ប្រទេសរុស្ស៊ី ៖ ក្នុងបទសម្ភាសន៍មួយជាមួយកាសែតMOSKOVSKI KOMSOMOLETS រដ្ឋមន្ត្រីការពារប្រទេសរុស្ស៊ីលោកស័រហ្គេយឆយហ្គូអះអាងនាថ្ងៃទី២២កញ្ញាថា រុស្ស៊ីនឹងលែងផលិតអាវុធ១២ធុន ក្រោយយកទៅសាកល្បងក្នុងប្រតិបត្តិ្កការនានានៅស៊ីរី ហើយកែប្រែឲ្យទំនើបអាវុធ៣០០ធុនទៀត។ ក្នុងបទសម្ភាសន៍នេះលោកឆយហ្គូលើកឡើងថា យើងបានធ្វើការត្រួតពិនិត្យក្រោយប្រតិបត្តិការនៅស៊ីរី…
ប្រទេសរុស្ស៊ី ៖ ក្នុងបទសម្ភាសន៍មួយជាមួយកាសែតMOSKOVSKI KOMSOMOLETS រដ្ឋមន្ត្រីការពារប្រទេសរុស្ស៊ីលោកស័រហ្គេយឆយហ្គូអះអាងនាថ្ងៃទី២២កញ្ញាថា រុស្ស៊ីនឹងលែងផលិតអាវុធ១២ធុន ក្រោយយកទៅសាកល្បងក្នុងប្រតិបត្តិ្កការនានានៅស៊ីរី ហើយកែប្រែឲ្យទំនើបអាវុធ៣០០ធុនទៀត។
ក្នុងបទសម្ភាសន៍នេះលោកឆយហ្គូលើកឡើងថា យើងបានធ្វើការត្រួតពិនិត្យក្រោយប្រតិបត្តិការនៅស៊ីរី ហើយរុស្ស៊ីផ្អាកលែងប្រើអាវុធ១២ធុន ដែលកាលពីមុនចាត់ទុកជាអាវុធឈានមុខ។
អាវុធទាំងនេះត្រូវដកចេញពីផលិតកម្មនិងលែងប្រើ។ ចំណែកអាវុធប្រមាណជា៣០០ធុនត្រូវធ្វើឲ្យទំនើបថែម ក្រោយបទពិសោធន៍នៅស៊ីរី។ លោកលាតត្រដាងទៀតថា បណ្ដាវិស្វករនិងបណ្ដាអ្នកឯកទេស របស់សហគ្រាសជាង៧០បានធ្វើការដើម្បីកែតម្រូវបណ្ដាចំណុចខ្វះខាតនៃសម្ភារយោធាដែលមាន។
រដ្ឋមន្ត្រីរូបនេះរៀបរាប់ទៀតថា ដោយផ្អែកលើបទពិសោធន៍នៅស៊ីរី ប្រធានាធិបតីលោកវ្ល៉ាឌីមៀរពូទីន បានចេញបញ្ជាឲ្យធ្វើការកែតម្រូវឬធ្វើឲ្យសុក្រិតអាវុធមួយចំនួន ពិសេសបណ្ដាមីស៊ីលបណ្ដែតធុនKALIBR បណ្ដាគ្រឿងសព្វាវុធនៃអាកាសចរណ៍យុទ្ធសាស្ត្រនិងនាវាមុជទឹក។
លោកបន្តថានៅស៊ីរីកងទ័ពរុស្ស៊ីប្រឈមមុខនឹងអង្គការភេរវកម្មមួយដែលមានសមាជិកច្រើនពាន់នាក់។ ពួកអ្នកដែលគិតថានៅស៊ីរីយើងប្រឈមមុខជាមួយនឹងក្រុមអ្នកចម្បាំងបែបបុរាណពិតជាយល់ច្រឡំធំហើយ។ ពួកភេរវករមានរថក្រោះជាច្រើនរយគ្រឿង បណ្ដារ៉ុក្កែតហ្វូង រថពាសដែកនិងគ្រាប់រំសេវច្រើនរយពាន់តោន ដែលពីមុនជារបស់កងទ័ពអ៊ីរ៉ាក់និងស៊ីរី។ ពួកគេមានសម្ភារទំនើបបំផុតក្នុងនោះមានទាំងបណ្ដាឧបករណ៍ទាក់ទងនិងស៊ើបការណ៍ទំនើបផង៕ (កែសម្រួលដោយ ៖ បុប្ផា)
ចែករំលែកព័តមាននេះ