រាជធានីភ្នំពេញ ៖ នៅថ្ងៃទី ១៨ ខែកុម្ភៈ ឆ្នាំ ២០២១ សហគ្រិនខ្មែរ ដែលជាស្ថាប័នមួយស្ថិតនៅក្រោមក្រសួងសេដ្ឋកិច្ច និងហិរញ្ញវត្ថុ ជាមួយទស្សនវិស័យក្លាយជាថ្នាលជាតិសម្រាប់ការលើកកម្ពស់គ្រប់សកម្មភាពរបស់រិស័យសហគ្រិនភាព និងអង្គការដៃគូដើម្បីចីរភាពវិស័យកសិកម្មកម្ពុជា (CPSA) ដែលជាវេទិការដៃគូពហុភាគី បានចូលរួមសហការជាដៃគូ ដើម្បីលើកកម្ពស់ភាពជាសហគ្រិនក្នុងវិស័យកសិកម្ម ។
ភាគីទាំងពីរបានឯកភាពគ្នាក្នុងដំណើរការជម្រុញឱ្យមាននវានុវត្តន៏ ការសម្របខ្លួនទៅនឹងបច្ចេកវិទ្យាថ្មីដំណោះស្រាយផ្នែកផលិតកម្ម ការអភិវឌ្ឍជំនាញ ការផ្សារភ្ជាប់គ្រឹះស្ថានអប់រំ និងវិស័យឧស្សាហកម្ម និងភាពជាសហគ្រិនក្នុងវិស័យកសិកម្ម ព្រមទាំងការផ្លាស់ប្តូរព័ត៌មាន និងទិន្នន័យទាក់ទងនឹងវិស័យកសិកម្មក្នុងគោលបំណងបង្កើតជាយន្ដការគាំទ្រនានា ។
ក្នុងឱកាសនេះ សហគ្រិនខ្មែរ និងអង្គការដៃគូដើម្បីចីរភាពវិស័យកសិកម្មកម្ពុជាបានចាប់ផ្តើមអនុវត្ត កម្មវិធីបណ្ដុះ ធុរកិច្ចថ្មី សហគ្រិនក្នុងសហគមន៍កសិកម្ម ដែលមានរយៈពេលបីឆ្នាំ ក្នុងគោលបំណងបង្កើតឧស្សាហកម្មកសិកម្មប្រកប ដោយផលិតភាព និងចីរភាព ។ គម្រោងនឹងស្វែងរកដំណោះស្រាយចំពោះបញ្ហាចំបងចំនួនពីរ ដែលជះឥទ្ធិពលដល់ វិស័យកសិកម្មនៅកម្ពុជា រួមមាន ផលិតភាពទាប និងខ្វះការចូលរួមពីយុវជននៅក្នុងវិស័យនេះ ។ គម្រោងនេះមានសមាសធាតុពីរសំខាន់ៗ ទីមួយគឺ “ការបណ្ដុះធុរកិច្ចថ្មី” ដែលយុវជនត្រូវបានបណ្តុះបណ្តាលរយៈ ពេល ៤ ខែលើមុខវិជ្ជាបច្ចេកទេសកសិកម្ម សហគ្រិនភាព និងជំនាញធុរកិច្ច និងទីពីរគឺ “ការចុះកម្មសិក្សា” របស់យុវជន រយៈពេលមួយឆ្នាំជាមួយសហគមន៍កសិកម្ម ក្នុងខេត្តគោលដៅមួយចំនួន ដើម្បីជួយកសិករ និងសហគមន៍ជនបទ ។
