ភ្នំពេញ៖ កាលពីថ្ងៃទី១៨ ខែកុម្ភៈ កន្លងទៅនេះ ធនាគារ ស៊ីអាយអិមប៊ី ភីអិលស៊ី (ធនាគារ CIMB) បានឧបត្ថម្ភសម្ភារៈពិសោធន៍ទំនើបចំនួន…
ភ្នំពេញ៖ កាលពីថ្ងៃទី១៨ ខែកុម្ភៈ កន្លងទៅនេះ ធនាគារ ស៊ីអាយអិមប៊ី ភីអិលស៊ី (ធនាគារ CIMB) បានឧបត្ថម្ភសម្ភារៈពិសោធន៍ទំនើបចំនួន ២គ្រឿង ដល់មជ្ឈមណ្ឌលសូត្រខ្មែរ នៃសាកលវិទ្យាល័យ ភូមិន្ទភ្នំពេញ ក្រោមអធិបតីភាពរបស់ ឯកឧត្តមបណ្ឌិត ម៉ី កល្យាណ ប្រធានក្រុមប្រឹក្សាភិបាលមជ្ឈមណ្ឌលសូត្រខ្មែរ ប្រធានក្រុមប្រឹក្សាភិបាលសាកលវិទ្យាល័យ ភូមិន្ទភ្នំពេញ និងទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ។
ក្នុងកម្មវិធីនេះដែរ លោក ប៊ុន យីន ប្រធាននាយកប្រតិបត្តិរបស់ធនាគារ CIMB ក៏បានប្រគល់អាហារូបករណ៍ ដល់និស្សិតជីវសាស្ត្រ ចំនួន ៥រូប នៃសាកលវិទ្យាល័យ ភូមិន្ទភ្នំពេញ ដែលបានចូលរួមយ៉ាងសកម្ម ដោយស្ម័គ្រចិត្ត ក្នុងការបំពេញការងារ ក្នុងមជ្ឈមណ្ឌលសូត្រខ្មែរ។
ដោយយល់ឃើញថាសូត្រខ្មែរ គឺជាអត្តសញ្ញាណ និងបេតិកភណ្ឌជាតិ ដែលមានប្រវត្តិ និងវប្បធម៌យូរលង់ណាស់មកហើយ ក្នុងជីវភាពប្រជាជនខ្មែរ ដែលអាចច្នៃជាសម្លៀកបំពាក់ដ៏មានតម្លៃ ក៏ដូចជាសម្ភារៈតុបតែង ក្នុងកម្មវិធីប្រពៃណីនានាផងដែរ។ បច្ចុប្បន្ន បើតាមរបាយការណ៍របស់មជ្ឈមណ្ឌលសូត្រខ្មែរ ប្រទេសកម្ពុជាបាននាំចូលសូត្រ ពីក្រៅប្រទេស រហូតដល់ ៩៩% ខណៈដែលសូត្រក្នុងស្រុក អាចផ្គត់ផ្គង់ទីផ្សារ បានត្រឹមប្រមាណ ១% ប៉ុណ្ណោះ។ ដូច្នេះការលើកកម្ពស់ លើកត្តាបច្ចេកទេស សម្ភារៈទំនើប ការចិញ្ចឹម និងការថែទាំដង្កូវនាង ដែលជាវត្ថុធាតុដើមចម្បង ក្នុងការបង្កើតសរសៃសូត្រឲ្យបានល្អ តាមតម្រូវការទីផ្សារ និងមានគុណភាពខ្ពស់ ដើម្បីលើកស្ទួយវិស័យសូត្រខ្មែរ ក៏ដូចជាលើកកម្ពស់ជីវភាពប្រជាជនកម្ពុជា សិប្បកម្មសូត្រខ្មែរ និងសេដ្ឋកិច្ចជាតិជារួមផងដែរ។
ថ្លែងក្នុងកម្មវិធីនេះ លោកប៊ុន យីន ប្រធាននាយកប្រតិបត្តិ នៃធនាគារ CIMB បានបង្ហាញចំណាប់អារម្មណ៍ថា៖ «ខ្ញុំមានមោទនភាព និងក្តីសោមនស្សរីករាយក្រៃលែង ដែលបានដឹងថា មជ្ឈមណ្ឌលសូត្រខ្មែរ បានកសាងគ្រឹះយ៉ាងរឹងមាំ សម្រាប់វិស័យសូត្រ ក្នុងការស្រាវជ្រាវផលិតផលពូជដង្កូវនាង ដែលមានសុខភាពល្អ រហូតដល់ជាង ២០ពូជ ដើម្បីទទួលបានទិន្នផលសូត្រខ្ពស់ ក៏ដូចជាស្រាវជ្រាវអភិវឌ្ឍពូជដើមមន ដែលជាចំណីធម្មជាតិ ព្រមទាំងចំណីសិប្បនិមិត្ម សម្រាប់ដង្កូវនាងផងដែរ។ ដូច្នេះខ្ញុំជឿជាក់យ៉ាងមុតមាំថា សម្ភារៈពិសោន៍ទំនើប ដែលធនាគារ ស៊ីអាយអិមប៊ី ប្រគល់ជូននាថ្ងៃនេះ នឹងបង្កភាពកាន់តែងាយស្រួល ដល់ការស្រាវជ្រាវ និងសម្រេចជោគជ័យ លើចំណីសិប្បនិម្មិត និងការបង្កាតពូជថ្មីៗកាន់តែល្អបន្ថែមទៀតផងដែរ»។
ជាមួយគ្នានេះ លោកប៊ុន យីន បានផ្សាភ្ជាប់អត្ថន័យនៃការអភិវឌ្ឍពូជដង្កូវនាង ទៅនឹងកត្តាធនធានមនុស្សដូចជាសិស្សានុសិស្ស និងនិស្សិតដែលជាកម្លាំងចលករស្នូលដ៏រឹងមាំក្នុងការបន្តនូវគំនិតផ្តួចផ្តើម និងធានាការអភិវឌ្ឍនេះបានស្ថិតឋេរចេរកាលរាងរហូត។ លោកបានជូនពរ ដល់ក្មួយៗនិស្សិតអាហារូបណ៍ ផ្នែកជីវសាស្ត្រទាំង ៥រូប បន្តខិតខំសិក្សា នៅក្នុងថ្នាក់រៀន និងអនុវត្តផ្ទាល់ នៅក្នុងមជ្ឈមណ្ឌលសូត្រខ្មែរ រួចផ្តល់ត្រឡប់ជូនមជ្ឍមណ្ឌលវិញ ក្រោយពេលបញ្ចប់ការសិក្សា ដើម្បីឲ្យវិស័យសូត្រខ្មែរមានការលូតលាស់ និងគង់វង់យូរអង្វែង។
ក្នុងនាមជាអ្នកផ្តួចផ្តើមបង្កើតមជ្ឈមណ្ឌលសូត្រខ្មែរនេះ ឯកឧត្តមបណ្ឌិត ម៉ី កល្យាណ ប្រធានក្រុមប្រឹក្សាភិបាល នៃមជ្ឈមណ្ឌលសូត្រខ្មែរ និងសាកលវិទ្យាល័យ ភូមិន្ទភ្នំពេញ បានថ្លែងថា៖ «មកដល់ពេលនេះ យើងបានកសាងគ្រឹះរឹងមាំមួយហើយ ដែលយើងមានមជ្ឈមណ្ឌលសូត្រខ្មែរនេះ ធនធានមនុស្ស បច្ចេកទេស និងសម្ភារៈទំនើប ដើម្បីបន្តការងារអភិវឌ្ឍបន្ថែមទៀត ហើយគោលបំណងរបស់យើងធំ គឺមិនមែនត្រឹមតែថ្នាក់សាលាឡើយ តែជាគោលដៅថ្នាក់ជាតិ ក្នុងការស្តារវិស័យសូត្រខ្មែរយើងឡើងវិញ ដោយយើងត្រូវការការចូលរួមទាំងអស់គ្នា។
ឥឡូវនេះ គោលដៅចម្បងរបស់យើង គឺបង្កើតគុណភាព និងផលិតភាពខ្ពស់ នៃដង្កូវនាង ក្នុងការផលិតផលសរសៃសូត្រ។ ក្រៅពីការបង្កាត់ពូជដង្កូវនាង ដែលអាចផលិតសរសៃសូត្រវែងជាងមុន យើងក៏កំពុងសិក្សាលើការបង្កើតចំណីសិប្បនិម្មិត ដើម្បីធ្វើឲ្យដង្កូវនាងមានសុខភាពល្អ គ្មានជំងឺ គ្មានការងាប់ច្រើន និងកាត់បន្ថយកម្លាំងពលកម្ម។ ដូច្នេះសម្ភារៈពិសោធន៍ទំនើប ដែលធនាគារ CIMB ឧបត្ថម្ភនាពេលនេះ នឹងជួយដល់ការស្រាវជ្រាវរបស់យើង ក្នុងការសម្រេចបានចំណីសិប្បនិម្មិត នាពេលអនាគត»។
