រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ស្ដ្រីម្នាក់ទៅទិញស្បែកជើងនៅផ្សារឯករាជ្យ២ ស្រាប់តែត្រូវជនស្ស័យដាក់ថ្នាំសណ្តំនាំទៅដោះយកគ្រឿងអលង្ការ និងទូរស័ព្ទដៃអស់ពីខ្លួន បង្កឱ្យមានការភ្ញាក់ផ្អើលកាលពីម៉ោង៦ព្រលប់ ថ្ងៃទី២៦ ខែធ្នូ ឆ្នាំ២០១៩ ស្ថិតនៅភូមិព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនរងគ្រោះមានឈ្មោះបិន ស្រីអូន ហៅពៅ ភេទស្រី អាយុ២៤ឆ្នាំ មុខរបរជាអ្នករត់តុនៅហាងគុយទាវ «ស្រីអូន» មានស្រុកកំណើតនៅភូមិបរក្នុង ឃុំអង្គរមាស ស្រុកដងទង់ ខេត្តកំពត ចំណែកសម្ភារៈដែលបាត់បង់រួមមាន ៖ ខ្សែ.កមាស៤ជី ក្រវិលមាស១ជី និងទូរស័ព្ទដៃ១គ្រឿង ម៉ាក OPPO F9 ព្រមទាំងលុយជាង១០ម៉ឺនរៀល។
តាមប្រភពពីសម្ដីស្ត្រីរងគ្រោះបាននិយាយឱ្យដឹងថា មុនពេលកើតហេតុ រូបគាត់ដើរទៅផ្សារឯករាជ្យ២ ដើម្បីទិញស្បែកជើងឱ្យក្មួយ ដោយសារតែក្មួនទារសុំស្បែកជើង១សម្រាប់។ បន្ទាប់មកគាត់ក៏ទិញបានស្បែកជើងរួចហើយ ស្រាប់តែមានជនសង្ស័យដែលជាស្រី្ត២នាក់ ក្នុងនោះម្នាក់ដើរមកទះស្មាគាត់ ហើយសុំស្គាល់ រួចបបួលគាត់ជិះម៉ូតូទៅជាមួយ ដោយនិយាយថា «សុំរាប់អាននឹងគ្នា» ពេលនោះគាត់ក៏ព្រមឡើងជិះម៉ូតូទៅជាមួយ ដោយគាត់ជិះនៅកណ្ដាល ហើយត្រូវជនសង្ស័យឌុបគាត់យកទៅប្លុងចោលនៅចំណុចម្ដុំវត្តព្រៃស្ពឺ ស្ថិតក្នុងភូមិព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ ក្រោយមកជនសង្ស័យក៏ជិះម៉ូតូចេញទៅបាត់ ។
ប្រភពដដែលបន្តទៀតថា បន្ទាប់ពីជនសង្ស័យជិះម៉ូតូចេញទៅបាត់បានបន្តិច ទើបគាត់រៀងដឹងខ្លួនវិញ ដោយសារអស់ជាតិថ្នាំសណ្តំ គាត់ក៏លូកហៅប៉ៅខោយកទូរស័ព្ទមើលម៉ោង មិនឃើញទូរស័ព្ទ ក៏បានស្ទាបរកខ្សែ.ក ក្រវិល បាត់អស់ ព្រមទាំងលុយមួយចំនួនទៀត ទើបដឹងថា ជនសង្ស័យដាក់ថ្នាំសណ្តំយកអស់ ហើយក៏ដើរយំតាមផ្លូវគោលបំណងត្រឡប់ទៅផ្ទះវិញ ។
ខណៈពេលនោះដើរបានបន្តិចឃើញមានមនុស្សមួយក្រុម កំពុងតែអង្គុយផឹកស៊ី ក៏បានសុំអង្វរឲ្យពួកគាត់ឱ្យជូនត្រឡប់ទៅកាណាស៊ីធី ដើម្បីដើររកជនសង្ស័យនៅកន្លែងលក់មាស តែដើររកមិនឃើញជនសង្ស័យនោះទេ ក៏ត្រូវបានសមត្ថកិច្ចនាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលចោមចៅទី២ ដើម្បីជួយអន្តរាគមន៍ ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ចោមចៅទី២ ក៏បានទទួលពាក្យបណ្ដឹងជនរងគ្រោះ ហើយកសាងសំណុំរឿង និងស្រាវជ្រាវស៊ើបរកមុខសញ្ញាជនសង្ស័យខាងលើដើម្បីយកមកផ្ដន្ទាទោសទៅតាមច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