ខេត្តតាកែវ ៖ ជនសង្ស័យម្នាក់ ត្រូវបានគណៈកម្មការវត្ត និងព្រះសង្ឃ ប្តឹងនគរបាលឱ្យចាប់ខ្លួន និងកសាងសំណុំរឿងបញ្ជូនទៅសាលាដំបូងខេត្ត ខណៈជននេះធ្វើសកម្មភាពគាស់ជញ្ជាំងកុដិ ចូលលួចបច្ច័យក្នុងថង់យាម ។ ប៉ុន្តែអ្វីដែលប្លែក និងគួរឱ្យអស់សំណើចនោះ គឺនៅពេលជននេះគាស់ជញ្ជាំងចូលលួចបច្ច័យបានហើយ មិនបានរត់គេចខ្លួនទៅណាទេ គឺនៅដេកលង់លក់ក្បែរកុដិនោះ ។
ខេត្តតាកែវ ៖ ជនសង្ស័យម្នាក់ ត្រូវបានគណៈកម្មការវត្ត និងព្រះសង្ឃ ប្តឹងនគរបាលឱ្យចាប់ខ្លួន និងកសាងសំណុំរឿងបញ្ជូនទៅសាលាដំបូងខេត្ត ខណៈជននេះធ្វើសកម្មភាពគាស់ជញ្ជាំងកុដិ ចូលលួចបច្ច័យក្នុងថង់យាម ។ ប៉ុន្តែអ្វីដែលប្លែក និងគួរឱ្យអស់សំណើចនោះ គឺនៅពេលជននេះគាស់ជញ្ជាំងចូលលួចបច្ច័យបានហើយ មិនបានរត់គេចខ្លួនទៅណាទេ គឺនៅដេកលង់លក់ក្បែរកុដិនោះ ។
ពេលព្រះសង្ឃដែលជាម្ចាស់បច្ច័យដឹងថាបាត់បច្ច័យអស់ ក៏ចេញពីកុដិដើរមកក្រៅ ឃើញជនសង្ស័យកំពុងលង់លក់ លុះឆែកលើខ្លួនជននេះក៏ឃើញបច្ច័យដែលលួច រួចយកទុក និងយកភួយមកដណ្តប់ឱ្យ ព្រមទាំងប្តឹងនគរបាលឱ្យចាប់ខ្លួន ។ ហេតុការណ៍នេះ កើតឡើងកាលពីវេលាម៉ោង៧ និង៣០នាទីព្រឹក ថ្ងៃទី១ មេសា នៅក្នុងវត្តស្វាយពា ឃុំអង្កាញ់ ស្រុកព្រៃកប្បាស ។ មន្ត្រីនគរបាលស្រុកព្រៃកប្បាស ឱ្យដឹងថា ជននេះឈ្មោះ ម៉ិច រស្មី ហៅអ៊ូខុង ភេទប្រុស អាយុ២២ឆ្នាំ រស់នៅក្នុងភូមិស្នោ ឃុំស្នោ ស្រុកព្រៃកប្បាស ជាមុខសញ្ញាចាស់ ព្រោះកន្លងមក ជននេះតែងធ្វើសកម្មភាពលួចនៅតាមផ្ទះប្រជាពលរដ្ឋ តាមវត្ត តែនៅពេលលួចបានហើយ តែងតែដេកលង់លក់នៅទីនោះ លុះពេលគេឆែកឆេរឃើញប្រាក់ ក៏យកវិញ មិនបានដាក់ទោសអ្វីទេ ប៉ុន្តែលើកនេះ គឺខុសពីលើកមុនៗ ដើម្បីឱ្យរាងចាល ។
មន្ត្រីនគរបាលស្រុកព្រៃកប្បាស ឱ្យដឹងទៀតថា មុនពេលកើតហេតុ កាលពីថ្ងៃទី៣១ មីនា វេលាម៉ោង១១ និង៣០នាទីយប់ ជនឈ្មោះ ម៉ិច រស្មី បានគាស់ជញ្ជាំងកុដិ ពីខាងត្បូង រួចចូលលួចយកបច្ច័យពីថង់យាមចំនួន១២ម៉ឺនរៀល តែនៅពេលលួចបានហើយ មិនរត់គេចខ្លួនទៅណាទេ គឺបានមកដេកលក់ក្បែរកុដិនោះយ៉ាងស្រួលទៅវិញ ទើបបានជាគណៈកម្មការវត្ត និងព្រះសង្ឃប្តឹងឱ្យនគរបាលចាប់ខ្លួនតែម្តង ។ នៅចំពោះមុខសមត្ថកិច្ច ជនឈ្មោះ ម៉ិច រស្មី សារភាពថា រូបគេពិតជាបានចូលលួចបច្ច័យក្នុងកុដិព្រះសង្ឃមែន ដោយសារតែគ្មានប្រាក់ចាយ។ លោក យុង ញីវ នាយការិយាល័យនគរបាលព្រហ្មទណ្ឌកម្រិតស្រាលខេត្ត ឱ្យដឹងថា សមត្ថកិច្ចបានកសាងសំណុំរឿងរួចរាល់ហើយ ហើយនៅព្រឹកថ្ងៃទី២ មេសា លោកបញ្ជូនជននេះទៅសាលាដំបូងខេត្ត ដើម្បីចាត់ការតាមច្បាប់ ៕
ចែករំលែកព័តមាននេះ