រាជធានីភ្នំពេញ ៖ នៅសាលសន្និសីទចតុមុខ រាជធានីភ្នំពេញ នារសៀលថ្ងៃទី១៦ ខែតុលា ឆ្នាំ២០១៩ នេះ មានការប្រកាសបើកកម្មវិធីមហោស្រពប្រឡងចម្រៀងខ្មែរជាសាកលលើកទី៥ យ៉ាងឱឡារិក ដោយមហាជនមកគាំទ្រច្រើនពេញសាល។
នាឱកាសនោះក៏មានការអញ្ជើញចូលរួមពីសំណាក់លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ មន្ត្រីក្រោមឱវាទ ព្រមទាំងបេក្ខជនប្រឡងជាច្រើនរូបទៀតផង។ ជាការសម្គាល់ឃើញថា កម្មវិធីប្រឡងចម្រៀងមួយនេះ នៅតែពេញនិយម ដោយមានការកើនឡើងតួលេខអ្នកប្រកួត ជាពិសេសបងប្អូននៅក្រៅប្រទេសចាប់អារម្មណ៍ច្រើន។
មហោស្រពនេះ បានរៀបចំចំនួន៤លើកមកហើយចាប់តាំងពីឆ្នាំ២០១០មក ដោយបានលើកយកទម្រង់សិល្បៈចម្រៀងបុរាណ និងសម័យ ដើម្បីឲ្យបេក្ខជនចូលរួមបង្ហាញនូវទេពកោសល្យដណ្តើមជ័យលាភី។ ដោយឡែកមហោស្របសិល្បៈចម្រៀងខ្មែរជាសាកលលើកទី៥នេះ បានសម្រេចយកវិញ្ញាសាចម្រៀងក្នុងសត្សវត្សទី៥០ និង៦០។ ចំពោះដំណាក់កាលជ្រើសបេក្ខជន មានតាមលំដាប់លំដោយទៅតាមរាជធានី-ខេត្ត និងក្រៅប្រទេស ដើម្បីឈានដល់ការប្រឡងថ្នាក់ជាតិនាថ្ងៃទី២៦ តុលា ឆ្នាំ២០១៩ខាងមុខនេះ។
ការប្រឡងជ្រើសរើសបេក្ខជននៅតាមរាជធានី-ខេត្ត បានប្រព្រឹត្តទៅក្នុងអំឡុងខែសីហានិងកញ្ញា ដែលជាលទ្ធផលគណៈកម្មាការរៀបចំរាជធានី-ខេត្តបានជ្រើសរើសបេក្ខជន បេក្ខនារីចំនួន១០០រូប ក្នុងនោះផ្នែកចម្រៀងសម័យ៥០រូប និងផ្នែកចម្រៀងបុរាណ៥០រូប។
ចំណែកការប្រឡងជ្រើសរើសបេក្ខជន បេក្ខនារីនៅក្រៅប្រទេស ដើម្បីជួយផ្សព្វផ្សាយជ្រើសរើសបេក្ខជនមួយចំនួននៅក្រៅប្រទេស ដែលបានធ្វើនាខែសីហា និងកញ្ញា។ ជាលទ្ធផលយើងរកបានបញ្ជីឈ្មោះបេក្ខជន បេក្ខនារីចំនួន២៧រូប បុរស១៤នាក់ និងនារី១៣នាក់ ដោយបេក្ខជនទាំងអស់មកពីសហរដ្ឋអាមេរិក១៣រូប បារាំង៤រូប អូស្ត្រាលី៤រូប កាណាដា៤រូប និងជប៉ុង១រូប ក្នុងនោះបេក្ខជនចម្រៀងសម័យ២១រូប និងបុរាណ៦រូប ។
រីឯដំណាក់កាលប្រឡងថ្នាក់ជាតិនឹងប្រព្រឹត្តទៅចាប់ពីថ្ងៃទី១៦ ដល់ថ្ងៃទី២៦ ខែតុលា ឆ្នាំ២០១៩ខាងមុខនេះ ដោយចែកជា៣ដំណាក់កាលធំៗ ៖
ដំណាក់កាលទី១- វគ្គប្រឡងជម្រុះលើកទី១មានរយៈពេល៣ថ្ងៃ ដោយចាប់ដំណើរការពីថ្ងៃព្រហស្បតិ៍ ទី១៧ ដល់ថ្ងៃសៅរ៍ ទី១៩ ឆ្នាំ២០១៩ សម្រាប់បេក្ខជន បេក្ខនារីនៅក្នុងប្រទេស ហើយគណៈកម្មាការមេប្រយោគ នឹងជម្រុះបេក្ខជន៥២រូប។
ដំណាក់កាលទី២- វគ្គប្រឡងជម្រុះពាក់កណ្តាលផ្តាច់ព្រ័ត្រចាប់ដំណើរការថ្ងៃ២១ និង២២តុលា ឆ្នាំ២០១៩ នាសាលចតុមុខដែលមានបេក្ខជន បេក្ខនារីចំនួន៤៨រូប ដែលជាប់ជម្រុះលើកទី១ រួមជាមួយបេក្ខជន បេក្ខនារីក្រៅប្រទេស២៧រូប។ ដំណាក់កាលទី២នេះ ជម្រុះយក៣៥រូប ដោយរក្សាទុក៤០រូប ក្នុងនោះបុរាណ២០រូប និងសម័យ២០រូប។
ដំណាក់កាលទី៣- វគ្គប្រឡងផ្តាច់ព្រ័ត្រនៅសាលាចតុមុខនាថ្ងៃទី២៤ ខែតុលា ឆ្នាំ២០១៩ ជាវគ្គចុងក្រោយជ្រើសជ័យលាភី២០រូប ក្នុងនោះចំណាត់ថ្នាក់លេខ១ ចំនួន៤រូប (បុរាណ២រូប សម័យ២រូប), លេខ២ ចំនួន៤រូប (សម័យ២រូប បុរាណ២រូប) និងលេខ៣ ចំនួន៤រូប (សម័យ២រូប បុរាណ២រូប) ព្រមទាំងរង្វាន់លួងចិត្តលេខ៤ និងលេខ៥ ចំនួន៨រូប (បុរាណ៤រូប និងសម័យ៤រូប)។ ដោយឡែកកម្មវិធីប្រកាសជ័យលាភីជាផ្លូវការរៀបចំធ្វើនៅថ្ងៃទី២៦ ខែតុលា ឆ្នាំ២០១៩នាសាលមហោស្រពកោះពេជ្រ។ (កែសម្រួលដោយ ៖ បុប្ផា)
ចែករំលែកព័តមាននេះ