ខេត្តព្រះសីហនុ ៖ ទារកម្នាក់អាយុប្រមាណជាង១០ថ្ងៃ ត្រូវបានអ្នកភូមិដែលចេញទៅដកផ្សិតប្រទះឃើញ កាលពីវេលាម៉ោងជាង៧ព្រឹក ថ្ងៃទី១១ មិថុនា នៅក្នុងព្រៃអាកាស្យាចម្ងាយពីភូមិប្រហែល១០០ម៉ែត្រ ហើយក៏រើសយកមកចិញ្ចឹម ។ យោងតាមស្ត្រីឈ្មោះ ហួន ស្រីមុំ អាយុ៣០ឆ្នាំ ដែលជាអ្នកបានឃើញទារកនេះមុនគេ ហើយរើសយកមកចិញ្ចឹមនិយាយថា គ្រួសារគាត់មានជីវភាពមិនជាធូរធារប៉ុន្មានទេ និងមានកូនស្រីម្នាក់ តែគាត់ចង់បានកូនប្រុសម្នាក់ទៀត ឥទ្បូវរើសបានកូនប្រុសម្នាក់តាមបំណង ។
គាត់រៀបរាប់ថា នៅយប់មុនថ្ងៃរើសបានទារកនេះ ប្តីគាត់បានយល់សប្តិឃើញមានគេឱ្យដុំពេជ្រ លុះព្រឹកទ្បើងម៉ោងជាង៧ព្រឹកថ្ងៃទី១១ មិថុនា ខណៈគាត់ចេញទៅដកផ្សិតក្នុងព្រៃអាកាស្យា ស្រាប់តែឮសំទ្បេងទារកយំគាត់ក៏ដើរទៅរកសំទ្បេងនោះ ក៏ប្រទះឃើញទារកមួយកំពុងស្រែកយំខ្សាវៗ ខ្លួនប្រាណគ្មានរុំអ្វីទាំងអស់ ដៃជើងញ័រចំប្រប់ ។ ដោយក្តីអាណិតនិងហាថ្លែងមិនរួច ណាមួយចង់បានកូនប្រុសផងនោះ គាត់ក៏បានឱបយកទារកនោះ រត់ទៅប្រាប់ប្តីនិងអ្នកភូមិ និងបានយកទារកនេះមកកាន់ផ្ទះរបស់គាត់ ហើយបន្ទាប់មកបានផ្តល់ព័ត៌មានទៅមេភូមិ ចៅសង្កាត់ រហូតដល់លោកស្រីអភិបាលរងខេត្ត ។
យោងតាមប្រសាសន៍របស់លោកស្រី ប្រាក់ ច័ន្ទសុខា អភិបាលរងខេត្ត បានបញ្ជាក់ថា ចំពោះទារកនេះ ជាបឋមអាជ្ញាធរមានសមត្ថកិច្ចពាក់ព័ន្ធសុខចិត្តប្រគល់ទៅឱ្យគ្រួសារនេះ ដែលប្តីឈ្មោះ ព្រាប បញ្ញាវុធ ជាបុគ្គលិកក្រុមហ៊ុនស្រាបៀរអង្គរ និងប្រពន្ធឈ្មោះ ហួន ស្រីមុំ យកទៅចិញ្ចឹមជាបណ្តោះអាសន្នសិន ។ ចំណែកនៅថ្ងៃខាងមុខប្រសិនបើប្តីប្រពន្ធនេះ ខ្វះលទ្ធភាពក្នុងការចិញ្ចឹម អាចប្រគល់ទារកនេះមកឱ្យលោកស្រីដើម្បីយកទៅថែរក្សានៅក្នុងអង្គការសង្គ្រោះកុមារម្លប់តាប៉ាង ឬមួយអាចយកទៅប្រគល់ជូនមន្ទីរកិច្ចការនារីខេត្តក៏បានដែរ ។
ជុំវិញការប្លុងទារកចោលនេះ មិនមាននរណាម្នាក់ដឹងថា ត្រូវគេយកពីណាមកទុកចោលក្នុងព្រៃបែបនេះទេ ដែលអ្នកខ្លះសន្និដ្ឋានដោយចោទប្រកាន់ថា គឺម្តាយជាអ្នកនាំកូននេះមកទុកចោលដោយខ្លួនឯង ។ ទោះបីជាបែបណា វាពិតជាមានការលំបាកក្នុងការសន្និដ្ឋានណាស់ ទាក់ទិននឹងការបោះបង់កូនចោលបែបនេះ ព្រោះបច្ចុប្បន្នប្រសិនបើម្តាយឪពុកមិនមានលទ្ធភាពចិញ្ចឹម គេអាចស្វែងរកអ្នកចិញ្ចឹមបាន ឬអង្គការមនុស្សធម៌នានា ឬអាជ្ញាធរ គឺមិនគួរយកជីវិតកូនដែលនៅរស់រវើកទៅបោះបង់ចោលក្នុងព្រៃបែបនេះទ្បើយ ៕
ចែករំលែកព័តមាននេះ