ខេត្តមណ្ឌលគិរី ៖ ពិតជាកំពូលលោកប្តីមែន ខឹងប្រពន្ធស្តីបន្ទោសរឿងផឹកស៊ីគ្មានគិតការងារជួញដូរចិញ្ចឹមគ្រួសារក៏ស្ទុះវឹងទៅយកដែកកេះដុតផ្ទះចោល គ្មានស្តាយស្រណោះ ។ ហេតុការណ៍គួរឱ្យហួសចិត្តនេះ កើតឡើងនៅវេលាម៉ោង១៥និង២០នាទីរសៀលថ្ងៃទី៥ វិច្ឆិកា ចំណុចផ្លូវចំការកៅស៊ូតាម្រិច ស្ថិតនៅក្នុងភូមិត្រពាំងផ្អេ ឃុំស្រែខ្ទុម ស្រុកកែវសីមា ។
សមត្ថកិច្ចបានឲ្យដឹងថា កំពូលលោកប្តីនេះឈ្មោះ ប៊ុន ណារិន ភេទប្រុស អាយុ២៧ឆ្នាំជនជាតិខ្មែរ មុខរបរកសិករ ប្រពន្ធឈ្មោះ ភា ស្រីធី អាយុ២៩ឆ្នាំ ជាកសិករ មានកូន២នាក់ក្នុងបន្ទុក ។ បើតាមសមត្ថកិច្ចបញ្ជាក់ថា ប្តីចិត្តខ្លាំងជាងប៉ែតនេះគ្រាន់តែប្រពន្ធស្ដីបន្ទោសបន្តិចបន្តួច ក៏ខឹងហើយបានស្ទុះទៅយកដែកកេះមកដុតផ្ទះរបស់ខ្លួនឯងបណ្ដាលឲ្យឆេះអស់ទាំងស្រុង ។
ទ្រព្យសម្បត្តិដែលខូចខាតរួមមាន ផ្ទះមួយខ្នងដែលមានទទឹង៣ម៉ែត្រកន្លះនិងបណ្ដោយ ៤ម៉ែត្រ សង់អំពីឈើ ដំបូលប្រក់ស័ង្កសី ម៉ូតូមួយគ្រឿង ម៉ាកស៊ីរូសគ្មានស្លាកលេខ និងលុយជិត២០ម៉ឺនរៀល ព្រមទាំងទ្រព្យសម្បត្តិមួយចំនួនបន្ថែមទៀត ។ ដោយសារតែភាពកម្រោលនេះ កំពូលប្តីអគតិនេះត្រូវបានកម្លាំងប៉ុស្តិ៍នគរបាលស្រែខ្ទុម ឃាត់ខ្លួនយកមកប្រគល់ជូនអធិការដ្ឋាននគរបាលស្រុកកែវសីមា ដើម្បីសួរនាំនិងអនុវត្តតាមនីតិវិធី ៕
ចែករំលែកព័តមាននេះ