ឆ្លៀតក្នុងឱកាសនោះ ឯកឧត្តមបណ្ឌិត ម៉ី កល្យាណ ក៏បានសម្តែងការថ្លែងអំណរគុណ ដល់ធនាគារ CIMB ដែលបានចូលរួមស្តារវិស័យសូត្រខ្មែរ ជាមួយនឹងមជ្ឈមណ្ឌលសូត្រខ្មែរ ហើយឧបត្ថម្ភនូវសម្ភារៈពិសោធន៍ទំនើប ស្របតាមតម្រូវការ និងទាន់ពេលវេលា។ មិនតែប៉ុណ្ណោះ ឯកឧត្តមបណ្ឌិតក៏មានក្តីសោមនស្សរីករាយផងដែរ ដោយនិស្សិតជីវសាស្ត្រ៥រូប ដែលបម្រើការងារដោយស្ម័គ្រចិត្ត ក្នុងមជ្ឈមណ្ឌលសូត្រខ្មែរ ទទួលបានការលើកទឹកចិត្ត ជាមួយនឹងការផ្តល់ជូនអាហារូបករណ៍សិក្សា ពីធនាគារ CIMB។
ឯកឧត្តមបណ្ឌិតលើកទឹកចិត្តឲ្យមានការចូលរួមកាន់តែច្រើនឡើង ពីដៃគូឯកជន និងអង្គការនានា ដែលមានបេះដូង ក្នុងការស្តារវិស័យសូត្រខ្មែរ ដែលជាអត្តសញ្ញាណ វប្បធម៌ សង្គម និងវប្បធម៌របស់យើង។ សព្វថ្ងៃនេះ មានផ្នែកឯកជនកាន់តែច្រើនឡើង បានចូលរួមជាមួយនឹងមជ្ឈមណ្ឌលសូត្រខ្មែរ ក្នុងចិញ្ចឹមដង្កូវនាង និងដាំមន ដែលជាចំណីដង្កូវនាង ដោយក្នុងនោះមានសាខាសហគមន៍កសិករ នៅតាមបណ្តាខេត្តសក្តានុពលនានា រួមមានខេត្តកំពង់ស្ពឺ មណ្ឌលគិរី និងបាត់ដំបងជាដើម។ ហើយនឹងមានខេត្តជាច្រើនបន្តទៀត ដែលបានចាប់អារម្មណ៍ និងមានបេះដូង និងការប្តេជ្ញាចិត្តខ្ពស់ ចូលរួមជាមួយនឹងមជ្ឈមណ្ឌលសូត្រខ្មែរ។
សូមបញ្ជាក់ផងដែរថា ធនាគារ CIMB បានចាប់ផ្តើមប្រតិបត្តិការអាជីវកម្មរបស់ខ្លួន ក្នុងប្រទេសកម្ពុជា នៅចុងឆ្នាំ២០១០ ហើយបច្ចុប្បន្នធនាគារមានសាខាចំនួន១៤ តាមបណ្តារាជធានី និងខេត្តសំខាន់ៗ។ ក្នុងរយៈពេលប្រមាណ ១០ឆ្នាំមកនេះ ក្រៅពីរួមចំណែក ដល់ការអភិវឌ្ឍធនធានមនុស្ស និងសេដ្ឋកិច្ច ក្នុងប្រទេសកម្ពុជា ធនាគារ CIMB ក៏បានចូលរួមសកម្មភាពសប្បុរសធម៌ជាច្រើន ដែលរួមមានវិស័យសំខាន់ៗ ដូចជាវិស័យអប់រំ ដោយធនាគារបានឧបត្ថម្ភ ដល់សាលាដាច់ស្រយ៉ាលនានា និងផ្តល់អាហារូបករណ៍ ដល់និស្សិត សិក្សានៅក្នុងស្រុក និងក្រៅប្រទេស | វិស័យសុខាភិបាល ដោយធនាគារបានបរិច្ចាគឈាម និងឧបត្ថម្ភបរិក្ខាពេទ្យដល់មន្ទីរពេទ្យនានា |បរិស្ថាន ដោយធនាគារបានរៀបចំកម្មវិធីយល់ដឹង និងកាត់បន្ថយការប្រើប្រាស់សម្ភារៈប្លាស្ទិក ក៏ដូចជាកម្មវិធីដាំដើមឈើ នៅតាមសាលារៀននានា និងនៅតំបន់រមណីយដ្ឋានអង្គរ និងផ្នែកសង្គមកិច្ច ដោយធនាគារបានឧបត្ថម្ភ ដល់កាកបាទក្រហម និងមជ្ឈមណ្ឌលកុមារកំព្រានានា និងការឧបត្ថម្ភសម្ភារៈពិសោធន៍ទំនើប ដល់មជ្ឈមណ្ឌលសូត្រខ្មែរ នាពេលនេះជាដើម។
ចែករំលែកព័តមាននេះ