រាជធានីភ្នំពេញ ៖ មន្ត្រីនគរបាលមន្ទីរប្រឆាំងគ្រឿងញៀនក្រសួងមហាផ្ទៃម្នាក់ រងនូវការចោទប្រកាន់ពីបទប្លន់យកប្រាក់ និងជាប់ពាក់ព័ន្ធករណីប្រើប្រាស់គ្រឿងញៀន នារសៀលថ្ងៃទី៦ ខែមករា ឆ្នាំ២០១៩ ត្រូវបានចៅក្រមស៊ើបសួរសាលាដំបូងរាជធានីភ្នំពេញ ចេញដីកាសម្រេចឃុំខ្លួនដាក់ពន្ធនាគារជាបណ្តោះអាសន្ន…
រាជធានីភ្នំពេញ ៖ មន្ត្រីនគរបាលមន្ទីរប្រឆាំងគ្រឿងញៀនក្រសួងមហាផ្ទៃម្នាក់ រងនូវការចោទប្រកាន់ពីបទប្លន់យកប្រាក់ និងជាប់ពាក់ព័ន្ធករណីប្រើប្រាស់គ្រឿងញៀន នារសៀលថ្ងៃទី៦ ខែមករា ឆ្នាំ២០១៩ ត្រូវបានចៅក្រមស៊ើបសួរសាលាដំបូងរាជធានីភ្នំពេញ ចេញដីកាសម្រេចឃុំខ្លួនដាក់ពន្ធនាគារជាបណ្តោះអាសន្ន ដើម្បីរង់ចាំបើកសវនាការជំនុំជម្រះទោសតាមផ្លូវច្បាប់ ។
ជនសង្ស័យឈ្មោះ លោក ភិន រតនៈ ភេទប្រុស អាយុ៣៧ឆ្នាំ មុខរបរជាមន្ត្រីនគរបាលពាក់ស័ក្តិ៤កន្លះ បម្រើការងារនៅការិយាល័យទី៥ នៃមន្ទីរប្រឆាំងគ្រឿងញៀន និងមានអាសយដ្ឋាននៅភូមិព្រៃពពេល សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ ។
សូមរំលឹកថា ជនសង្ស័យត្រូវបានកម្លាំងសមត្ថកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃឃាត់ខ្លួន តាមបណ្តឹងរបស់ជនរងគ្រោះឈ្មោះ អ៊ុ រិទ្ធី ភេទប្រុស អាយុ៣៦ឆ្នាំ រស់នៅភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ ។
យោងតាមពាក្យបណ្តឹងរបស់ជនរងគ្រោះបានបញ្ជាក់ថា កាលពីរសៀលថ្ងៃទី១៧ ខែធ្នូ ឆ្នាំ២០១៩ កន្លងទៅ ជនសង្ស័យឈ្មោះ ភិន រតនៈ និងមន្ត្រីនគរបាលមន្ទីរប្រឆាំងគ្រឿងញៀន៣នាក់ទៀត បានជិះរថយន្តម៉ាកអាល់ហ្វាតមួយគ្រឿង នឹងម៉ូតូណៃហតមួយ ទៅឈប់នៅមុខផ្ទះរបស់ជនរងគ្រោះ ។ បន្ទាប់មកជនសង្ស័យឈ្មោះ ភិន រតនៈ បានដកអាវុធខ្លីបាញ់ឡើងលើចំនួន១គ្រាប់ និងបញ្ជាឲ្យគូកនទៅយកលុយពីជនរងគ្រោះចំនួន៣.២០០ដុល្លារអាមេរិក និងលុយចំនួន២៨ម៉ឺនរៀល ព្រមទាំងទូរស័ព្ទដៃម៉ាកសាំសុង១គ្រឿង ។
ក្រោយពេលកើតហេតុ ជនរងគ្រោះ បានទៅដាក់ពាក្យបណ្តឹង ប្តឹងជនសង្ស័យ និងគូកននៅប៉ុស្តិ៍នគរបាលរដ្ឋបាលសំរោងក្រោម ខណ្ឌពោធិសែនជ័យ ។ បន្ទាប់មកនគរបាលប៉ុស្តិ៍បានធ្វើការឃាត់ ខ្លួនជនសង្ស័យ និងបានរាយការណ៍ជូនទៅមន្ទីរប្រឆាំងគ្រឿងញៀន ដែលជាអង្គភាពរបស់គេ ដើម្បីឲ្យយកកូនចៅទៅចាត់ការតាមពាក្យបណ្តឹង ។ ប៉ុន្តែដោយយោងទៅលើជនសង្ស័យប្រព្រឹត្តបទល្មើសព្រហ្មទណ្ឌជាក់ស្តែង ទើបមានបទបញ្ជាពីថ្នាក់លើឲ្យបញ្ជូនជនសង្ស័យទៅនាយកដ្ឋាននគរបាលព្រហ្មទណ្ឌក្រសួង ដើម្បីចាត់ការតាមផ្លូវច្បាប់វិញ ។
តាមមន្ត្រីនគរបាលព្រហ្មទណ្ឌបានបង្ហើបឲ្យដឹងថា ជនសង្ស័យបានសារភាពនៅចំពោះមុខសមត្ថកិច្ចថា រឿងដំបូងផ្តើមចេញពីជនរងគ្រោះបានយករូបភាពរូបគេកំពុងជក់ថ្នាំញៀន ទៅបង្ហោះចែកចាយលើសង្គមហ្វេសប៊ុក ទើបបណ្តាលឲ្យរូបគេមានការខឹងសម្បារ ហើយក៏នាំគូកនទៅដល់មុខផ្ទះ និងបានផ្ទុះអាវុធចំនួន១គ្រាប់ គំរាមជនរងគ្រោះដក ហូតយកទូរស័ព្ទដៃមួយគ្រឿងមែន ចំណែកលុយមិនបានយកទេ ។
ទោះជាយ៉ាងណាក្តី សមត្ថកិច្ចនគរបាលព្រហ្មទណ្ឌក្រសួងម ហាផ្ទៃ បានកសាងសំណុំរឿងបញ្ជូនជនសង្ស័យទៅសាលាដំបូងរាជធានីភ្នំពេញ តាមនីតិវិធី ។
នៅសាលាដំបូងតំណាងអយ្យការបានបើកការសាកសួរ នឹងបានធ្វើការចោទប្រកាន់ជនសង្ស័យជាផ្លូវការពីបទ.លួចមានស្ថានទម្ងន់ទោស និងកាន់កាប់អាវុធដោយគ្មានការអនុញ្ញាតិ រួចចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ៕ (កែសម្រួលដោយ ៖ ធីតា)
ចែករំលែកព័តមាននេះ