ADផ្ទាំងផ្សព្វផ្សាយពាណិជ្ជកម្ម

ដំណើរ​ទស្សនកិច្ច​សិក្សា​នៃ​ថ្នាក់ដឹកនាំ និង​សមាជិក​សហព័ន្ធ​សេវា​អប់រំ​នៅ​កម្ពុជា ទៅ​កាន់​សាលា​ជំនាន់​ថ្មី ព្រះ​ស៊ី​សុវត្ថិ

1 ខែ មុន

រាជធានី​ភ្នំពេញ​៖ នៅ​ថ្ងៃ​ទី​១0 ខែឧសភា ឆ្នាំ​២០២២ សហព័ន្ធ​សេវា​អប់រំ​នៅ​កម្ពុជា បាន​រៀបចំ​ដំណើរ​ទស្សនកិច្ច​សិក្សា ទៅ​កាន់​សាលា​ជំនាន់​ថ្មី ព្រះ​ស៊ី​សុវត្ថិ ក្រោម​ការ​ដឹកនាំ​របស់​លោក ឡាយ…

រាជធានី​ភ្នំពេញ​៖ នៅ​ថ្ងៃ​ទី​១0 ខែឧសភា ឆ្នាំ​២០២២ សហព័ន្ធ​សេវា​អប់រំ​នៅ​កម្ពុជា បាន​រៀបចំ​ដំណើរ​ទស្សនកិច្ច​សិក្សា ទៅ​កាន់​សាលា​ជំនាន់​ថ្មី ព្រះ​ស៊ី​សុវត្ថិ ក្រោម​ការ​ដឹកនាំ​របស់​លោក ឡាយ សុភា សមាជិក​ក្រុមប្រឹក្សាភិបាល​សហព័ន្ធ​សេវា​អប់រំ​នៅ​កម្ពុជា ទទួល​បន្ទុក​កិច្ចការ​អប់រំ​ចំណេះ​ទូទៅ និង​ជា​ប្រធាន នៃ​មជ្ឈមណ្ឌល​ភាសា អេ អាយ អាយ ដើម្បី​ផ្តល់​ឱកាស​ដល់​សមាជិក​សហព័ន្ធ​រៀនសូត្រ​ពី​បទ​ពិសោធន៍ គុណ​តម្លៃ និង​គំរូ​ភាព នៃ​ការ​ដឹកនាំ​ពី​គ្នា​ទៅ​វិញ​ទៅ​មក និង​ពី​សាលារៀន​នានា​នៅ​កម្ពុជា​ក្នុង​បរិបទ​ថ្មី​នេះ​ផង​ដែរ ។

ដំណើរ​ទស្សនកិច្ច​សិក្សា​នេះ ផ្តោត​សំខាន់​លើ​ការ​សិក្សា​លើ​បទ​ពិសោធន៍​ភាព​ជា​អ្នកដឹកនាំ​អប់រំ ស្វ័យភាព និង​គណនេយ្យ​ភាព​នៃ​រដ្ឋបាល​សាលារៀន ការ​រៀន និង​បង្រៀន​ស្រប​តាម​ការ​អប់រំ​បែប​សតវត្សរ៍​ទី​២១ ក្រប​ខណ្ឌ​នានា ដែល​បម្រើ​ដល់​ការ​អបរំ​ជា​បរិ​យា​បន្ន​សម្រាប់​កុមារ​កម្ពុជា ។ កម្មវិធី​នេះ​នឹង​មាន​បង្ហាញ និង​ការ​ជជែក​ពិភាក្សា​អំពី​រចនាសម្ព័ន្ធ និង​ការ​គ្រប់គ្រង​នៃ​សាលារៀន​ជំនាន់​ថ្មី (NGS) និង​កម្មវិធី​សិក្សា និង​ការ​បង្រៀន​នៃ​សាលារៀន​ជំនាន់​ថ្មី (NGS) ដើម្បី​ឆ្លើយ​តប​ទៅ​នឹង​ការ​រំពឹង​ទុក​នៃ​សតវត្សរ៍​ទី​២១ ដោយ​លោក ស​ម្យ កំសាន្ត នាយករង​សាលារៀន​ជំនាន់​ថ្មី វិទ្យាល័យ​ព្រះ​ស៊ី​សុវត្ថិ ។ ជាង​នេះ​ទៅ​ទៀត កម្មវិធី​សិក្សា​ផ្លាស់​ប្តូរ​បទ​ពិសោធន៍​នេះ​ទទួល​បានការ​លើកទឹកចិត្ត និង​គាំទ្រ​ដោយ​ឯកឧត្តម បណ្ឌិត​សភាចា​រ្យ​រដ្ឋមន្ត្រី ហង់​ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា ក្នុង​ការ​ជំរុញ​ឱ្យ​មាន​កិច្ចសហការ​ល្អ​រវាង​វិស័យ​អប់រំ​រដ្ឋ និង​ឯកជន​កាន់តែ​ជិត​ស្និទ្ធ ។

