ការសិក្សាមួយធ្វើឡើងដោយអ្នកវិទ្យាសាស្ត្រសាកលវិទ្យាល័យ Harvard School of Public Healthបានអះអាងថា ទទួលទានសាច់ក្រហមកែច្នៃត្រឹម២បន្ទះក្នុងមួយថ្ងៃអាចបង្កើនគ្រោះហានិភ័យកើតមានជំងឺបេះដូងនិងជំងឺមហារីកដល់២០ភាគរយ ។
ការសិក្សាមួយធ្វើឡើងដោយអ្នកវិទ្យាសាស្ត្រសាកលវិទ្យាល័យ Harvard School of Public Healthបានអះអាងថា ទទួលទានសាច់ក្រហមកែច្នៃត្រឹម២បន្ទះក្នុងមួយថ្ងៃអាចបង្កើនគ្រោះហានិភ័យកើតមានជំងឺបេះដូងនិងជំងឺមហារីកដល់២០ភាគរយ ។
ការសិក្សាដែលបានតាមដានពិនិត្យលើមនុស្សប្រុសស្រីជាង១២ម៉ឺននាក់និងចំណាយពេលអស់ជិត៣០ឆ្នាំបានរកឃើញទៀតថា ប្រសិនជាគេទទួលទានសាច់ក្រហមស្រស់(មិនកែច្នៃ)ទំហំប៉ុនសន្លឹកបៀរមួយហ៊ូ អត្រាប្រឈមនឹងជំងឺខាងលើបានថយចុះមកនៅត្រឹម១៣ភាគរយ ។
សាស្ត្រាចារ្យ Frank Hu អ្នកនិពន្ធជាន់ខ្ពស់មកពីសាកលវិទ្យាល័យ Harvard School of Public Healthបានថ្លែងថា ៖«លទ្ធផលនៃការសិក្សានេះបានផ្តល់ជាភស្តុតាងកាន់តែច្បាស់បន្ថែមទៀតដែលថា ការទទួលទានសាច់ក្រហមទៀងទាត់ជាពិសេសសាច់កែច្នៃជាបុព្វហេតុចម្បងនៃការស្លាប់មុនអាយុ ។ ផ្ទុយមកវិញ ការជ្រើសរើសយកប្រភពអាហារសម្បូរដោយប្រូតេអុីនផ្សេងទៀតមកជំនួសសាច់ក្រហមគឺអាចផ្តល់ផលវិជ្ជមានដល់សុខភាព »។
ការជំនួសសាច់ក្រហមដោយត្រីអាចកាត់បន្ថយហានិភ័យនៃការស្លាប់មុនអាយុពីជំងឺបេះដូងនិងមហារីកបាន៧ភាគរយខណៈបន្លែនិងបណ្តាផលិតផលធ្វើពីទឹកដោះដែលមានខ្លាញ់តិចអាចកាត់បន្ថយហានិភ័យបាន១០ភាគរយ ។ ចំណែកគ្រាប់ធញ្ញជាតិនិងពពួកសណ្តែកមានជាតិប្រេងវិញអាចកាត់បន្ថយហានិភ័យបានដល់១៤ភាគរយ ។
តាមមូលនិធិជំងឺមហារីកពិភពលោក WCRFបានស្នើជាយោបល់ថា មនុស្សលោកគួរជៀសវាងទទួលទានសាច់ក្រហមដែលកែច្នៃទុកឱ្យបានយូរឬកំណត់ពីចំនួនដែលត្រូវទទួលទានដោយក្នុងមួយសប្តាហ៍កុំឱ្យលើស៥០០ក្រាម ។
វេជ្ជបណ្ឌិត Rachel Thompson អនុប្រធានផ្នែកវិទ្យាសាស្ត្ររបស់មូលនិធិ WCRFបានថ្លែងថា ៖«លទ្ធផលលើកនេះបានជួយពង្រឹងបន្ថែមនូវភស្តុតាងដែលបង្ហាញពីការជាប់ពាក់ព័ន្ធគ្នារវាងសាច់ក្រហមនិងជំងឺរ៉ាំរ៉ៃ ។ ជីវិតអាចត្រូវបានជួយសង្គ្រោះឱ្យផុតពីសេចក្តីស្លាប់ ប្រសិនជាគេជំនួសសាច់ក្រហមដោយបណ្តាអាហារសម្បូរប្រូតេអុីនផ្សេងៗមានដូចជា ត្រី បន្លែ បណ្តាសណ្តែកមានប្រេង និងសាច់មាន់ជាដើម »៕
ចែករំលែកព័តមាននេះ