រាជធានីភ្នំពេញ ៖ សណ្ឋាគារ ភែលេសហ្គេតហូថែល&រីសត ដែលទើបដំណើរការនៅកម្ពុជារាជធានីភ្នំពេញ ទើបតែ២ឆ្នាំប៉ុណ្ណោះ តែសណ្ឋាគារនេះ បានទទួលការគាំទ្រពីសំណាក់ភ្ញៀវជាតិ អន្តរជាតិយ៉ាងខ្លាំងក្លា ដែលធ្វើអោយសណ្ឋាគារនេះ…
រាជធានីភ្នំពេញ ៖ សណ្ឋាគារ ភែលេសហ្គេតហូថែល&រីសត ដែលទើបដំណើរការនៅកម្ពុជារាជធានីភ្នំពេញ ទើបតែ២ឆ្នាំប៉ុណ្ណោះ តែសណ្ឋាគារនេះ បានទទួលការគាំទ្រពីសំណាក់ភ្ញៀវជាតិ អន្តរជាតិយ៉ាងខ្លាំងក្លា ដែលធ្វើអោយសណ្ឋាគារនេះ ទទួលបានពានរង្វាន់ជាច្រើនក្នុងរយៈពេលពីរឆ្នាំនេះ ជាក់ស្ដែង កាលពីខែតុលា ឆ្នាំ២០១៩នេះ សណ្ឋាគារមួយនេះ បានទទួលពានរង្វាន់ ជាសណ្ឋាគារដ៏ឆ្នើមប្រចាំតំបន់អាស៊ី ឆ្នាំ ២០១៩ ( The Best Charming Hotel in Asia 2019) ពីប្រទេសបារាំង ។
នៅក្នុងសន្និសីទសារព័ត៌មានមួយកាលពីរសៀលថ្ងៃទី០៦ វិច្ឆិកា២០១៩ នៅសណ្ឋាគារ របស់ខ្លួន លោកធី សុធា អ្នកគ្រប់គ្រងសណ្ឋាគារ Palace Gate Hotel & Resort បានអោយដឹងថា ពានរង្វាន់ដែលសណ្ឋាគារ យើងទទួលបាន គឺមានការចូលរួមប្រកួតប្រជែងពីសណ្ឋាគារជាច្រើននៅប៉ែកអឺរ៉ុប និង តំបន់មជ្ឈឹមបូព៌ា ដូចជាសណ្ឋាគារដែលមានឈ្មោះល្បីៗនៅលើពិភពលោកជាច្រើនទៀតផងដែរ ។
លោកថា៖« ពានរង្វាន់ដែលយើងទទួលបាននេះ គឺមានការវាយតម្លៃពីស្ថាប័ន Prix Villegiature នៃប្រទេសបារាំងដែលជាស្ថាប័នមួយមានជំនាញក្នុងការវាយតម្លៃ និងផ្ដល់ពិន្ទុ ដល់សណ្ឋាគារនានានៅលើពិភពលោក »។
លោកបន្តថា ពានរង្វាន់ដែល Prix Villegiature បានផ្ដល់អោយសណ្ឋាគារ Palace Gate Hotel & Resort ផ្ដោតទៅលើទីតាំង ពីព្រោះសណ្ឋាគារ នេះមានទីតាំងនៅជាប់នឹងរបងព្រះបរមរាជវាំងនៃព្រះរាជាណាចក្រកម្ពុជា ហើយជាសណ្ឋាគារដែលមានការរចនាបានស្អាតល្អនៅខាងក្នុង ដែលមានលក្ខណៈបែបខ្មែរ ទាំងម្ហូបអាហារ ឯកសណ្ឋាគារបុគ្គលិក និងការតុបតែងនៅក្នុងបន្ទប់សណ្ឋាគារជាដើម ។ សណ្ឋាគារនេះ មិនត្រឹមតែដែលល្អសម្រាប់ភ្ញៀវស្នាក់នៅទេ តែជាសណ្ឋាគារដែលជួយលើកស្ទួយដល់វប្បធម៌ខ្មែរ ជួយដល់បរិស្ថាន និងជួយទំនុកបំរុងដល់ការងារសង្គមជាច្រើនទៀងផងដែរ ។ អ្វីដែលសំខាន់ ក្នុងការវាយតម្លៃ ដើម្បីផ្ដល់ពានរង្វាន់ជូនសណ្ឋាគារយើងនោះ គឺ ការវាយតម្លៃពីភ្ញៀវដែលស្នាក់នៅក្នុងសណ្ឋាគារដែលបានពេញចិត្តទៅលើផ្នែកបម្រើសេវាកម្មរបស់សណ្ឋាគារយើង។
