ខេត្តកណ្តាល ៖ លោក ប្លុង វិសាល ចៅក្រមសើបសួរសាលាដំបូងខេត្តកណ្តាលនៅល្ងាចថ្ងៃទី១២ ខែកញ្ញា ឆ្នាំ២០១៩ បានសម្រេចចេញដីការឃុំខ្លួនក្រុមស្ទាក់វាយអ្នកដំណើរដោយប្រើខ្សែក្រវ៉ាត់ ដុំថ្ម ដំបង ដាក់ពន្ធនាគារបណ្តោះអាសន្នពីបទ«លួចមានស្ថានទម្ងន់ទោស»ដែលប្រព្រឹត្តនៅភូមិដើមត្រាំង ឃុំអន្លង់រមៀត ស្រុកកណ្តាលស្ទឹង ខេត្តកណ្តាល កាលពីថ្ងៃទី១១ ខែកញ្ញា ឆ្នាំ២០១៩ វេលាម៉ោង១១និង១៥នាទីយប់ តាមមាត្រា៣៥៣, ៣៥៧ នៃក្រមព្រហ្មទណ្ឌ ។
ជនត្រូវចោទទី១-ឈ្មោះ ថោ ថារ័ត្ន ភេទប្រុស អាយុ១៦ឆ្នាំ មុខរបរមិនពិតប្រាកដ ជនជាតិ ខ្មែរ មានទីលំនៅភូមិអន្លង់រមៀតខាងត្បូង ឃុំអន្លង់រមៀត ស្រុកកណ្តាលស្ទឹង ខេត្តកណ្តាល និងទី២-ឈ្មោះ ញ៉ែម សុភ័ក្រ ភេទប្រុស អាយុ១៨ឆ្នាំ មុខរបរកម្មកររោងចក្រ ។
ជនរងគ្រោះទី១-ឈ្មោះ ស៊ឹម ថា ភេទប្រុស អាយុ៤៥ឆ្នាំ មុខរបរគ្រូបង្រៀន មានទីលំនៅ នៅភូមិថ្មក្តារ ឃុំជង្រុក ស្រុកគងពិសី ខេត្តកំពង់ស្ពឺ និងទី២-ឈ្មោះ តេង សារ៉ុម ភេទប្រុស អាយុ៣៩ឆ្នាំ រស់នៅភូមិត្រាំកង់ ឃុំនិទៀន ស្រុកបរសេដ្ឋ ខេត្តកំពង់ស្ពឺ មុខរបរកសិករ ។
តាមប្រភពពីនគរបាលស្រុកកណ្តាលស្ទឹងបានបញ្ជាក់ថា ជនរងគ្រោះទាំងពីរនាក់រួមទាំងឈ្មោះ សឿន គន្ធា បានជិះម៉ូតូមួយគ្រឿងម៉ាកហុងដាC125 ពណ៌ខ្មៅ ស៊េរីឆ្នាំ2015 ពាក់ផ្លាកលេខ ភ្នំពេញ 1CR-5454 ឌុបគ្នាចេញពីផ្ទះទៅភ្នំពេញ ពេលមកដល់កន្លែងកើតហេតុក្រុមជនសង្ស័យបានយកខ្សែក្រវ៉ាត់ ដុំថ្ម ដំបង វាយក្រុមជនរងគ្រោះ និងម៉ូតូបណ្តាលឲ្យរបួស និងខូចខាតម៉ូតូ ហើយក្រុមជនសង្ស័យជិះម៉ូតូគេចខ្លួនអស់ ។ បន្ទាប់មកកម្លាំងនគរបាលស្រាវជ្រាវឃាត់ខ្លួនបានជនសង្ស័យពីរនាក់ខាងលើបញ្ជូនទៅកសាងសំណុំរឿងបន្តចាត់ការតាមនីតិវិធី ៕
កែសម្រួលដោយ ៖ សំណាង
ចែករំលែកព័តមាននេះ