រាជធានីភ្នំពេញ ៖ បណ្តាញសាលារៀនវ៉េស្ទឡាញន៍ និងសាលារៀនណត្សឡាញន៍ បានប្រកាសដាក់ឱ្យដំណើរការសាកល្បងប្រព័ន្ធសន្តិសុខសុវត្ថិភាពសិស្ស (School Security System) ចាប់ពីថ្ងៃទី ១៥ ខែសីហា ឆ្នាំ ២០២២ នេះតទៅ ដើម្បីបង្កើនប្រសិទ្ធិភាពផ្នែកសុខសុវត្ថិភាពដល់សិស្សានុសិស្សគ្រប់រូបនៅពេលចេញ-ចូលក្នុងបរិវេណសាលា ។

លោក គង់ សំនៀង ប្រធាននាយកប្រតិបត្តិការនៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុបបានឲ្យដឹងថា “ការប្រើប្រាស់ប្រព័ន្ធសុវត្ថិភាពថ្មីនេះ នឹងបង្កើនប្រសិទ្ធភាពផ្នែកសន្តិសុខសុវត្ថិភាពដល់សិស្សានុសិស្សគ្រប់រូប ផ្តល់ភាពសុក្រឹតចំពោះទិន្នន័យសិស្សដែលបានចេញ-ចូល ក្នុងបរិវេណសាលា ផ្តល់ភាពសុក្រឹតចំពោះទិន្នន័យមាតាបិតា ឬអ្នកអាណាព្យាបាលសិស្សដែលបានមកទទួលកូនចេញពីសាលា អនុញ្ញាតឱ្យអ្នកអាណាព្យាបាលតាមដានតាមដានវត្តមាន និងអវត្តមានសិស្សកាន់តែមានភាពងាយស្រួលតាមរយៈការផ្តល់ដំណឹង (Notification Alert) ក្នុង Mobile School App របស់សាលាដែលអ្នកអាណាព្យាបាលកំពុងប្រើប្រាស់ប្រចាំថ្ងៃ” ។

ចំពោះអ្នកអាណាព្យាបាលមិនទាន់មានគណនីប្រើប្រាស់ Mobile School App សូមទាក់ទងមកការិយាល័យបម្រើសេវាកម្មអតិថិជននៅតាមសាខានីមួយៗ ដែលបុត្រធីតាលោកអ្នកកំពុងសិក្សា ។ លោកប្រធានបញ្ជាក់ថា “ដើម្បីឱ្យប្រព័ន្ធថ្មីនេះមានប្រសិទ្ធិភាពទាមទារឲ្យមានការចូលរួមសហការពីសិស្សានុសិស្ស ត្រូវពាក់កាតសិស្សជាប់ខ្លួនជាប្រចាំ និងស្គែនកាតរាលពេលចេញ-ចូលសាលារៀន ចំណែកអ្នកអាណាព្យាបាលត្រូវមានកាតទទួលកូន (Parent ID Card) និងស្គែនកាតគ្រប់ពេលដែលមកទទួលកូនចេញពីសាលារៀន” ។

លោកប្រធានក៏បានសុំការយោគយល់អធ្យាស្រ័យពីសំណាក់សិស្សានុសិស្ស និងមាតាបិតាសិស្ស ក្នុងករណីប្រព័ន្ធសុវត្ថិភាពសិស្សដែលដាក់ឱ្យដំណើរការសាកល្បងនេះ​មានភាពរអាក់រអួល ឬដំណើរការមិនប្រក្រតីណាមួយ ។ លោកប្រធានជឿជាក់ថានឹងទទួលបានកិច្ចសហការយ៉ាងជិតស្និទ្ធ និងការគាំទ្រពីសំណាក់មាតាបិតា អ្នកអាណាព្យាបាល​ និងសិស្សានុសិស្ស គ្រប់ដំណាក់កាលនៃវឌ្ឍនភាពថ្មីរបស់សាលា ។

ការបង្កើនតប្រព័ន្ធសុខសុវត្ថិភាពថ្មីនេះ គឺជានវានុវត្តន៍ថ្មីមួយបន្ថែមទៀត របស់បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ដែលធានាបាននូវសុវត្ថិភាពសិស្សគ្រប់រូប និងផ្តល់ភាពសុក្រឹតក្នុងការតាមដានការសិក្សារបស់សិស្សផងដែរ ។

សូមជម្រាបថា ក្រៅប្រព័ន្ធសុខសុវត្ថិភាពខាងនេះ បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានបង្កើត និងកំពុងដាក់ឲ្យប្រើប្រាស់ប្រព័ន្ធបច្ចេកវិទ្យាអប់រំដូចជា​ ប្រព័ន្ធគ្រប់គ្រងសាលារៀន (School Management System) ប្រព័ន្ធគ្រប់គ្រងការបង្រៀន និងរៀន (Learning Management System) និងប្រព័ន្ធ Mobile School App ដើម្បីគាំទ្រដល់គុណភាពអប់រំ និងបង្កើនប្រសិទ្ធិភាពប្រតិបត្តិការផ្សេងៗរបស់សាលារៀន ព្រមទាំងជម្រុញការប្រើប្រាស់បច្ចេកវិទ្យាអប់រំក្នុងសម័យឌីជីថល ៕ អត្ថបទសហការ

ឧបករណ៍សុវត្ថិភាពសម្រាប់សិស្ស និងអ្នកអាណាព្យាបាលសិស្ស ស្គែនកាតនៅច្រកចេញ-ចូលសាលា