ខេត្តកំពង់ចាម៖ ឆ្នេរខ្សាច់កោះប៉ែន ស្ថិតក្នុងឃុំកោះមិត្ត ស្រុកកំពង់សៀម ដែលជាតំបន់ទេសចរណ៍មួយបង្កើតឡើងមានរយៈពេលរាប់ឆ្នាំមកហើយ ហើយក៏បានទាក់ទាញភ្ញៀវជាតិ និងអន្តរជាតិមកលេងកម្សាន្តជាច្រើននាក់នៅក្នុងរដូវប្រាំងផងដែរ ។ ជាមួយនោះ ប្រឌឹសប្ញស្សីសម្រាប់ឆ្លងពីត្រើយក្រុងកំពង់ចាម…
ខេត្តកំពង់ចាម៖ ឆ្នេរខ្សាច់កោះប៉ែន ស្ថិតក្នុងឃុំកោះមិត្ត ស្រុកកំពង់សៀម ដែលជាតំបន់ទេសចរណ៍មួយបង្កើតឡើងមានរយៈពេលរាប់ឆ្នាំមកហើយ ហើយក៏បានទាក់ទាញភ្ញៀវជាតិ និងអន្តរជាតិមកលេងកម្សាន្តជាច្រើននាក់នៅក្នុងរដូវប្រាំងផងដែរ ។ ជាមួយនោះ ប្រឌឹសប្ញស្សីសម្រាប់ឆ្លងពីត្រើយក្រុងកំពង់ចាម ទៅលេងកម្សាន្តកំពុងមានប្រជាប្រិយភាព ទាក់ទាញមនុស្សមកលេងពីគ្រប់ទិសទី ។ តាមផែនការប្រឌឹសកំពុងសាងសង់នេះបើកបម្រើសេវាឱ្យភ្ញៀវជាតិ និងអន្តរជាតិឆ្លងពីក្រុងកំពង់ចាម មកលេងនៅឆ្នេរខ្សាច់កោះប៉ែននៅថ្ងៃទី១៥ ធ្នូ ខាងមុខ ។
ជួបជាមួយកម្មករឈ្មោះមូល លាង អាយុរ៣២ឆ្នាំ នៅភូមិកោះប៉ែន ឃុំកោះមិត្ត ប្រាប់ឱ្យដឹងកាលពីរសៀលថ្ងៃទី២ ធ្នូទឹកទន្លេមេគង្គបានចាប់ផ្ដើមស្រក មកដល់ចុងខែវិច្ឆិកា រូបលោកនិងអ្នកភូមិដទៃទៀត ដែលមានគ្នាចំនួន១១នាក់ បានចាប់ផ្ដើមសាងសង់ប្រឌឹសកោះប៉ែន ដោយក្នុង១ថ្ងៃទ ទួលកម្រៃ៤ម៉ឺនរៀល សម្រាប់យកទៅដោះស្រាយជីវភាពគ្រួសារ។
លោកបន្តថា ប្រឌឹសកោះប៉ែននេះ តាមធម្មតាត្រូវប្រើពេលវេលារហូតដល់ជាងកន្លះខែទើបរួចរាល់ ។ ដោយគាត់ត្រូវបានគេប្រើឱ្យចងរឹត និងដំទុបប្រឌឹសហើយម្នាក់ៗ សុទ្ធសឹងតែមានជំនាញផ្សេងៗគ្នា នៅពេលដែលប្រឌឹស ត្រូវបានសាងសង់រួចរូបលោកនឹងបន្តការងារថ្មី ដោយធ្វើសំណង់ឲ្យគេនៅក្រុងកំពង់ចាម ដើម្បីយកថវិកាមកផ្គត់ផ្គង់ជីវភាពគ្រួសារ និងឲ្យកូនបានទៅរៀនសូត្រមានចំណេះដឹងនឹងគេ។
