សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំត្រូវធ្វើការប្រកាសដ៏សំខាន់បំផុតមួយ នាថ្ងៃទី២៧ ខែតុលា ឆ្នាំ២០១៩ ពីការស្លាប់របស់ប្រមុខក្រុមរដ្ឋអ៊ិស្លាម ABOU BAKR AL BAGHADI ក្នុងការវាយឆ្មក់មួយរបស់អាមេរិកនៅស៊ីរី។
នាយប់ថ្ងៃទី២៦ មកថ្ងៃទី២៧ ខែតុលា ទូរទស្សន៍អាមេរិក CNN និង ABC បានប្រកាសថា ប្រមុខក្រុមរដ្ឋអ៊ិស្លាម ABOU BAKR AL BAGHADI ត្រូវបានសម្លាប់ហើយនៅស៊ីរី ដោយសារការវាយប្រហារមួយរបស់អាមេរិក កាលពីថ្ងៃទី២៦ ខែតុលា នៅស៊ីរី។ ទូរទស្សន៍ទាំងនោះដែលដកស្រង់សម្ដីរបស់បណ្ដាអ្នកទទួលខុសត្រូវជាន់ខ្ពស់រៀបរាប់ថា AL BAGHADI បានស្លាប់ក្នុងឱកាសនៃប្រតិបត្តិការមួយរបស់កងទ័ពអាមេរិក នៅភាគឦសានស៊ីរី។
យោងតាមអ្នកទទួលខុសត្រូវម្នាក់ដកស្រង់សម្ដីដោយABCថា មេដឹកនាំក្រុមរដ្ឋអ៊ិស្លាម បានធ្វើឲ្យគ្រឿងផ្ទុះនៅជាប់ខ្លួនគេផ្ទុះដើម្បីធ្វើ្វអត្តឃាត។ កងទ័ពអាមេរិកបានធ្វើតេស្តនានា មុននឹងអាចអះអាងជាផ្លូវការពីការស្លាប់របស់ប្រមុខក្រុមរដ្ឋអ៊ិស្លាមនោះ។
តាមTWITTERលោកត្រាំសរសេរថាមានរឿងធំមួយចំនួនទើបកើតមាន។ ប្រធានាធិបតីគ្រោងធ្វើសេចក្ដីថ្លែងការណ៍សំខាន់បំផុតមួយ នៅសេតវិមាននាវេលាម៉ោង៩ព្រឹកម៉ោងក្នុងស្រុក។
ប្រសិនបើប្រតិបត្តិការយោធាអាមេរិកពិតជាទទួលបានជោគជ័យ នោះវានឹងជាជោគជ័យដ៏សំខាន់បំផុត ដែលអាចកម្ទេចអ្នកទទួកខុសត្រូវជាន់ខ្ពស់បំផុតរបស់ក្រុមរដ្ឋអ៊ិស្លាម ចាប់តាំងពីការសម្លាប់អូសាម៉ាប៊ីនឡាដេនប្រមុខអាល់កៃដា នៅប៉ាគីស្ថានដោយកងកម្លាំងពិសេសអាមេរិកមក។ ប្រមុខក្រុមរដ្ឋអ៊ីស្លាមនោះត្រូវបានគេប្រកាសថាស្លាប់ច្រើនលើកមកហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