ប្រទេសថៃ ៖ កាលពីថ្ងៃទី៣០តុលាកាសែតLEPOINTបារាំងបានចេញផ្សាយអត្ថបទមួយ អំពីរឿងផិតក្បត់ដ៏អាថ៌កំបាំងក្នុងព្រះបរមរាជវាំងថៃ។
អត្ថបទនោះសរសេរថា តើមានរឿងអាក្រក់អ្វីទៅកើតមានក្នុងព្រះបរមរាជវាំងក្រុងបាងកក? មិនដល់មួយឆ្នាំផងក្រោយពីឡើងគ្រងរាជសម្បត្តិព្រះមហាក្សត្រមហាវ៉ាជីរ៉ាឡុងកនទ្រង់បានចេញការសម្រេចគួរឲ្យភ្ញាក់ផ្អើល២ ដែលបំបែករឿងសម្ងាត់ក្នុងព្រះបរមរាជវាំង។ ព្រះមហាក្សត្រព្រះជន្ម៦៧ព្រះវស្សាបានដកហូតតំណែងសមាជិកកងរក្សាព្រះអង្គ៤នាក់ ក្នុងនោះ២នាក់ស្ថិតក្នុងផ្នែករៀបចំបន្ទប់។
យោងតាមសេចក្ដីប្រកាសជាផ្លូវការមួយរបស់ទស្សនាវដ្ដីព្រះបរមរាជវាំងថា មនុស្ស២នាក់នោះត្រូវដកចេញដោយសារឥរិយាបថពុំសមស្របរបស់ពួកគេនិងអំពើផិតក្បត់ ចំណែក២នាក់ទៀតត្រូវដកចេញដោយសារតែមិនអាចគោរពស្ដង់ដារបស់កងរក្សាព្រះអង្គ។ រឿងរ៉ាវនោះបង្ហាញកាន់តែច្បាស់កាលពីសប្ដាហ៍មុន ក្រោយពីការដកតំណែងអ្នកម្នាងSINEENAT WONGVAJIRAPAKDI។
តាមសេចក្ដីប្រកាសរបស់ព្រះបរមរាជវាំងចេញផ្សាយនាថ្ងៃទី២១តុលាដោយទូរទស្សន៍ជាតិថៃថា នារីអាយុ៣៤ឆ្នាំរូបនោះដែលក្លាយជាផ្លូវការ ជាព្រះស្នំឯករបស់ព្រះមហាក្សត្រកាលពីខែកក្កដាកន្លងទៅ ត្រូវបានដករាល់តំណែងមកពីខ្វះការស្មោះត្រង់និងមានអាកប្បកិរិយាគ្មានការគោរព។
បណ្ដាសកម្មភាពរបស់ព្រះស្នំឯករូបនោះបង្ហាញថា មិនទុកព្រះកិត្តិយសដល់ព្រះមហាក្សត្រហើយពុំដឹងពីប្រពៃណីនៃព្រះបរមរាជវាំង។ អត្ថបទនោះបន្តថាសេចក្ដីប្រកាសក៏ចោទប្រកាន់ផងដែរអ្នកម្នាងរូបនោះថា ប្រកាន់ចិត្តប្រឆាំងជំហររបស់ព្រះរាជអគ្គមហេសីស៊ូធីតា សំដៅបម្រើមហិច្ឆិតាផ្ទាល់ខ្លួន។
ជាអតីតគិលានុប្បដ្ឋាយិកានាងSINEENAT WONGVAJIRAPAKDIបន្ទាប់មកបានចូលហាត់ហ្វឹកហ្វឺនឲ្យក្លាយជាអ្នកបើកយន្តហោះរបស់កងទ័ពអាកាសថៃ រួចឡើងសក្ដិជាបន្តបន្ទាប់រហូតក្លាយជាឧត្ដមសេនីយទោ។ រួចនាខែឧសភាកន្លងទៅបានកា្លយជាសមាជិកនៃកងរក្សាព្រះអង្គ៕ (កែសម្រួលដោយ ៖ បុប្ផា)
ចែករំលែកព័តមាននេះ