ទីក្រុងមូស្គូ ៖ យោងទៅតាមឯកសាររដ្ឋាភិបាល ដែលទីភ្នាក់ងារសារព័ត៌មាន Reuters ទទួលបាន កាលពីថ្ងៃទី២៨ ខែកញ្ញា បានបង្ហាញថា ប្រទេសរុស្ស៊ីមានផែនការចំណាយថវិកាចំនួន ១៧,១ទ្រីលានរូប្លិ ឬស្មើនឹង ២០២,៥ ពាន់លានដុល្លារអាមេរិកទៅលើវិស័យការពារជាតិ សម្រាប់ឆ្នាំ២០២៧ ដែលចំនួននេះកើនឡើងប្រមាណ ២៧% លើសកញ្ចប់ថវិកាចំនួន ១៥៩,២ ពាន់លានដុល្លារដែលបានគ្រោងទុកពីដំបូង ហើយក៏ជាតួលេខខ្ពស់បំផុត គិតចាប់តាំងពីការចាប់ផ្តើមសង្គ្រាមក្នុងប្រទេសអ៊ុយក្រែនឆ្នាំ២០២២មក។
ផ្អែកតាមឯកសារដដែល ចំណាយសរុបលើវិស័យការពារជាតិរបស់ប្រទេសរុស្ស៊ី នឹងកើនឡើងរហូតដល់ ៥៨៩,៦ ពាន់លានដុល្លារ នៅក្នុងរយៈពេល៣ឆ្នាំខាងមុខ។ នៅក្នុងឆ្នាំនេះ រដ្ឋាភិបាលរុស្ស៊ីធ្លាប់បានគ្រោងចំណាយថវិកាចំនួន ១៤២,៦ ពាន់លានដុល្លារទៅលើវិស័យការពារជាតិ ប៉ុន្តែចំនួនចំណាយជាក់ស្តែងត្រូវបានលាក់ការសម្ងាត់។ ក្រៅពីនេះ ការចំណាយលើវិស័យយោធាមួយចំនួន ក៏អាចត្រូវបានរាប់បញ្ចូលក្នុងផ្នែកផ្សេងទៀតនៃកញ្ចប់ថវិកាជាតិផងដែរ។
ឯកសារទាំងនោះ ក៏បានបង្ហាញដែរថា រដ្ឋាភិបាលបានដំឡើងការប៉ាន់ប្រមាណឱនភាពថវិកាជាតិសម្រាប់ឆ្នាំ ២០២៦ ដល់ទៅ ៣,២% នៃផលិតផលក្នុងស្រុកសរុប (GDP) ពោលកើនឡើងពី ១,៦% កាលពីមុន។ ការចំណាយថវិកាសរុបក្នុងឆ្នាំ ២០២៦ នឹងកើនឡើង ១៣,២% ដល់ ៥៧៣ ពាន់លានដុល្លារ ឬ ២០,៩% នៃ GDP ដោយរដ្ឋាភិបាលត្រូវបានរំពឹងថា នឹងដាក់សេចក្តីព្រាងច្បាប់ថវិកានេះ ទៅកាន់សភាត្រឹមថ្ងៃទី១ តុលា។
កាលពីសប្តាហ៍មុន រដ្ឋាភិបាលរុស្ស៊ីក៏បានប្រកាសអំពីផែនការដំឡើងពន្ធថ្មីសម្រាប់ឆ្នាំ ២០២៧។ ផ្អែកលើឯកសារបានបង្ហាញថា ពន្ធលើប្រាក់ចំណេញបន្ថែមថ្មីលើក្រុមហ៊ុនលោហៈ និងរ៉ែ ត្រូវបានរំពឹងថានឹងប្រមូលចំណូលបានប្រហែល ២,៣ ពាន់លានដុល្លារជារៀងរាល់ឆ្នាំ។ លើសពីនេះ ឯកសារក៏បានបង្ហាញទៀតថា នៅក្នុងឆ្នាំនេះ រដ្ឋាភិបាលគ្រោងបង្កើនការខ្ចីប្រាក់សុទ្ធចំនួន ២៦% រហូតដល់ជិត ៥៩ ពាន់លានដុល្លារ ហើយនឹងចំណាយចំនួន ៥,៤ ពាន់លានដុល្លារ ដែលស្មើនឹង ១១% នៃផ្នែកសាច់ប្រាក់នៃមូលនិធិទ្រព្យសម្បត្តិជាតិ ដើម្បីកាត់បន្ថយឱនភាព។ ជាមួយគ្នានេះដែរ រដ្ឋាភិបាលក៏បានកាត់បន្ថយការប៉ាន់ស្មានប្រាក់ចំណូលពីប្រេង និងឧស្ម័នសម្រាប់ឆ្នាំនេះ មកត្រឹមតែ ៨៩ ពាន់លានដុល្លារពីចំនួនជិត ១០៥ ពាន់លានដុល្លារ កាលពីមុន។
ឯកសារនោះក៏បានបង្ហាញថា បំណុលរដ្ឋត្រូវបានព្យាករណ៍ថានឹងកើនដល់ ២១,៧% នៃ GDP ឆ្នាំ២០២៧ កើនឡើងពី ១៩,៩% នៃ GDP នៃឆ្នាំ២០២៦ ដែលកម្រិតនេះ ស្ថិត លើកម្រិត ២០% ដែលអាជ្ញាធរជាតិចាត់ទុកជាកម្រិតមានសុវត្ថិភាព។ ស្របពេលដែលការខ្ចីប្រាក់សរុបនៅឆ្នាំ២០២៧ ក៏នឹងកើនឡើង ៤៣% រហូតដល់ ៩០ ពាន់លានដុល្លារផងដែរ៕
ចែករំលែកព័តមាននេះ