រាជធានីភ្នំពេញ ៖ កំពូលតារាចម្រៀងអ្នកនាង ឱក សុគន្ធកញ្ញា ថ្មីៗនេះបានបង្ហាញរូបភាពពពោះយ៉ាងសិចស៊ីមួយសន្លឹកនៅលើបណ្តាញសង្គមអ៊ីនស្ត្រាក្រាម ធ្វើឱ្យមានការចាប់អារម្មណ៍យ៉ាងខ្លាំងពីអ្នកគាំទ្រតារាចម្រៀងរូបនេះ ក្នុងពេលដែលកូនដំបូងរបស់នាងកាន់តែកៀកជិតដល់ថ្ងៃ សម្រាល ។
នេះជារូបរូបភាពដំបូងបំផុតដែល ឱក សុគន្ធកញ្ញា បានបង្ហាញចាប់តាំងពីនាងពពោះដោយនាងបានស្លៀកបំពាក់យ៉ាងសិចស៊ីបញ្ចេញក្បាលពោះយ៉ាងធំស្ទើរទាំងតែម្តង ដោយគ្រាន់តែពាក់អាវកាក់នារីពណ៌ខ្មែរបិទបាំងតែផ្នែកខាងលើ ។
រូបភាពមួយសន្លឹកនេះ កំពុងក្លាយជាការចាប់អារម្មណ៍យ៉ាងខ្លាំងពីបណ្តាអ្នកលេងអ៊ីនធើរណេត ហើយទោះជាយ៉ាងណាក៏ដោយ ការបញ្ចេញនូវរូបភាពមួយសន្លឹកពីតារាចម្រៀង ឱក សុគន្ធកញ្ញា នាពេលនេះមិនត្រូវបានគេរិះគន់ពីភាពសិចស៊ីជ្រុលនោះឡើយ ប៉ុន្តែតារារូបនេះបែរជាទទួលបានការគាំទ្រ និងលើកសសើរពីរូបសម្រស់យ៉ាងច្រើនពីមិត្តភក្តិ និងប្រិយមិត្តគាំទ្ររបស់នាងទៅវិញ ។
ជាការកត់សម្គាល់ បើទោះបីជាពេលនេះ ឱក សុគន្ធកញ្ញា បានពពោះកាន់តែធំក៏ដោយ ប៉ុន្តែនាងហាក់មិនបានសម្ងំថែរក្សាសុខភាពតែក្នុងផ្ទះនោះឡើយ ពោលគឺនាងនៅតែបន្តការចេញមុខជាបន្តបន្ទាប់តាមកម្មវិធីនានា ជាពិសេសនោះគឺកម្មវិធីប្រឡងចម្រៀង X Factor Cambodia ដែលមានការ live ផ្ទាល់នៅរៀងរាល់រាត្រីថ្ងៃអាទិត្យ ។
តារារូបនេះនៅតែបន្តតួនាទីជាគណៈកម្មការរបស់ខ្លួននៅក្នុងវិធីលំដាប់ពិភពលោកមួយនេះរហូតដល់វគ្គផ្តាច់ព្រ័ត្រ បើទោះបីជាមកដល់ពេលនេះនាងកាន់តែកៀកដល់ថ្ងៃសម្រាលហើយក៏ដោយ ហើយនាងហាក់មិនមានការអៀនខ្មាស់នៅពេលបង្ហាញវត្តមានតាមកញ្ចក់ទូរទស្សន៍ទាំងខ្លួនពពោះនេះឡើយ ។
ការបង្ហាញមុខជាសាធារណៈ ឬតាមកញ្ចក់ទូរទស្សន៍ និងការបង្ហោះរូបភាពមានផ្ទាំពោះតាមហ្វេសប៊ុកពី ឱក សុគន្ធកញ្ញា ជាបន្តបន្ទាប់នោះ គេសង្កេតឃើញនាងតែងតែទទួលបានការសរសើរពីរូបសម្រស់ដែលនៅតែស្រស់ស្អាត ជាមួយនឹងការស្លៀកពាក់ដ៏សមសួនស័ក្កិសមជាម្តាយសម័យថ្មី ។
ប្រភពពីអ្នកសិល្បៈដូចគ្នាបានអះអាងស្រដៀងគ្នាថា បន្ទាប់ពី ឱក សុគន្ធកញ្ញា បានពពោះកូនដំបូងនេះ នាងតែងទទួលបានការមើលថែទាំ និងយកចិត្តទុកដាក់យ៉ាងខ្លាំងពីសំណាក់ស្វាមីជាទីស្រឡាញ់ គឺលោក អ៊ឹង សុខលី ។ រហូតមកទល់ពេលនេះទាំង ឱក សុគន្ធកញ្ញា និង ស្វាមី សុទ្ធតែទន្ទឹងរង់ចាំមើលមុខកូនប្រុសសំណព្វចិត្ត ដែលមានឈ្មោះថា ឆលី ដែលនឹងចាប់កំណើតក្នុងពេលឆាប់ៗខាងមុខនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