ខេត្តពោធិ៍សាត់ ៖ ស្ត្រី២នាក់ដើររកជីកសត្វអាពីងស្របពេលមេឃកំពុងភ្លៀង ហើយនាំគ្នាជ្រកក្រោមដើមឈើក៏ត្រូវរន្ទះបាញ់ បណ្តាលឱ្យស្លាប់ទាំង២នាក់តែម្តង ។
ហេតុការណ៍ខាងលើនេះបានកើតឡើងកាលពីម៉ោង៣និង៣០នាទីរសៀលថ្ងៃទី៩ ខែកញ្ញា ឆ្នាំ២០១៩ នៅភូមិក្បាលទាហ៊ាន ឃុំឈើតុំ ស្រុកក្រគរ ខេត្តពោធិ៍សាត់។
តាមប្រភពពីសមត្ថកិច្ចបានឲ្យដឹងថា ស្ត្រីរងគ្រោះដែលស្លាប់ទាំងពីរនាក់ខាងលើ ក្នុងនោះម្នាក់ឈ្មោះ សាក់ តិញ អាយុ៣៨ឆ្នាំ ជាស្ត្រីម៉េម៉ាយមានកូនស្រីម្នាក់ អាយុ៣ឆ្នាំ ចំណែកម្នាក់ទៀតឈ្មោះ ហៃ ឆាន អាយុ៤៩ឆ្នាំ ។ ជនរងគ្រោះទាំងពីរនាក់មានទីលំនៅភូមិឃុំកើតហេតុខាងលើ។
ទាក់ទិននឹងករណីខាងលើនេះសមត្ថកិច្ចឲ្យដឹងថា នៅរសៀលថ្ងៃកើតហេតុ ស្ត្រីរងគ្រោះទាំងពីរនាក់បានដើររកជីកសត្វអាពីងនៅមាត់ព្រៃតាមជើងភូមិ ដើម្បីយកមកធ្វើម្ហូប និងលក់បានលុយខ្លះៗគ្រាន់ផ្គត់ផ្គង់ជីវភាពគ្រួសារ។ នៅពេលស្ត្រីរងគ្រោះទាំង២នាក់កំពុងដើររកសត្វអាពីងនោះ ស្រាប់តែមានភ្លៀងធ្លាក់មួយមេមក ធ្វើឱ្យស្ត្រីរងគ្រោះទាំង២នាក់ក៍នាំគ្នាជ្រកក្រោមដើមចំបក់ ខណៈនោះក៍ត្រូវរន្ទះបាញ់ បណ្តាលឱ្យស្លាប់ទាំងពីរនាក់តែម្ដង។
នៅថ្ងៃទី១១ ខែកញ្ញា ឆ្នាំ២០១៩ លោកស្រី ម៉ែន ផល្លី អភិបាលរងនៃគណៈអភិបាលខេត្ត រួមជាមួយមន្ត្រីសាលាខេត្ត ក្រុមយុវជន និងអាជ្ញាធរមូលដ្ឋាន បាននាំយកអំណោយសប្បុរសធរទៅផ្ដល់ជូនគ្រួសារស្ត្រីរងគ្រោះទាំងពីរនាក់ ក្នុងនោះអំណោយលោក ម៉ៅ ធនិន អភិបាលនៃគណៈអភិបាលខេត្តមានអង្ករ ៣ការ៉ុងតូច និងថវិការចំនួន៣០ម៉ឺនរៀលក្នុងមួយគ្រួសារ។ សាខាកាកបាទក្រហមខេត្ត ឧបត្ថម្ភអង្ករ២ការរ៉ុងធំ ថវិកាចំនួន២០ម៉ឺនរៀល ត្រីខ៤យួរ និងមី៤កេស។ ដោយឡែកគណបក្សឃុំឈើតុំក៍បានឧបត្ថម្ភបន្ថែមអង្ករក្នុងមួយគ្រួសារ១ការ៉ុងធំផងដែរ។
លោកស្រី ម៉ែន ផល្លី បានចូលរួមរំលែកទុក្ខជាមួយគ្រួសារសពជនរងគ្រោះទាំងពីរនាក់ដោយក្ដីក្រៀមក្រំ ប៉ុន្តែមិនដឹងធ្វើយ៉ាងម៉េច ព្រោះវាជាបាតុភូតធម្មជាតិដែលតែងតែកើតមានគ្រប់ទីកន្លែង ពេលមានភ្លៀងធ្លាក់ម្ដងៗ។
ក្រោយពីទទួលបានដំណឹងក្រៀមក្រំខាងលើនេះភ្លាម លោក ម៉ៅ ធនិន អភិបាលនៃគណៈអភិបាលខេត្ត ដែលលោកតែងតែជួយសង្គ្រោះប្រជាជនខ្វះខាត និងមានបញ្ហាជារៀងរាល់ថ្ងៃនោះ លោកបានឲ្យលោកស្រីយកអំណោយមកប្រគល់ជូនគ្រួសារជនរងគ្រោះទាំងពីរនាក់ភ្លាមៗផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