រាជធានីភ្នំពេញ ៖ សេចក្តីរាយការណ៍បានឲ្យដឹងថា កាលពីព្រឹកថ្ងៃទី២៦ ខែធ្នូ ឆ្នាំ២០១៩ នៅសាលាដំបូងរាជធានីភ្នំពេញមានរៀបចំពិធីសម្បថចូលជាមន្ត្រីនគរបាលយុត្តិធម៌ ដែលមានមន្ត្រីមកពីអគ្គនាយកដ្ឋាន សុខភាពសត្វ និងផលិតកម្មសត្វ…
រាជធានីភ្នំពេញ ៖ សេចក្តីរាយការណ៍បានឲ្យដឹងថា កាលពីព្រឹកថ្ងៃទី២៦ ខែធ្នូ ឆ្នាំ២០១៩ នៅសាលាដំបូងរាជធានីភ្នំពេញមានរៀបចំពិធីសម្បថចូលជាមន្ត្រីនគរបាលយុត្តិធម៌ ដែលមានមន្ត្រីមកពីអគ្គនាយកដ្ឋាន សុខភាពសត្វ និងផលិតកម្មសត្វ នៃក្រសួងកិសកម្ម រុក្ខាប្រមាញ់ និងនេសាទ ចំនួន៧៧រូប ។ ពិធីសម្បថនោះក្រោមការធ្វើឡើងដោយលោកកោ វណ្ឌី អនុប្រធានសាលាដំបូង និងលោក ប្លង់ សុផល ព្រះរាជអាជ្ញារង នៃអយ្យការអមសាលាដំបូងរាជានីភ្នំពេញ ។
បើតាមមន្ត្រីមកពីអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងចំណោមមន្ត្រីដែលមកចូលរួមសម្បថឲ្យក្លាយទៅជាមន្ត្រីនគរបាលយុត្តិធម៌នេះ មានចំនួន៧៧រូប បុរស៦០រូប និងស្ត្រី១៧រូប ក្រោមការដឹកនាំដោយលោក តាន់ ថាន់ណារ៉ា អគ្គនាយក នៃអគ្គនាយកដ្ឋាន សុខភាពសត្វ និង ផលិតកម្មសត្វ ។
មន្ត្រីដដែលបន្តថា ក្នុងចំណោមមន្ត្រីទាំង៧៧រូបនោះ មានមកពីនាយកដ្ឋាន៣ និងមកពីមន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញផងដែរ ។ មន្ត្រីសាលាដំបូងរាជធានីភ្នំពេញ បានឲ្យដឹងថា អង្គភាពដែលមានតួនាទី នឹងភារកិច្ចចុះអនុវត្តច្បាប់ បង្ក្រាបបទល្មើសផ្សេងៗ លុះត្រាតែមន្ត្រីអង្គភាពនោះ បានស្បថនៅចំពោះមុខតុលាការ ដើម្បីឲ្យក្លាយខ្លួនទៅជាមន្ត្រីនគរបាលយុត្តិធម៌សិន ទើបមានសិទ្ធិចុះបង្ក្រាបឃាត់ខ្លួនជនសង្ស័យ ឬកសាងសំណុំរឿងបញ្ជូនទៅតុលាការបាន ។ ដូច្នោះហើយបានជាមន្ត្រីមកពីអគ្គនាយកដ្ឋានសុខភាពសត្វ នឹង ផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ មកស្បថឲ្យគ្រប់លក្ខណៈជាមន្ត្រីនគរបាលយុត្តិធម៍នេះ ៕ (កែសម្រួលដោយ ៖ ធីតា)
ចែករំលែកព័តមាននេះ