រាជធានីភ្នំពេញ ៖ «ប៉ាលាកូនហើយ គ្មានថ្ងៃវិលវិញឡើយ» នេះគឺជាបណ្ដាំចុងក្រោយរបស់បុរសចំណាស់ម្នាក់ មុនពេលដែលគាត់ចងកបញ្ចប់ជីវិតខ្លួនឯង ត្រូវបានគេសង្ស័យថា ជនរងគ្រោះមានស្មារតីមិនសូវល្អ ដោយក្រុមគ្រួសារបានអះអាងថា មួយរយៈចុងក្រោយនេះជនរងគ្រោះមានសភាពរវើរវាយ ចេះតែនិយាយប៉ប៉ាច់ប៉ប៉ោចតែម្នាក់ឯង និងតែងតែផឹកស្រាស្រវឹងហើយមួរម៉ៅរាល់ថ្ងៃ។
ជនរងគ្រោះដែលបាត់បង់ជីវិតត្រូវបានសិស្សសាលាក្បែរនោះប្រទះឃើញបង្កឲ្យមានការភ្ញាក់ផ្អើលឆោឡោកាលពីវេលាម៉ោង៦ព្រឹកថ្ងៃទី២០ ខែធ្នូ ឆ្នាំ២០១៩ នៅចំណុចក្នុងរោងចាស់មួយកន្លែង ស្ថិតក្នុងបរិវេណវត្តពូនភ្នំ ភូមិព្រៃពពេលថ្មី សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះដែលបាត់បង់ជីវិតឈ្មោះ គ្រីម ខេវ ភេទប្រុស អាយុជាង៥៨ឆ្នាំ មុខរបរសន្តិសុខក្រុមហ៊ុនឯកជន មានប្រពន្ធ ឈ្មោះហួត ស៊ីណយ អាយុ៦០ឆ្នាំ និងមានកូនប្រុស២នាក់ និងស្រីចំនួន២នាក់ នៅក្នុងបន្ទុកគ្រួសារ ហើយគ្រួសារនេះសព្វថ្ងៃរស់នៅក្នុងភូមិឃុំកើតហេតុខាងលើ ។
តាមប្រភពពីប្រពន្ធនិងកូនបុរសបានរៀបរាប់ឲ្យដឹងថា នៅវេលាយប់ថ្ងៃទី១៩ ខែធ្នូ ឆ្នាំ២០១៩ ជនរងគ្រោះបានជិះកង់១គ្រឿងចេញពីផ្ទះទៅយាមនៅក្រុមហ៊ុនមួយកន្លែងដូចសព្វមួយដងដែរ ហើយខណៈនោះក្រុមគ្រួសារទាំងមូលមិនបានចាប់អារម្មណ៍ថា ជនរងគ្រោះមានបំណងចង់បញ្ចប់ជីវិតខ្លួនឯងបែបនេះសោះ ។ ព្រោះជារៀងរាល់ថ្ងៃ ជនរងគ្រោះតែងតែចេញទៅយាមពេលយប់បែបនេះរហូត ហើយពេលចេញទៅ មានស្ពាយសាក់កាដូ១ផងដែរ បន្ទាប់មកក្រុមគ្រួសារបានចូលដេកជាធម្មតាមិនបានដឹងរឿងអ្វីឡើយ។
តាមប្រភពដដែលបានបន្តថា លុះដល់វេលាព្រឹកកើតហេតុ ស្រាប់តែមានសិស្សសាលាបឋមសិក្សាពូនភ្នំប្រទះឃើញជនរងគ្រោះចងកបញ្ចប់ជីវិតបាត់ទៅហើយ និងបង្កឲ្យមានការភ្ញាក់ផ្អើលដល់អ្នកភូមិនិងពួកគាត់ដែលជាប្រពន្ធនិងកូនៗ នាំគ្នារត់ទៅមើលទាំងការតក់ស្លុតនិងសោកស្ដាយយ៉ាងខ្លាំង។
តាមប្រភពដដែលបានបន្តទៀតថា ដោយឡែកការចងកបញ្ចប់ជីវិតខ្លួនឯងនោះ មិនដឹងថាជនរងគ្រោះមានវិបត្តិអ្វីនៅក្នុងគ្រួសារទេ គឺសង្ស័យមកពីជនរងគ្រោះមានស្មារតីមិនប្រក្រតី ដោយមួយរយៈចុងក្រោយនេះ ជនរងគ្រោះតែងផឹកស្រាស្រវឹងហើយមួរម៉ៅ និងចេះតែនិយាយប៉ប៉ាច់ប៉ប៉ោចតែម្នាក់ឯងទៀតផង។
តាមប្រភពពីនគរបាលបាននិយាយថា មុនពេលបាត់បង់ជីវិត ជនរងគ្រោះបានសរសេរលិខិតបណ្ដាំមួយព្យួរជាប់ខ្សែកាតពាក់កដោយបញ្ជាក់ថា«កើតថ្ងៃសុក្រ ទៅវិញថ្ងៃសុខ ប៉ាលាកូនហើយគ្មានថ្ងៃវិលវិញឡើយ» ។ នៅជិតកន្លែងកើតហេតុគេបានឃើញកង់១គ្រឿងដួលរួមជាមួយសាក់កាដូររបស់ជនរងគ្រោះផងដែរ។
បន្ទាប់មកកម្លាំងនគរបាលប៉ុស្តិ៍សំរោងក្រោមរួមជាមួយនគរបាលព្រហ្មទណ្ឌខណ្ឌពោធិ៍សែនជ័យបានចុះទៅកាន់ទីនោះនិងរាយការណ៍ជូននគរបាលការិយាល័យបច្ចេកទេសវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញចុះទៅពិនិត្យកោសល្យវិច្ច័យតាមជំនាញ៕(កែសម្រួលដោយ ៖ ធីតា)
ចែករំលែកព័តមាននេះ