«នំបុ័ងត្នោត» មោទនភាពរបស់ប្រជាជនកម្ពុជានៅ 7- Eleven
រាជធានីភ្នំពេញ ៖ ពី «អាកោរត្នោត» ទៅ «នំបុ័ងត្នោត» ដាក់ចែកចាយក្នុងហាង 7-Eleven បន្ថែមតម្លៃផលិតផលកសិកម្ម ចែករំលែកឱកាសដើម្បីបង្កើនគុណភាពជីវិត…
រាជធានីភ្នំពេញ ៖ ពី «អាកោរត្នោត» ទៅ «នំបុ័ងត្នោត» ដាក់ចែកចាយក្នុងហាង 7-Eleven បន្ថែមតម្លៃផលិតផលកសិកម្ម ចែករំលែកឱកាសដើម្បីបង្កើនគុណភាពជីវិត និងជាមោទនភាពមួយទៀតសម្រាប់ប្រជាជនកម្ពុជា ។
ដោយមិនចង់ឃើញដើមត្នោតដែលប្រៀបបានទៅនិងអត្តសញ្ញាណរបស់ប្រទេសកម្ពុជាបាត់បង់ លោក ប៊ុន វ៊ុធឌីកា មានអាយុ ៤៣ ឆ្នាំ បានគិតឆ្នៃយកផ្លែត្នោតមកធ្វើជាគ្រឿងផ្សំរបស់នំសម័យថ្មី ។ ពីនំដែលគេស្គាល់ថាជា «អាកោរត្នោត» ឱ្យក្លាយទៅជា «នំបុ័ងត្នោត» ជម្រើសថ្មីមួយទៀតសម្រាប់អតិថិជន ដើម្បីឆ្លើយតបទៅនឹងតម្រូវការផ្សេងៗ ។
ដើមកំណើតនៃអាជីវកម្ម «ហាងនំបុ័ងគ្រីសប៊ែន» គឺត្រូវបានបើកដំណើរការតាំងពីឆ្នាំ 2021 បន្ទាប់មកទទួលបានជោគជ័យម្តងទៀត ដោយនាំយកផលិតផល «គ្រីសប៊ែន» (Chrizt Ben) ចូលដាក់លក់នៅហាងដែលកំពុងពេញនិយម គឺហាង 7-Eleven គ្រប់សាខាក្នុងរាជធានីភ្នំពេញ ។
បច្ចុប្បន្ន ហាងនំបុ័ងគ្រីសប៊ែន មានសរុបទាំងអស់ ៤ សាខា ក្នុងនោះមានដូចជា ៖ សាខាសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ, សាខា The Green Community Mall, សាខា CG Mall និងសាខា ឧដ្ដុង កំពង់ឆ្នាំង ។
ផលិតផលរបស់ គ្រីសប៊ែន ដែលមានដាក់លក់នៅក្នុងហាង 7-Eleven មានជាច្រើនមុខឱ្យជ្រើសរើសដូចជា នំបុ័ងត្នោត នំបុ័ងខ្មៅ នំបុ័ងត្នោតបាក់យ៉ុង នំបុ័ងត្នោតស្នូលសូកូឡា នំបុ័ងស្នូលតយ ជាដើម ។ ចំណុចពិសេសរបស់គ្រីសប៊ែន គឺការផលិតថ្មីៗ ប្រើវត្ថុធាតុដើមដែលមានគុណភាព ស្អាត មានអនាម័យ និងសុវត្ថិភាពខ្ពស់តាំងពីដំណាក់កាល់ផលិត ការវេចខ្ចប់ រហូតដល់ការដឹកជញ្ជូន ជាពិសេសគឺផ្លែត្នោតដែលនាំពីខេត្តកំពង់ស្ពឺ ។
«ខ្ញុំមានអារម្មណ៍ថា មានមោទនភាពក្នុងឋានៈជាជនជាតិខ្មែរ ដែលបានធ្វើនំមួយដែលប្រៀបបានទៅនិងអត្តសញ្ញាណជាតិ ហើយបានដាក់លក់នៅក្នុងហាងដែលមានឈ្មោះល្បី 7-Eleven នេះ ។ ខ្ញុំសូមអរគុណ 7-Eleven ដែលផ្ដល់ឱកាស មិនមែនសម្រាប់តែខ្ញុំដែលជាអ្នកផលិតនោះទេ តែបានជួយឱ្យក្មេងៗ ចាស់ៗនៅជនបទមានចំណូលពីការរើសផ្លែត្នោតមកលក់ ហើយជួយមនុស្សជាច្រើនឱ្យមានចំណូល និងការងារដ៏មានស្ថេរភាពមួយ មិនថាបុគ្គលិកធ្វើនំបុ័ង អ្នកវេចខ្ចប់ អ្នកលក់ និងអ្នកដឹកជញ្ជូនជាដើម» ។
7-Eleven បានចូលមកបម្រើសេវាកម្មនៅប្រទេសកម្ពុជាតាំងពីខែសីហា ឆ្នាំ 2021 ហើយប្ដេជ្ញាជំរុញសេដ្ឋកិច្ច និងរីកចម្រើនជាមួយសង្គមកម្ពុជា ។ សម្រាប់ប្រជាជនកម្ពុជា យើងត្រៀមខ្លួនចែករំលែកឱកាសជាមួយគ្រប់គ្នាតាមតម្លៃនៃ «អត្ថប្រយោជន៍ 3» និងបាវចនារបស់អង្គភាពគឺ “Giving and Sharing” ៕ អត្ថបទសហការ
ចែករំលែកព័តមាននេះ