រាជធានីភ្នំពេញ ៖ កាលពីពេលថ្មីៗទៅនេះ បណ្តាញគ្រឹះស្ថានអប់រំ និងបណ្តុះបណ្តាល វេសឡាញ អេឌ្យូខេសិន គ្រុប បានចុះអនុស្សារណៈយោគយល់គ្នាជាមួយសមាគម អ៉ី….
រាជធានីភ្នំពេញ ៖ កាលពីពេលថ្មីៗទៅនេះ បណ្តាញគ្រឹះស្ថានអប់រំ និងបណ្តុះបណ្តាល វេសឡាញ អេឌ្យូខេសិន គ្រុប បានចុះអនុស្សារណៈយោគយល់គ្នាជាមួយសមាគម អ៉ី. អឹម. ឌី. អា. កម្ពុជា លើកិច្ចសហប្រតិបត្តិការលើកលើកកម្ពស់ការយល់ដឹង និងពង្រឹងបន្ថែមសេវាប្រឹក្សាយោបល់ផ្នែកចិត្តសាស្ត្រ ជូនដល់បុគ្គលិកសិក្សា មាតាបិតា អ្នកអាណាព្យាបាលសិស្ស និងសិស្សានុសិស្សនៃបណ្តាញសាលារៀនទាំងអស់ ។
ឧកញ៉ា ប៉ិច ប៉ូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប មានប្រសាសន៍ថា បញ្ហាសុខភាពផ្លូវចិត្តគឺសំខាន់ណាស់, លោកមើលឃើញថា សម្ពាធផ្លូវចិត្តបានកំពុងកើតឡើងទៅលើប្រជាជននៅក្នុងប្រទេសកំពុងអភិវឌ្ឍ, លោកថា លោកមិនចង់ឃើញរឿងអ្វីមួយដែលអាចការពារបាន អាចដោះស្រាយបាន បែរជាយើងមិនអាចធ្វើកើត អន្តរាគមន៍មិនបាននោះទេ ដូច្នេះហើយបានជាបណ្តាញគ្រឹះស្ថានអប់រំ និងបណ្តុះបណ្តាល វេសឡាញ បង្កើតឱ្យមានអ្នកប្រឹក្សាសុខភាពផ្លូវចិត្តជូនទៅសិស្ស ក៏ដូចជាអ្នកអាណាព្យាបាលផងដែរ ។
លោកឧកញ៉ាបានសង្កត់ធ្ងន់ថា ៖ «ពាក់ព័ន្ធសុខភាពផ្លូវចិត្តខ្ញុំគិតថា ចាំបាច់ សំខាន់មែនទែន… ពេលខ្លះឪពុកម្តាយមិនហ៊ាននិយាយ អញ្ចឹងហើយបានជាយើងផ្តល់ប្រឹក្សាយោបល់ ដូច្នេះហើយទើបយើងត្រូវការអ្នកជំនាញដើម្បីជួយ» ។
លោក អ៊ុំ ផ្លាកទីន ប្រធានសមាគម អ៉ី. អឹម. ឌី. អា កម្ពុជាមានប្រសាសន៍ថា ការសិក្សាមួយនៅសហរដ្ឋអាមេរិកបានរកឃើញថា យុវជនដែលមានអាយុចន្លោះពី ១៣ ទៅ ១៧ ឆ្នាំ ប្រហែល ៤០ ភាគរយ បានរាយការណ៍ពីភាពឯកកោ និងខ្វះភាពកក់ក្តៅរបស់ពួកគេ, ភាពឯកកោទាំងនោះ គឺបានកើតឡើងដោយសារតែការរីកចម្រើន នៃបច្ចេកវិទ្យា ហើយក៏មានសម្ពាធនៃការសិក្សាផងដែរ ។ លោកបន្តថា អនុស្សារណៈយោគយល់គ្នានេះ មិនមែនផ្តោតតែទៅលើប្អូនៗដែលមានបញ្ហាសុខភាពផ្លូវចិត្ត ប៉ុន្តែពិនិត្យមើលជាមួយគ្នាផងដែរថា តើលោកគ្រូអ្នកគ្រូដែលធ្វើការដោយផ្ទាល់ ដោយប្រយោល តើអាចធ្វើតាមរបៀបម៉េច? ក៏ដូចជាឪពុកម្តាយដែលភាគច្រើនមានពេលនៅជាមួយកូនតែនៅចុងសប្តាហ៍តើត្រូវជួយកូនដោយរបៀបម៉េច? ការថែទាំសុខភាពផ្លូវចិត្តពីសិស្សផ្ទាល់ ពីគ្រូបង្រៀន ពីអ្នកអាណាព្យាបាលដែរ ហើយជាពិសេសការចូលរួមពីគ្រប់ភាគី នេះជាកត្តាដែលយើងគិតថា នឹងអាចចូលរួមលើកកម្ពស់សុខមាលភាពផ្លូវចិត្ត ។
បើតាមលោក អ៊ុំ ផ្លាកទីន សមាគម អ៉ី. អឹម. ឌី. អា កម្ពុជា នឹងចូលរួមគ្រប់មធ្យោបាយតាមដែលអាចធ្វើទៅបាន ដើម្បីធ្វើយ៉ាងណាលើកកម្ពស់សុខមាលភាពផ្លូវចិត្តពលរដ្ឋ និងយុវជនកម្ពុជា ព្រោះនៅពេលណាដែលមានសុខភាពផ្លូវចិត្តល្អ ការសិក្សាល្អ ទំនាក់ទំនងល្អ និងជាពិសេសទៅជាធនធាន និងជាទំពាំងស្នងឬស្សីមួយ ដើម្បីជួយសង្គមជាតិយើងទាំងមូលផងដែរ ។
សូមជម្រាបថា នៅគ្រប់បណ្តាញសាលារៀនទាំងអស់របស់វេសឡាញ អេឌ្យូខេសិន គ្រុប មានអ្នកជំនាញផ្នែកចិត្តសាស្ត្រ សម្រាប់ពិគ្រោះ និងផ្តល់ប្រឹក្សាយោបល់សុខភាពផ្លូវចិត្តជូនដល់បុគ្គលិក មាតាបិតាសិស្ស និងសិស្សានុសិស្សលើបញ្ហាសិក្សាធិការ ទំនាក់ទំនងក្នុងគ្រួសារ និងវិបត្តិផ្សេងទៀតអស់រយៈពេលជាង៥ឆ្នាំមកហើយ ៕ អត្ថបទសហការ
ចែករំលែកព័តមាននេះ