លោកបណ្ឌិត ឈៀង វណ្ណមុនិណ្ឌ នាយកប្រតិបត្តិ សហគ្រិនខ្មែរ បានមានប្រសាសន៍ថា យោងតាម ‘ស្ថានភាព និងទស្សនៈវិស័យសេដ្ឋកិច្ចកម្ពុជា’ ដែលបង្ហាញដោយក្រសួងសេដ្ឋកិច្ច និងហិរញ្ញវត្ថុ វិស័យកសិកម្មត្រូវបានប៉ាន់ ស្មានថាមានកំណើនវិជ្ជមានប្រមាណ ០.៥ ភាគរយ ក្នុងឆ្នាំ២០២០ ក្នុងអំឡុងពេលជំងឺកូវីដ-១៩ ខណៈដែលវិស័យដទៃទៀតដូចជាវិស័យឧស្សាហកម្ម និងសេវាកម្ម ត្រូវបានប៉ាន់ស្មាន ថាមានកំណើនអវិជ្ជមាន ។ ក្នុងបរិបទថ្មីនេះ យើងរំពឹងថា ការបង្កើនឱ្យមាននវានុវត្តន៍ និងជំនាញអាជីវកម្មនៅតាមសហគមន៍អាចជួយជំរុញ វិស័យកសិកម្មឱ្យមានសក្ដានុពលពេលលេញ ។ កម្មវិធីបណ្ដុះធុរកិច្ចថ្មី សហគ្រិនក្នុងសហគមន៍កសិកម្ម ផ្តួចផ្តើមឡើងដើម្បីឆ្លើយតបនឹងតម្រូវការខាងលើតាមរយៈការលើកកម្ពស់សហគ្រិនភាពដល់យុវជន និងនិស្សិតនៅតាមសកលវិទ្យាល័យ ការពង្រីកសមត្ថភាពរបស់សហគមន៍កសិកម្មព្រមទាំងកសិករ និងការបង្កើននវានុវត្តន៏នៅក្នុងខ្សែសង្វាក់តម្លៃ កសិកម្ម ។
លោក ច័ន្ទ សេរីរដ្ឋា នាយកប្រចាំប្រទេស អង្គការដៃគូដើម្បីចីរភាពវិស័យកសិកម្មកម្ពុជា បង្ហាញសុទិដ្ឋិនិយមថា “ប្រសិនបើអនុវត្តបានល្អប្រសើរ គម្រោងនេះ នឹងចូលរួមចំណែកពង្រឹងសេដ្ឋកិច្ចជនបទ តាមរបៀបច្រើនយ៉ាង គឺទីមួយទាក់ទាញយុវជនឱ្យងាកមកចាប់អារម្មណ៍ការងារ និងរបរកសិកម្ម ដូច្នេះវានឹងនាំមកនូវផ្នត់គំនិតថ្មីៗ ដែលចូលរួមចំណែកអភិវឌ្ឍន៍វិស័យកសិកម្មប្រកបដោយនិរន្តរភាព ។ លើសពីនេះទៀត គម្រោងនេះនឹងជួយកាត់បន្ថយការធ្វើចំណាកស្រុកឆ្លងកាត់ប្រទេស និងធ្វើចំណាកស្រុកពីទីជនបទទៅកាន់ទីក្រុង” ។ គាត់ពន្យល់ថា “ប្រសិនបើកសិកម្ម នៅតំបន់ជនបទ បង្ហាញភាពទាក់ទាញផ្នែកសេដ្ឋកិច្ច យុវជន ស្ត្រី និងបុរស នឹងត្រូវទទួលអត្ថប្រយោជន៍ពីការងារនៅនឹងកន្លែង ពោលគឺនឹងមិនបង្ខំចិត្តធ្វើចំណាកស្រុក ដើម្បីស្វែងរកឱកាសការងារនៅឆ្ងាយពីសហគមន៍របស់ខ្លួនឡើយ” ។
គម្រោងនេះ នឹងភ្ជាប់បណ្តាញជាមួយអ្នកពាក់ព័ន្ធជាច្រើន មានដូចជា សាកលវិទ្យាល័យ ក្រុមកសិករ កសិពាណិជ្ជកម្ម ភ្នាក់ងាររដ្ឋាភិបាល និងអង្គការសង្គមស៊ីវិល ។ សហគ្រិនខ្មែរ និងអង្គការដៃគូដើម្បីចីរភាពវិស័យកសិកម្មកម្ពុជា សូមស្វាគមន៍ដៃគូដទៃ ក្នុងការគាំទ្រដល់ដំណើរការអនុវត្តគម្រោងនេះ ។
អំពីសហគ្រិនខ្មែរ ៖