លោកប៊ុន ដារ៉ា ម្ចាស់ប្រឌឹសកោះប៉ែន បានប្រាប់ឱ្យដឹងដែរថា កាលពីឆ្នាំ ២០១៨កន្លងទៅ ប្រឌឹសរបស់លោក ដែលត្រូវធ្វើមានទទឹង២ម៉ែត្រនិងបណ្ដោយជាង៩០ម៉ែត្រ ដោយធ្វើឡើងសម្រាប់តែមនុស្សដើរឬក៏ជិះកង់បានតែប៉ុណ្ណោះ សម្រាប់រថយន្តត្រូវបើកឆ្លងតាមស្ពានបេតុងកោះប៉ែន ហើយឆ្លងកាត់ភូមិដោយចូលមកដល់បរិវេណរមណីយដ្ឋានកោះប៉ែនតែម្ដង មានកន្លែងសម្រាប់ចតរថយន្តត្រឹមត្រូវ។ សមត្ថកិច្ចអាចជិះម៉ូតូឆ្លងកាត់ប្រឌឹសបានក្នុងករណីដែលមានការចាំបាច់ណាមួយដើម្បីអន្តរាគមន៍នៅតំបន់នេះ។
ម្ចាស់ប្រដឹសកោះប៉ែនបានប្រាប់បន្តថា មកដល់ឆ្នាំ២០១៩នេះ ទឹកទន្លេមេគង្គមានការប្រែប្រួលដោយបានស្រកលឿនក្នុងខែដូចគ្នា ហើយប្រឌិសដែលត្រូវធ្វើមានទទឹង២ម៉ែត្រនិងបណ្ដោយ៧០០ ម៉ែត្រគិតរហូតមកដល់ល្ងាចថ្ងៃទី២ ធ្នូ ២០១៩ ដោយសម្រេចបានប្រមាណ៨០ភាគរយហើយ គ្រោងនឹងចំណាយថវិកា៣ម៉ឺនដុល្លារ។
ជាមួយនោះ នៅផ្នែកកណ្ដាលនៃប្រឌឹសត្រូវធ្វើឡើងខ្ពស់ សម្រាប់ឱ្យទូកបងប្អូនខ្មែរ-អ៊ីស្លាម បើកចេញចូលបានដោយងាយស្រួល។ ដោយមានការណែនាំពីលោកអ៊ុន ចាន់ដា អភិបាលខេត្តកំពង់ចាម រូបលោកនឹងខិតខំបម្រើសេវាទទួលភ្ញៀវឲ្យបានល្អប្រសើរ ។ ហើយអ្នកដែលបានមកងូតទឹកលេងនៅកោះប៉ែន គឺមានកម្លាំងចាំឃ្លាំមើលហើយឱ្យងូតទឹក នៅក្នុងដែនដែលមានបាំងសំណាញ់ត្រឹមត្រូវហាមមិនឲ្យលេងនៅកន្លែងជ្រៅ។
លោកប៊ុន ដារ៉ា បានបន្ថែមថា ឬស្សីដែលធ្វើប្រឌឹសនេះ ត្រូវបានទិញមកពីខេត្តក្រចេះ ហើយត្រូវបានចងអូសបណ្ដែតដោយកាណូត យកមកធ្វើប្រដឹសនៅក្នុងឆ្នាំ២០១៩ នេះគឺធ្វើឲ្យខ្ពស់ជាងទឹក១ម៉ែត្រ ដើម្បីបង្ការក្រែងមានទឹកនាចដោយសារតែគេបើកទំនប់វារីអគ្គិសនីមេគង្គលើនៅប្រទេសឡាវ ធ្វើបែបនេះទើបអាចជៀសផុតបានព្រោះថាឆ្នាំ២០១៨ កន្លងទៅ ធ្លាប់ជួបបញ្ហានេះរួចមកហើយ។លោកក៏បានកោតសរសើរដល់ភ្ញៀវជាតិនិងអន្តរជាតិដែលបានមកលេងនៅទីនេះគឺមានការសម្អាតបរិស្ថាន បានល្អដោយសំរាមត្រូវបានយកទៅបោះចោលក្នុងធុងសំរាម។
ចែករំលែកព័តមាននេះ