រាជធានីភ្នំពេញ ៖ កាលពីថ្ងៃទី៥ មេសាក្រុមហ៊ុនបេយើរបានទទួលការអនុញ្ញាតពីក្រសួងសុខាភិបាលប្រើប្រាស់ឱសថណិចហ្សាវ៉ាសម្រាប់ការព្យាបាលអ្នកជំងឺមហារីកថ្លើម ដូច្នេះអ្នកជំងឺមិនចាំបាច់ទៅព្យាបាលនៅបរទេសដោយចំណាយប្រាក់ជាច្រើននោះទេ ។ ណិចហ្សាវ៉ា(សូរ៉ាហ្វេណីប) គឺជាឱសថដែលជួយពន្យារអាយុជីវិតរបស់អ្នកជំងឺដែលស្ថិតក្នុងដំណាក់កាលធ្ងន់ធ្ងរ ហើយបច្ចុប្បន្នត្រូវបានអនុញ្ញាឱ្យប្រើប្រាស់ជាង១០០ប្រទេស ទូទាំងពិភពលោក ។ ណិចហ្សាវ៉ាបានទទួលការអនុញ្ញាតពីក្រសួងសុខាភិបាលកម្ពុជា នៅខែមីនា ឆ្នាំ២០១៤ និងអាចរកជាវបាននៅគ្រប់មន្ទីរពេទ្យធំៗ និងគ្លីនិកទូទាំងប្រទេស ។
លោកស្រីស្រ៊ុន ម៉ាលីន ប្រធានក្រុមហ៊ុនបេយើរ Healthcare បានឱ្យដឹងថា បេសកកម្មរបស់យើងគឺការប្រើប្រាស់វិទ្យាសាស្ត្រដើម្បីឱ្យជីវិតឱ្យប្រជាពលរដ្ឋប្រសើរឡើង ។ អ្នកជំងឺមហារីកឥឡូវនេះអាចព្យាបាលនៅប្រទេសកម្ពុជាដោយមិនចាំបាច់ទៅព្យាបាលនៅបរទេសដែលត្រូវចំណាយទាំងថ្លៃព្យាបាល ការស្នាក់នៅ ការធ្វើដំណើរ និងថ្លៃចំណាយផ្សេងៗទៀតទេ ។
យោងតាមរបាយការណ៍របស់អង្គការសុខភាពពិភពលោកបានឱ្យដឹងថា ប្រទេសកម្ពុជាជាប់ចំណាត់ថ្នាក់ទី៩នៅជុំវិញពិភពលោកចំពោះការកើតជំងឺមហារីកដែលបណ្ដាលមកពីជំងឺថ្លើមប្រភេទBបង្កទៅជាជំងឺមហារីក ។ សម្រាប់ប្រទេសកំពុងអភិវឌ្ឍន៍ដូចកម្ពុជាអាចនឹងត្រូវទទួលបន្ទុកថែមទៀតជាមួយនឹងករណីជំងឺមហារីក ។ របាយការណ៍នោះ ក៏បានបញ្ជាក់ថា នៅទូទាំងពិភពលោកមានករណីស្លាប់ដោយសារជំងឺមហារីកចំនួន៧៤៦.០០០ករណីនៅជុំវិញពិភពលោកនាឆ្នាំ២០១២ ។
លោកវេជ្ជបណ្ឌិតសុខ សុធា ឯកទេសជំងឺមហារីក និងគ្រាប់ឈាមនៅមន្ទីរពេទ្យកាល់ម៉ែតបានឱ្យដឹងថា មូលហេតុនិងកត្ដាគ្រោះថ្នាក់នៃជំងឺមហារីកថ្លើមបណ្ដាលមកពីជំងឺថ្លើមប្រភេទBនិងC រាំុរ៉ៃ ការប្រើប្រាស់គ្រឿងស្រវឹងនិងការទទួលទានគ្រាប់ធញ្ញជាតិក៏ដូចជាអាហារដែលបានឆ្លងមេរោគផ្សិតដូចជាសណ្ដែងដីក្រៀម ម្ទេសក្រៀម និងខ្ទឹម ។ ជំងឺមហារីកថ្លើមជាទូទៅមិនទាន់បង្ហាញរោគសញ្ញាអ្វីទាំងអស់នៅដំណាក់កាលដំបូល ។ ទោះជាយ៉ាងណាក៏ដោយដំុពកមហារីកធំ ឬរាលដាលទៅផ្នែកផ្សេងៗទើបអ្នកជំងឺមានរោគសញ្ញាផ្សេងៗ ដូចជា បាត់បង់ចំណង់ញាំុអាហារ ក្អួតចង្អោរ ឈឺក្រពះ ហើមពោះ ឈឺចាប់ក្នុងពោះផ្នែកខាងលើរោគសញ្ញាជំងឺខាន់លឿងដែលស្បែកនិងភ្នែកមានពណ៌លឿង ទឹកនោមមានពណ៌លឿង ខ្សោយ នឿយហត់ និងស្រកទម្ងន់ ។ អ្នកជំងឺភាគច្រើនត្រូវបានរកឃើញថាមានជំងឺមហារីកថ្លើមនៅពេលពួកគាត់ស្ថិតក្នុងដំណាក់កាលធ្ងន់ធ្ងរ គឺជាពេលវេលាមួយដែលសូម្បីតែការវះកាត់និងប្រើឱសថក៏មិនអាចព្យាបាលបាន ។
លោកសាស្ត្រាចារ្យ ណារីន វរ៉ារុឌ ប្រធាននាយកដ្ឋានជំងឺមហារីកនៃមន្ទីរពេទ្យចុឡាឡុងកន ទីក្រុងបាងកក ប្រទេសថៃ មានប្រសាសន៍ថា មានវិធីសាស្ត្រព្យាបាលជំងឺមហារីកជាច្រើនសម្រាប់ជ្រើសរើសទៅតាមស្ថានការណ៍និងលក្ខខណ្ឌរបស់អ្នកជំងឺ ។ ក្នុងនោះផងដែរសូរ៉ាហ្វេណីបជាឱសថដំបូងដែលត្រូវបានអនុញ្ញាតឱ្យប្រើប្រាស់ ព្រមទាំងជួយទប់ស្កាត់ការរីកធំធាត់ និងការរីករាលដាលនៃមេរោគមហារីកដោយបង្អាកនូវហ្សែនឬក៏ប្រូតេអីុនដែលធ្វើឱ្យដុំពករីកធំនិងរាលដាលលឿន ។ ដោយសារតែសូរ៉ាហ្វេណីប សំដៅទៅតែដុំពក ដូចនេះវាមានផលរំខានតិចតួចបើប្រៀបធៀបការព្យាបាលដោយឱសថដែលមានឥទ្ធពលនៅតែលើកោសិកាធម្មតាដូច្នេះសូរ៉ាហ្វេណីបគឺការព្យាបាលមួយដែលមានភាពច្នៃប្រឌិតសម្រាប់អ្នកជំងឺមហារីកថ្លើមកម្រិតធ្ងន់ធ្ងរដែលមិនអាចទទួលការវះកាត់ និងការចាក់ថ្នាំផ្សេងៗបាន ។
ការសិក្សានៅអឺរ៉ុបនិងសហរដ្ឋអាមេរិកបានរកឃើញថា ណិចហ្សាវ៉ា អាចព្យាបាលអាយុជីវិតរបស់អ្នកជំងឺមហារីកថ្លើមបានរហូតដល់ទៅ៤៤% ខណៈពេលដែលអ្នកជំងឺមិនបានទទួលការព្យាបាលដោយឱសថនេះអាចរស់រានបានត្រឹមតែ៧,៩ខែ ហើយអ្នកដែលទទួលការព្យាបាលអាចរស់បានរហូតដល់១០,៧ខែ ។ នៅតំបន់អាសីុការព្យាបាលត្រូវបានគេរកឃើញថាអាចជួយពន្យារអាយុជីវិតអ្នកជំងឺរហូតដល់៤៧% ។ អ្នកដែលមិនទទួលការព្យាបាល អាចរស់បាន៤,២ខែខណៈដែលអ្នកបានទទួលការព្យាបាលអាចរស់បានរហូតដល់៦,៥ខែ ៕
ចែករំលែកព័តមាននេះ