំងអស់​នៅ​តែ​បន្ត​បើកប្រាក់​ឈ្នួល​ជា​ធម្មតា និង​ប្រាក់​អត្ថប្រយោជន៍​ធម្មតា​ជូន​កម្មករនិយោជិត ​។ នេះ​បើ​យោង​តាម​សេចក្តី​ប្រកាស​របស់​ក្រសួង​ការងារ និង​បណ្តុះបណ្តាល​វិជ្ជាជីវៈ​ ដែល​បាន​ចេញផ្សាយ​កាលពី​ថ្ងៃ​ទី ​២២ ខែឧសភា ម្សិលមិញ​ ៕ អត្ថបទសហការ