បើតាមលោកសូ ម៉ារ៉ា រដ្ឋលេខាធិការក្រសួងទេសចរណ៍កម្ពុជា បានមានប្រសាសន៍ផងដែរថា ក្នុងនាមជាក្រសួងទេសចរណ៍ សូមគាំទ្រ និងអបអរសាទរដល់សណ្ឋាគារ ភែលេសហ្គេតហូថែល & រីសតដែលទទួលបានពានរង្វាន់ជាសណ្ឋាគារដ៏ឆ្នើមប្រចាំតំបន់អាស៊ី ។ លោកនិយាយថា៖ « ការទទួលបានរង្វាន់មួយនេះ វាមិនមែនជារឿងងាយនោះទេ គឺត្រូវឆ្លងកាត់ការលំបាកច្រើន ដើម្បីអោយស្ថាប័នដែលប្រគល់ពានរង្វាន់ ពិនិត្យនិងដាក់ពិន្ទុជូន » ។
លោកបន្តថា ការទទួលបានរង្វាន់របស់សណ្ឋាគារ ភែលេសហ្គេត ហូថែល និងរីសត និងអាចស្រូវទាញភ្ញៀវទេសចរបរទេសបន្ថែមទៀតមកទស្សនានិងស្នាក់នៅក្នុងប្រទេសកម្ពុជា ដោយពួកគេ នឹងបានឃើញនិងដឹងថា កម្ពុជា មានសណ្ឋាគារស្អាតៗ ហើយទទួលស្គាល់ជាលក្ខណៈអន្តរជាតិផងដែរ ដូច្នេះពួកគេប្រាកដជាចង់មកលេង និងស្នាក់នៅក្នុងប្រទេសកម្ពុជា ។
លោកបន្ថែមថា សម្រាប់ភ្ញៀវទេសចរបរទេស គ្រាន់តែលឺឈ្មោះសណ្ឋាគារនេះ ពួកគេមានអារម្មណ៍ថា ប្លែក និងចង់មកសាកស្នាក់នៅហើយ ។ ហើយនៅពេលពួកគេមកដល់ពួកគេ នឹងពេញចិត្តជាមួយនឹងទីតាំង ដោយសារតែទីតាំងសណ្ឋាគារមួយនេះ ស្ថិតនៅតំបន់ល្អសម្រាប់ការទស្សនារបស់ពួកគេ ហើយជាតំបន់កណ្ដាលក្រុងផងដែរ ។
លោកថា៖ «សណ្ឋាគារដែលទទួលបានជោគជ័យ ត្រូវមានកត្តាបីសំខាន់ៗ រួមមាន ទីតាំង ការរចនា តុបតែង ទាំងខាងក្នុង និងខាងក្រៅ ឈ្មោះនៃសណ្ឋាគារនោះរួមទាំងសេវាកម្មបម្រើភ្ញៀវផងដែរ » ។
យោងតាមការបញ្ជាក់ពីអ្នកគ្រប់គ្រងសណ្ឋាគារបានអោយដឹងថា ចាប់តាំងពីសណ្ឋាគារនេះ បានបើកដំណើរការរហូតមកដល់ពេលនេះ កំណើនភ្ញៀវចូលមកស្នាក់នៅ មានកំណើនជាប្រចាំ ហើយភ្ញៀវដែលចូលស្នាក់នៅច្រើនជាងគេនោះ គឺមកពីប៉ែកអឺរ៉ុប បន្ទាប់មកទៀតគឺភ្ញៀវជនជាតិចិន ដែលជាភ្ញៀវទេសចរបរទេសច្រើនជាងគេនៅកម្ពុជា ៕ ដោយសហការ (កែសម្រួលដោយ ៖ បុប្ផា)