ជា​កិច្ច​ចាប់ផ្តើម​នៃ​កម្មវិធី លោក ឡាយ សុភា បាន​ជម្រាប​ជូន​ពី​គោលបំណង នៃ​ដំណើរ​ទស្សនកិច្ច​សិក្សា និង​ថ្លែងអំណរគុណ​យ៉ាង​ជ្រាលជ្រៅ ចំពោះ​គណៈ​គ្រប់គ្រង​នៃ​សាលារៀន​ជំនាន់​ថ្មី វិទ្យាល័យ​ព្រះ​ស៊ី​សុវត្ថិ​ដែល​បាន​ផ្តល់​ឱកាស​សិក្សា​រៀនសូត្រ ផ្លាស់​ប្តូរ​បទ​ពិសោធន៍​ដ៏​មាន​តម្លៃ និង​ទទួល​ស្វាគមន៍​យ៉ាង​កក់ក្តៅ ចំពោះ​ប្រតិភូ​ទាំង ២៥ រូប នៃ​សហព័ន្ធ​សេវា​អប់រំ​នៅ​កម្ពុជា ។ មាន​ប្រសាសន៍​នៅ​ក្នុង​មតិ​សំណេះសំណាល​ស្វាគមន៍ នា​ឱកាស​នេះ​ដែរ លោក ស​ម្យ កំសាន្ត នាយករង​នៃ​សាលារៀន​ជំនាន់​ថ្មី បាន​បង្ហាញ​ពី​វឌ្ឍនភាព​របស់​សាលារៀន​ជំនាន់​ថ្មី​ក្នុង​រយៈពេល ៦ ឆ្នាំ និង​បាន​បញ្ជាក់​ផង​ដែរ​ថា សាលារៀន​ជំនាន់​ថ្មី​គឺជា​គំរូ​ភាព នៃ​ការ​វិនិយោគ​លើ​វិស័យ​អប់រំ​មួយ​នៅ​កម្ពុជា ដែល​ទទួល​បានការ​ចាប់អារម្មណ៍​ខ្លាំង ពី​សាធារណជន ស្ថាប័ន​ជាតិ និង​អន្តរជាតិ ដោយសារ​លទ្ធផល​សិក្សា​របស់​សិស្ស​ល្អ​ប្រសើរ ។ តាម​រយៈ​ការ​ធ្វើ​បទ​បង្ហាញ និង​វេទិការ​សំណួរចម្លើយ ប្រតិភូ​ចូលរួម​បាន​លើក​សំណួរ​លើ​ការ​បែងចែក​ម៉ោង​សិក្សា ការ​ជ្រើសរើស​សិស្ស​ចូល​សិក្សា ការ​បណ្តុះបណ្តាល​ធនធាន​គ្រូ ក្នុង​សាលា​ជំនាន់​ថ្មី ការ​អភិវឌ្ឍ​ជំនាញ​ទន់​សម្រាប់​សិស្ស​(soft skills) និង​វិធីសាស្ត្រ​ក្នុង​ការ​អភិវឌ្ឍ​កម្មវិធី​សិក្សា​ស្ទែ​ម (STEM) នៅ​ក្នុង​សាលា​ជំនាន់​ថ្មី​ផង​ដែរ ។ មុន​នឹង​បញ្ចប់​គណៈ​គ្រប់គ្រង​សាលារៀន​ជំនាន់​ថ្មី និង​ប្រតិភូ​សហព័ន្ធ​បាន​ដើរ​ទស្សនា​អគារសិក្សា និង​បរិក្ខារ​នៃ​សាលារៀន​ជំនាន់​ថ្មី ដើម្បី​សង្កេត​ពី​ទិដ្ឋភាព​សាលា​ជាក់ស្តែង​ផង​ដែរ ។

គួរ​បញ្ជាក់​ផង​ដែរ​ថា សហព័ន្ធ​សេវា​អប់រំ​នៅ​កម្ពុជា ត្រូវ​បាន​បង្កើត​ឡើង ដើម្បី​ចូលរួម​ចំណែក​ជាមួយ​រាជរដ្ឋាភិបាល​កម្ពុជា ក្នុង​ការ​លើកកម្ពស់​វិស័យ​អប់រំ​នេះ ដោយ​រួម​ផ្ដុំ​ស្ថាប័ន សមាគម​អប់រំ និង​បណ្ដុះបណ្ដាល​ប្រមាណ​ជិត ១០០ ស្ថាប័ន ដែល​មាន​ទស្សនវិស័យ​រួម​គ្នា ក្នុង​ការ​លើកកម្ពស់​គុណភាព​អប់រំ និង​អភិវឌ្ឍ​ធនធានមនុស្ស​នៅ​កម្ពុជា ឱ្យ​កាន់តែ​ប្រសើរ​ឡើង ។ នៅ​ក្នុង​ចំណោម​សមាជិក​របស់​សហព័ន្ធ​សេវា​អប់រំ​នៅ​កម្ពុជា មាន​សមាជិក​ជាង ៨០ ភាគរយ ជា​គ្រឹះស្ថានសិក្សា​ចំណេះ​ទូទៅ​ឯកជន ដែល​បាន​និង​កំពុង​បម្រើសេវា​អប់រំ ៕ ដោយ​សហការ