រាជធានីភ្នំពេញ ៖ គោលដៅដ៏ធំបំផុត នៃការរៀបចំសង្ក្រាន្ត NNP គឺដើម្បីអបអរសាទរទទួល ឆ្នាំថ្មីប្រពៃណីខ្មែរ ហើយចង់ឱ្យបងប្អូនខ្មែរយើងសប្បាយរីករាយ និងបានឃើញនូវអ្វីដែលជា របស់ខ្មែរ…
រាជធានីភ្នំពេញ ៖ គោលដៅដ៏ធំបំផុត នៃការរៀបចំសង្ក្រាន្ត NNP គឺដើម្បីអបអរសាទរទទួល ឆ្នាំថ្មីប្រពៃណីខ្មែរ ហើយចង់ឱ្យបងប្អូនខ្មែរយើងសប្បាយរីករាយ និងបានឃើញនូវអ្វីដែលជា របស់ខ្មែរ និងមានការចងចាំមួយដ៏ល្អនូវប្រពៃណី បុរាណខ្មែរ ។ នេះជាការលើកឡើងរបស់ លោកជំទាវ ឧកញ៉ា ទ្រី ដាណា អគ្គនាយិកាក្រុមហ៊ុន ដាណា ទ្រី នៅក្នុងពិធីសូត្រមន្តក្រុងពាលីសង្ក្រាន្ត NNP ដែលបានធ្វើឡើងនៅថ្ងៃទី ២០ ខែមីនា ឆ្នាំ ២០២៣ នេះ ដោយមានការ ចូលរួមយ៉ាងច្រើនកុះករពីសិល្បករ-សិល្បការិនី ។
សូមបញ្ជាក់ផងដែរថា កម្មវិធីសង្ក្រាន្ត NNP នឹងប្រារពធ្វើឡើងក្នុងរយៈពេល ៣ ថ្ងៃ គឺចាប់ពីថ្ងៃទី ២៤ ដល់ថ្ងៃទី ២៦ ខែមីនា ឆ្នាំ ២០២៣ នៅក្នុងបរិវេណដីឡូត៍ធំមួយកន្លែង នៅជិតវិមាន ឈ្នះ ឈ្នះ ហើយបងប្អូនអាចចូលរួមលេងកម្សាន្តសង្ក្រាន្ត NNP ដោយសេរី និងដោយក្តីសប្បាយរីករាយ ។
សម្រាប់ក្រុមហ៊ុន ដាណា ទ្រី នេះគឺជាលើកដំបូងហើយដែលរៀបចំកម្មវិធីសង្ក្រាន NNP នេះឡើង ។
លោកជំទាវ ឧកញ៉ា ទ្រី ដាណា បានឱ្យដឹងបន្ថែមថា ក្នុងរយៈពេល ៣ ថ្ងៃនេះ គឺមានការលេងល្បែងប្រជាប្រិយ ការរាំកម្សាន្តបែបប្រពៃណីខ្មែរ មានការសម្តែង របាំក្ងោក មានកម្មវិធីល្បុកតោ គុណខ្មែរ ល្ខោនខោល និងកម្មវិធីបែបប្រពៃណីជាច្រើនទៀត ហើយក្នុងនោះក៏មានការស្លៀកពាក់បែបស័យមុនផងដែរ ។
ជាមួយកម្មវិធីសង្ក្រាន្ត NNP លោកជំទាវ ឧកញ៉ា ទ្រី ដាណា ក៏បានរំពឹងផងដែរថា នឹងមានបងប្អូនខ្មែរយើងចូលរួមច្រើនកុះករ ហើយប្រសិនបើមានការគាំទ្រច្រើនពីបងប្អូន លោកជំទាវ ឧកញ៉ា នឹងបន្តធ្វើជារៀងរាល់ឆ្នាំតែម្តង ៕
ចែករំលែកព័តមាននេះ