សហគ្រិនខ្មែរ (KE) ត្រូវបានបង្កើតឡើងជាស្ថាប័នប្រតិបត្តិករមួយ ដែលមានក្រសួងសេដ្ឋកិច្ច និងហិរញ្ញវត្ថុជា បរធនបាលទាយក ដើម្បីអនុវត្តកម្មវិធីគាំទ្រ និងធ្វើការដោយផ្ទាល់ ជាមួយស្ថាប័នដៃគូ និងអត្ថគាហកៈនៅក្នុង ប្រព័ន្ធអេកូឡូស៊ីសហគ្រិនភាពនៅកម្ពុជា ។ គោលបំណងបស់សហគ្រិនខ្មែរ គឺដើម្បីកៀរគរ, វិនិយោគ និងគ្រប់គ្រងបរធនពីប្រភពស្របច្បាប់ទាំងអស់ ដើម្បីគាំទ្រដល់ការអភិវឌ្ឍប្រព័ន្ធអេកូឡូស៊ីសហគ្រិនភាពដែលមានភាពរស់រវើក និងផ្តល់ការគាំទ្រផ្នែកហិរញ្ញវត្ថុ និងមិនមែនហិរញ្ញវត្ថុដល់អ្នកកសាងប្រព័ន្ធអេកូឡូស៊ីសហគ្រិនភាព ។ អ្នកទាំងនោះរួមមាន សហគ្រិន ធុរកិច្ចបង្កើតថ្មីដែលមានលក្ខណៈនវានុវត្តន៏ (Innovative Startups), សហគ្រាស ធុនតូចនិងមធ្យមដែលមានសក្តានុពល (Potential SMEs) និងស្ថាប័នដៃគូ ដែលចូលរួមជំរុញសកម្មភាព សហគ្រិនភាពផ្សេងៗ សំដៅជម្រុញនវានុវត្តន៍ និងការបង្កើតតម្លៃបន្ថែមនៅក្នុងសេដ្ឋកិច្ចកម្ពុជា ។
សម្រាប់ព័ត៌មានបន្ថែម សូមទំនាក់ទំនងតាមរយៈលោក ជា ស៊ុនសត្យា ប្រធានគ្រប់គ្រងផ្នែកអភិឌ្ឍន៍សហគ្រិនភាព
អុីមែល៖ contact@khmerenterprise.info
គេហទំព័រ៖ www.khmerenterprise.info
អំពីអង្គការដៃគូដើម្បីចីរភាពវិស័យកសិកម្មកម្ពុជា (CPSA) ៖
CPSA ជាអង្គការក្រៅរដ្ឋាភិបាលមួយ ដែលបានចុះបញ្ជីនៅក្នុងក្រសួងការបរទេស និងសហប្រតិបត្តិការ អន្តរជាតិកម្ពុជា ។ CPSA (វេទិការដៃគូពហុភាគី) ដែលធ្វើការរួមគ្នាជាមួយ ក្រុមហ៊ុន ភ្នាក់ងាររដ្ឋាភិបាល អង្គការសង្គមស៊ីវិល ក្រុមកសិករនិងស្ថាប័នហិរញ្ញវត្ថុ ដើម្បីភ្ជាប់កសិករខ្នាតតូចទៅនឹងទីផ្សារ ។ គោលដៅរួមរបស់យើងគឺ បង្កើនប្រាក់ចំណូល និងផលិតភាពរបស់កសិករ ព្រមទាំងជម្រុញឱ្យមាន និរន្តរភាពបរិស្ថានសម្រាប់ការងារកសិកម្ម របស់ពួកគេត្រូវបានធ្វើឱ្យប្រសើឡើង ។
សម្រាប់ព័ត៌មានបន្ថែម សូមទំនាក់ទំនង ៖ លោក ច័ន្ទ សេរីរដ្ឋា នាយកប្រចាំប្រទេស
អុីមែល៖ ratha@growasia.org
គេហទំព័រ៖ www.cpsa-growasia.org ៕ ដោយសហការ
ចែករំលែកព័តមាននេះ