រាជធានីភ្នំពេញ ៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ បានផ្សព្វផ្សាយឱកាសការងារក្នុងស្រុករាប់ម៉ឺនកន្លែង ដល់ពលការិនីចំនួន ២៤ នាក់ ដែលទើបនឹងត្រឡប់មកពីប្រទេសអារ៉ាប៊ីសាអូឌីត ក្នុងគោលបំណងឲ្យក្រុមពលការិនីទទួលបានឱកាសការងារមួយដែលពិតប្រាកដ និងមានប្រាក់ចំណូលសមរម្យសម្រាប់ចិញ្ចឹមជីវិត និងផ្គត់ផ្គង់គ្រួសារ ។
នៅថ្ងៃទី ១២ ខែឧសភា ឆ្នាំ ២០២៤ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ បានផ្សព្វផ្សាយពីឱកាសការងារក្នុងស្រុករាប់ម៉ឺនកន្លែងដល់ពលការិនីចំនួន ២៤ នាក់ ដែលទើបនឹងត្រឡប់មកពីប្រទេសអារ៉ាប៊ីសាអូឌីត ក្នុងគោលបំណងឲ្យក្រុមពលការិនី មានការងារធ្វើនៅក្នុងស្រុក ។ ក្រុមពលការិនីបានបង្ហាញអារម្មណ៍សប្បាយចិត្ត និងកក់ក្ដៅ ដែលរាជរដ្ឋាភិបាលបានគិតគូរសម្របសម្រួលឲ្យពួកគាត់ត្រឡប់មកស្រុកកំណើតវិញហើយ ថែមទាំងបានណែនាំនូវឱកាសការងារល្អៗ ជូនពួកគាត់ ដោយមិនចាំបាច់ឲ្យពួកគាត់ពិបាកក្នុងការស្វែងរកការងារធ្វើខ្លួនឯងឡើយ ។
«ខ្ញុំមានអារម្មណ៍សប្បាយចិត្ត និងកក់ក្ដៅ ដោយមិនបារម្ភថា មកដល់ខ្មែរគ្មានការងារធ្វើ និងត្រូវរកការងារខ្លួនឯង» ។ នេះជាសម្ដីរបស់ក្រុមពលការិនី ផល ចំរើន និងពលការិនី សារិន ស្រម៉ៅ ដែលទើបត្រឡប់មកពីប្រទេសអារ៉ាប៊ីសាអូឌីត ។
សូមបញ្ជាក់ថា ទីភ្នាក់ងារជាតិមុខរបរ និងការងារ គឺជាកន្លែងប្រមូលផ្ដុំឱកាសការងារនៅទូទាំងប្រទេសកម្ពុជា។ ជាក់ស្ដែង នៅក្នុងរយៈពេលពេញមួយឆ្នាំ ២០២៣ មានពលរដ្ឋមកចុះឈ្មោះស្វែងរកការងាររហូតជិត ៤ ម៉ឺននាក់ តាមរយៈទីភ្នាក់ងារជាតិមុខរបរ និងការងារ ៕ អត្ថបទសហការ
ចែករំលែកព័តមាននេះ